ଆଇଚି-ନାଗୋୟା (ଜାପାନ), ସେପ୍ଟେମ୍ବର 24 (ହି.ସ) ଏସିଆନ୍ କ୍ରୀଡ଼ା ୨୦୨୬ରେ ଭାରତୀୟ ଟେବୁଲ ଟେନିସ୍ ଖେଳାଳିଙ୍କ ଭଲ ପ୍ରଦର୍ଶନ ଜାରି ରହିଛି। ମାନୁଷ ଶାହ ପୁରୁଷ ଏକକ ବର୍ଗରେ ବିଜୟ ସହ ନିଜ ଅଭିଯାନ ଆରମ୍ଭ କରିଥିବା ବେଳେ ଶ୍ରୀଜା ଅକୁଲା-ସିଣ୍ଡ୍ରେଲା ଦାସ ଏବଂ ଦିୟା ଚିତଲେ-ଯଶସ୍ୱିନୀ ଘୋରପଡ଼େଙ୍କ ଯୋଡ଼ି ମହିଳା ଯୁଗଳ ବର୍ଗରେ ନିଜ ନିଜ ମୁକାବିଲା ଜିତିଛନ୍ତି। ମାନୁଷ ଶାହ ପୁରୁଷ ଏକକର ପ୍ରାରମ୍ଭିକ ମୁକାବିଲାରେ ମାଲେସିଆର ୱଙ୍ଗ କ୍ୟୁ ଶେନଙ୍କୁ ସିଧାସଳଖ ୪-୦ ଗେମ୍ରେ ପରାସ୍ତ କରିଛନ୍ତି। ମାନୁଷ ୧୧-୯, ୧୪-୧୨, ୧୧-୭, ୧୧-୪ରେ ମୁକାବିଲା ଜିତିଥିଲେ। ମହିଳା ଯୁଗଳରେ ଶ୍ରୀଜା ଅକୁଲା ଏବଂ ସିଣ୍ଡ୍ରେଲା ଦାସଙ୍କ ଯୋଡ଼ି ମଙ୍ଗୋଲିଆର ବୋଲୋର-ଏରଦେନେ ବାତମୁଖ ଏବଂ ବୁରେନଜାର୍ଗଲ ସାଞ୍ଜାଙ୍କୁ ୩-୦ରେ ପରାସ୍ତ କରି ବିଜୟୀ ଆରମ୍ଭ କରିଛନ୍ତି। ଭାରତୀୟ ଯୋଡ଼ି ୧୧-୫, ୧୧-୪, ୧୨-୧୦ରେ ମୁକାବିଲା ଜିତିଥିଲେ। ଏହାପୂର୍ବରୁ ଦିୟା ଚିତଲେ ଏବଂ ଯଶସ୍ୱିନୀ ଘୋରପଡ଼େ ମହିଳା ଯୁଗଳର ଦ୍ୱିତୀୟ ରାଉଣ୍ଡରେ ଇରାନର ସେତାୟେଶ ଇଲୁଖାନି ଏବଂ ମାଶିଦ ଅଶ୍ତାରୀଙ୍କୁ ୩-୦ରେ ପରାସ୍ତ କରିଥିଲେ। ଭାରତୀୟ ଯୋଡ଼ି ୧୧-୨, ୧୧-୨, ୧୧-୪ରେ ଏକତରଫା ବିଜୟ ହାସଲ କରିଥିଲେ। ଆଥଲେଟିକ୍ସରେ ଜୟ କୁମାର, କିରଣ ପହଲ, ମନୁ ଟିଏସ୍ ଏବଂ ପୂଭମ୍ମା ଏମ୍ଆର୍ଙ୍କୁ ନେଇ ଗଠିତ ଭାରତୀୟ ଦଳ ମିଶ୍ରିତ ୪×୪୦୦ ମିଟର ରିଲେର ଫାଇନାଲରେ ସ୍ଥାନ ପକ୍କା କରିଛି। ଭାରତୀୟ ଦଳ ନିଜ ହିଟ୍ରେ ୩ ମିନିଟ୍ ୧୬.୨୩ ସେକେଣ୍ଡ ସମୟ ସହ ଦ୍ୱିତୀୟ ସ୍ଥାନରେ ରହିଥିଲା। ଚୀନ୍ ୩:୧୫.୯୭ ସେକେଣ୍ଡ ସମୟ ସହ ପ୍ରଥମ ଏବଂ ସଂଯୁକ୍ତ ଆରବ ଏମିରେଟ୍ସ ୩:୧୭.୦୦ ସେକେଣ୍ଡ ସହ ତୃତୀୟ ସ୍ଥାନରେ ରହିଥିଲା।

ସନ୍ତରଣରେ ଆର୍ଯ୍ୟନ ନେହରା ପୁରୁଷ ୮୦୦ ମିଟର ଫ୍ରିଷ୍ଟାଇଲ୍ର ଫାଇନାଲ୍-ବିରେ ୮ ମିନିଟ୍ ୨.୫୨ ସେକେଣ୍ଡ ସମୟ ସହ ତୃତୀୟ ସ୍ଥାନରେ ରହିଥିଲେ। ଏହା ପଦକ ପାଇଁ ହେଉଥିବା ମୁଖ୍ୟ ଫାଇନାଲ୍ ନଥିଲା ଏବଂ ମୁଖ୍ୟ ଫାଇନାଲ୍କୁ ଯୋଗ୍ୟତା ହାସଲ କରିପାରିନଥିବା ସନ୍ତରଣକାରୀମାନେ ଏଥିରେ ଭାଗ ନେଇଥିଲେ।

ପୁରୁଷ ୪×୧୦୦ ମିଟର ଫ୍ରିଷ୍ଟାଇଲ୍ ରିଲେରେ ବେନେଡିକ୍ସନ ବେନିଷ୍ଟନ, ଅନୀଶ ସୁନୀଲ, ଆକାଶ ମଣି ଏବଂ ଗିତେଶ ଶାହଙ୍କୁ ନେଇ ଗଠିତ ଭାରତୀୟ ଦଳ ୩ ମିନିଟ୍ ୨୩.୫୧ ସେକେଣ୍ଡ ସମୟ ସହ ୧୩ଟି ଦଳ ମଧ୍ୟରେ ଦ୍ୱାଦଶ ସ୍ଥାନରେ ରହିଥିଲା। ନିଜ ହିଟ୍ରେ ଭାରତୀୟ ଦଳ ଷଷ୍ଠ ସ୍ଥାନରେ ରହିଥିଲା।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା