ଯମୁନା ଏକ୍ସପ୍ରେସୱେରେ ସ୍ଲିପର ବସରେ ନିଆଁ ଲାଗି ନଅ ଜଣଙ୍କର ମୃତ୍ୟୁ, 30 ଜଣ ଯାତ୍ରୀଙ୍କୁ ଉଦ୍ଧାର କଲା ପୋଲିସ-ଉଦ୍ଧାରକାରୀ ଦଳ
ଲକ୍ଷ୍ନୌ, ୨୪ ସେପ୍ଟେମ୍ବର (ହି.ସ) ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଗ୍ରେଟର ନୋଏଡାର ଯମୁନା ଏକ୍ସପ୍ରେସ୍ୱେରେ ସ୍ଲିପର ବସ୍ରେ ଅଗ୍ନିକାଣ୍ଡ ଘଟଣାର ସଂଜ୍ଞାନ ନେଇ ମୃତକଙ୍କ ପରିବାରକୁ ୨-୨ ଲକ୍ଷ ଟଙ୍କା ଏବଂ ଆହତଙ୍କୁ ୫୦-୫୦ ହଜାର ଟଙ୍କାର ଆର୍ଥିକ ସହାୟତା ଦେବାକୁ ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ଏହି ଦୁର୍ଘଟଣାରେ ଶୋକ ପ୍ରକାଶ କରିବା ସହ ଆହତମାନଙ୍କର ଉପଯୁକ୍ତ ଚିକିତ୍ସା ଏବଂ ସେମାନଙ୍କୁ ସମସ୍ତ ପ୍ରକାର ଚିକିତ୍ସା ସୁବିଧା ଯୋଗାଇ ଦେବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ସେ ମୃତକଙ୍କ ପରିବାର ସଦସ୍ୟଙ୍କ ସହ କଥା ହୋଇ ସହାୟତାର ଆଶ୍ୱାସନ ଦେବା ସହ ଆହତମାନଙ୍କ ଶୀଘ୍ର ଆରୋଗ୍ୟ କାମନା କରିଛନ୍ତି।
ଗ୍ରେଟର ନୋଏଡାର ଜେୱର ଅଞ୍ଚଳରେ ବୁଧବାର ବିଳମ୍ବିତ ରାତିରେ ଦୟାନତପୁର ଗାଁ ନିକଟରେ ଦିଲ୍ଲୀରୁ ମହୋବା ଯାଉଥିବା ଏକ ସ୍ଲିପର ବସ୍ରେ ହଠାତ୍ ନିଆଁ ଲାଗିଯାଇଥିଲା। ନିଆଁ ଏତେ ଦ୍ରୁତ ଗତିରେ ବ୍ୟାପିଥିଲା ଯେ କିଛି ଯାତ୍ରୀ ବସ୍ ଭିତରେ ଫସିଯାଇଥିଲେ। ପୁଲିସ ଓ ଉଦ୍ଧାରକାରୀ ଦଳ ପ୍ରାୟ ୩୦ ଜଣ ଯାତ୍ରୀଙ୍କୁ ସୁରକ୍ଷିତ ଭାବେ ବାହାରକୁ ଉଦ୍ଧାର କରିଥିଲେ। ଏହି ଦୁର୍ଘଟଣାରେ ୯ ଜଣ ଯାତ୍ରୀଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଜଣେ ମହିଳାଙ୍କ ସମେତ ଅନ୍ୟ ଯାତ୍ରୀମାନେ ଅଛନ୍ତି। ଆହତମାନଙ୍କୁ କୈଳାସ ହସ୍ପିଟାଲରେ ଭର୍ତ୍ତି କରାଯାଇଛି।
ଉଲ୍ଲେଖଯୋଗ୍ୟ, ରାଜ କଳ୍ପନା ଟ୍ରାଭେଲ୍ସର ବୋଲି କୁହାଯାଉଥିବା ଏହି ବସ୍ର ନମ୍ବର ବିଆର୍ ୩୨ ପିଏ ୮୬୪୭। ବସ୍ରେ ପ୍ରାୟ ୩୫ ଜଣ ଯାତ୍ରୀ ଥିଲେ। ରାତି ପ୍ରାୟ ୧୨ଟା ସମୟରେ ନିଆଁ ଲାଗିବା ମାତ୍ରେ ବସ୍ ଭିତରେ ଧୂଆଁ ଭରିଯିବା ସହ ଉଚ୍ଚ ଅଗ୍ନିଶିଖା ଦେଖାଯାଇଥିଲା। ଚାଳକ ବସ୍କୁ ଏକ୍ସପ୍ରେସ୍ୱେ କଡ଼ରେ ଅଟକାଇଥିଲେ। ଏହାପରେ ଅନେକ ଯାତ୍ରୀ ଝରକା ଓ ଜରୁରୀକାଳୀନ ନିର୍ଗମ ପଥ ଦେଇ ବାହାରକୁ ଆସି ନିଜ ଜୀବନ ବଞ୍ଚାଇଥିଲେ। ତେବେ କିଛି ଯାତ୍ରୀ ନିଆଁରେ ଫସିଯାଇଥିଲେ।
ଘଟଣାର ସୂଚନା ପାଇବା ମାତ୍ରେ ପୁଲିସ, ଅଗ୍ନିଶମ ବିଭାଗ ଏବଂ ଯମୁନା ଏକ୍ସପ୍ରେସ୍ୱେର ଘରୋଇ ସୁରକ୍ଷା ଟିମ୍ ଘଟଣାସ୍ଥଳରେ ପହଞ୍ଚିଥିଲେ। ଉଦ୍ଧାରକାରୀ ଦଳ ନିଆଁକୁ ଆୟତ୍ତ କରିବା ପରେ ବସ୍ରେ ତଲାସୀ କରି ଭିତରେ ଫସିଥିବା ଯାତ୍ରୀମାନଙ୍କୁ ବାହାରକୁ ଆଣିଥିଲେ। ଆହତମାନଙ୍କୁ ତୁରନ୍ତ ହସ୍ପିଟାଲ ପଠାଯାଇଥିଲା।
ଦୁର୍ଘଟଣା ଯୋଗୁଁ ଜେୱର ଟୋଲ୍ ଏବଂ ଫଲୈଦା କଟ୍ ନିକଟରେ ଅଧଘଣ୍ଟାରୁ ଅଧିକ ସମୟ ଧରି ଯାତାୟାତ ବନ୍ଦ ରହିଥିଲା। ରାହତ ଓ ଉଦ୍ଧାର କାର୍ଯ୍ୟ ଶେଷ ହେବା ପରେ ଏକ୍ସପ୍ରେସ୍ୱେରେ ପୁଣି ଯାତାୟାତ ସ୍ୱାଭାବିକ କରାଯାଇଥିଲା।
--------
ହିନ୍ଦୁସ୍ଥାନ ସମାଚାର / ସ୍ୱାଗତିକା
