ବେଙ୍ଗାଲୁରୁ, ୨୪ ସେପ୍େଟମ୍ବର (ହି.ସ.)- କର୍ଣ୍ଣାଟକର ମୁଖ୍ୟମନ୍ତ୍ରୀ ଡି.କେ. ଶିବକୁମାର ମୁଖ୍ୟ ନିର୍ବାଚନ ଆୟୁକ୍ତ (ସିଇସି) ଜ୍ଞାନେଶ କୁମାରଙ୍କ ଇସ୍ତଫା ଦାବି କରିଛନ୍ତି। ଏହା ସହିତ ସେ ବର୍ତମାନ ଚାଲିଥିବା ସ୍ୱତନ୍ତ୍ର ଗଭୀର ପୁନରୀକ୍ଷଣ (ଏସଆଇଆର) ପ୍ରକ୍ରିୟାକୁ ବାତିଲ କରି ଭୋଟର ତାଲିକାର ନୂଆ କରି ପୁନରୀକ୍ଷଣ କରାଇବାକୁ ଦାବି କରିଛନ୍ତି।

ଗୁରୁବାର ବେଙ୍ଗାଲୁରୁରେ ଗଣମାଧ୍ୟମ ସହ କଥାବାର୍ତାରେ ଶିବକୁମାର କହିଛନ୍ତି ଯେ ଭୋଟ ଦେବାର ଅଧିକାର ଜୀବନ ଜିଇଁବାର ଅଧିକାର ସହ ସମାନ। ସେ ଅଭିଯୋଗ କରିଛନ୍ତି ଯେ ସାଧାରଣ ନାଗରିକଙ୍କ ଭୋଟ ଦେବାର ଅଧିକାରର ରାଜନୈତିକ ଉଦ୍ଦେଶ୍ୟରେ ଦୁରୁପଯୋଗ କରିବାକୁ ପ୍ରୟାସ କରାଯାଉଛି। ପଶ୍ଚିମବଙ୍ଗ, ବିହାର ସମେତ ଅନେକ ରାଜ୍ୟରେ ଏପରି ପ୍ରୟାସ କରାଯାଇଛି ଏବଂ ଏବେ କର୍ଣ୍ଣାଟକ ସମେତ ଅନ୍ୟ ରାଜ୍ୟଗୁଡ଼ିକରେ ମଧ୍ୟ ଏପରି କରାଯାଉଛି। ଶିବକୁମାର କହିଛନ୍ତି ଯେ ଏ ସମ୍ପର୍କରେ ସେ ବୁଧବାର ନିର୍ବାଚନ ଆୟୋଗଙ୍କୁ ଅଧିକ ସମୟ ଦେବାକୁ ଦାବି କରିଥିଲେ।

ନିର୍ବାଚନ ଆୟୋଗର ସଦସ୍ୟମାନଙ୍କ ମଧ୍ୟରେ ମତଭେଦର ଉଲ୍ଲେଖ କରି ଶିବକୁମାର ଅଭିଯୋଗ କରିଛନ୍ତି ଯେ ଆୟୋଗକୁ ଦିଆଯାଇଥିବା ସ୍ୱାୟତତାର ଦୁରୁପଯୋଗ କରାଯାଉଛି। ସେ କହିଛନ୍ତି ଯେ ଯେତେବେଳେ ଅଧିକାଂଶ ସଦସ୍ୟ କୌଣସି ମତ ସହ ସହମତ ନୁହନ୍ତି, ସେତେବେଳେ କୌଣସି ନିଷ୍ପତିକୁ ଏକତରଫା ଭାବେ ଲାଗୁ କରାଯାଇପାରିବ ନାହିଁ। ଏପରି ସ୍ଥିତିରେ ମୁଖ୍ୟ ନିର୍ବାଚନ ଆୟୁକ୍ତ ନୈତିକ ଆଧାରରେ ସ୍ୱେଚ୍ଛାରେ ଇସ୍ତଫା ଦେବା ଉଚିତ।

ଡିକେ ଶିବକୁମାର ବର୍ତମାନର ଏସଆଇଆର ପ୍ରକ୍ରିୟାକୁ ବାତିଲ କରି ନୂଆ କରି ପୁନରୀକ୍ଷଣ କରାଇବା ଉପରେ ଜୋର ଦେଇଛନ୍ତି। ସେ କହିଛନ୍ତି ଯେ ଏହା କଂଗ୍ରେସ କିମ୍ବା ବିଜେପିର ଭୋଟର ପ୍ରଶ୍ନ ନୁହେଁ, ବରଂ ପ୍ରତ୍ୟେକ ନାଗରିକଙ୍କ ଭୋଟ ଦେବାର ଅଧିକାରର ପ୍ରଶ୍ନ।

ଭୋଟର ତାଲିକାର ପୁନରୀକ୍ଷଣରେ ବ୍ୟବହୃତ ହେଉଥିବା ଫର୍ମ ୬, ୭ ଏବଂ ୮ର ଉଲ୍ଲେଖ କରି ଶିବକୁମାର ବର୍ତମାନର ପ୍ରକ୍ରିୟା ଉପରେ ପ୍ରଶ୍ନ ଉଠାଇଛନ୍ତି। ସେ ଅଭିଯୋଗ କରିଛନ୍ତି ଯେ ଏହା ଅଶିକ୍ଷିତ ଏବଂ ବଂଚିତ ବର୍ଗର ଲୋକଙ୍କ ଉପରେ ବିଶେଷ ପ୍ରଭାବ ପକାଇପାରେ। ସେ କହିଛନ୍ତି ଯେ ଏହା କେବଳ ମତର ବିଷୟ ନୁହେଁ, ବରଂ ମୌଳିକ ଅଧିକାରର ପ୍ରଶ୍ନ ଏବଂ ଏହା ସାଧାରଣ ଲୋକଙ୍କ ସ୍ୱର। ଶିବକୁମାର କହିଛନ୍ତି ଯେ ଏହି ପ୍ରସଙ୍ଗରେ ସଂସଦ ସମେତ ବ୍ୟାପକ ମଂଚରେ ଆଲୋଚନା ହେବା ଉଚିତ।

ସେ କହିଛନ୍ତି ଯେ ନୂଆ କରି ଏସଆଇଆର କରାଯିବା ଉଚିତ, ସମସ୍ତ ନାଗରିକଙ୍କ ଅଧିକାର ସୁନିଶ୍ଚିତ କରାଯିବା ଉଚିତ ଏବଂ ପ୍ରତ୍ୟେକ ବ୍ୟକ୍ତିଙ୍କ ଭୋଟ ଦେବାର ଅଧିକାର ସୁନିଶ୍ଚିତ କରିବା ପାଇଁ ସମଗ୍ର ସ୍ଥିତିର ବ୍ୟାପକ ସମୀକ୍ଷା କରାଯିବା ଉଚିତ। ଏହା ସହିତ, ଭୋଟର ସମ୍ବନ୍ଧୀୟ ତଥ୍ୟର ମଧ୍ୟ ପୁନର୍ବାର ଯାଂଚ କରାଯିବା ଉଚିତ।

---------------

---------------

ହିନ୍ଦୁସ୍ଥାନ ସମାଚାର / ଗଗନ