ନୂଆଦିଲ୍ଲୀ, ୨୪ ସେପ୍ଟେମ୍ବର (ହି.ସ.)। କେନ୍ଦ୍ରୀୟ ଜଳଶକ୍ତି ମନ୍ତ୍ରୀ ସିଆର ପାଟିଲଙ୍କ ଅଧ୍ୟକ୍ଷତାରେ ଆଜି ଭାରତ ଓ ନେଦରଲ୍ୟାଣ୍ଡ ମଧ୍ୟରେ ଜଳ କ୍ଷେତ୍ରରେ ରଣନୀତିକ ସହଭାଗିତାକୁ ନେଇ ଦ୍ୱିପାକ୍ଷିକ ବୈଠକ ଅନୁଷ୍ଠିତ ହେବ। ଏହି ବୈଠକ ଅପରାହ୍ନ ୩ଟାରେ ଭାରତ ମଣ୍ଡପମ୍ ପରିସରରେ ହେବ।
ଜଳଶକ୍ତି ମନ୍ତ୍ରଣାଳୟ ଅନୁଯାୟୀ, ବୈଠକ ସମୟରେ ଭାରତ ଓ ନେଦରଲ୍ୟାଣ୍ଡ ମଧ୍ୟରେ ଜଳ କ୍ଷେତ୍ରରେ ରଣନୀତିକ ସହଭାଗିତା ସହିତ ସେଣ୍ଟର ଅଫ୍ ଏକ୍ସିଲେନ୍ସ ପ୍ରତିଷ୍ଠା ଆଦି ବିଭିନ୍ନ ପ୍ରସଙ୍ଗରେ ଆଲୋଚନା ହେବ।
ଏହି ଅବସରରେ କେନ୍ଦ୍ରୀୟ ଜଳ ଆୟୋଗ (ସିଡବ୍ଲ୍ୟୁସି), ଗୁଜରାଟ ସରକାରଙ୍କ କଳ୍ପସର ବିଭାଗ ଏବଂ ନେଦରଲ୍ୟାଣ୍ଡର ଜଳ ସମ୍ବନ୍ଧୀୟ ଗବେଷଣା ପ୍ରତିଷ୍ଠାନ ଡେଲ୍ଟାରେସ୍ ମଧ୍ୟରେ ପ୍ରକଳ୍ପରେ ବୈଷୟିକ ସହଯୋଗ ପାଇଁ ଏକ ତ୍ରିପାକ୍ଷିକ ବୁଝାମଣାପତ୍ର (ଏମ୍ଓୟୁ) ସ୍ୱାକ୍ଷର ହେବ।
ଏହାବ୍ୟତୀତ, ସିଡବ୍ଲ୍ୟୁସି, ଗୁଜରାଟ ସରକାରଙ୍କ କଳ୍ପସର ବିଭାଗ ଏବଂ ନେଦରଲ୍ୟାଣ୍ଡର ଡେଲ୍ଫ୍ଟ ଟେକ୍ନିକାଲ୍ ୟୁନିଭର୍ସିଟି ମଧ୍ୟରେ କ୍ଷମତା ନିର୍ମାଣ ଓ ପ୍ରଶିକ୍ଷଣ ପାଇଁ ମଧ୍ୟ ଏକ ତ୍ରିପାକ୍ଷିକ ଏମ୍ଓୟୁ ସ୍ୱାକ୍ଷର କରାଯିବ।
ଭାରତ ମଣ୍ଡପମ୍ରେ ୨୨ ସେପ୍ଟେମ୍ବରରୁ ଆରମ୍ଭ ହୋଇଥିବା ପାଞ୍ଚଦିନିଆ ଭାରତ ଆନ୍ତର୍ଜାତୀୟ ଜଳ ସପ୍ତାହ-୨୦୨୬ ଅଧୀନରେ ଆୟୋଜିତ ଏହି କାର୍ଯ୍ୟକ୍ରମରେ ଜଳ ପରିଚାଳନା, ବୈଷୟିକ ସହଯୋଗ ଏବଂ କ୍ଷମତା ନିର୍ମାଣ କ୍ଷେତ୍ରରେ ଭାରତ-ନେଦରଲ୍ୟାଣ୍ଡ ସହଭାଗିତାକୁ ଆହୁରି ସୁଦୃଢ଼ କରିବା ଉପରେ ଗୁରୁତ୍ୱ ଦିଆଯିବ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
