ନୂଆଦିଲ୍ଲୀ, ୩୦ ସେପ୍ଟେମ୍ବର (ହି.ସ.)। ଦିଲ୍ଲୀ ଦଙ୍ଗା ଷଡ଼ଯନ୍ତ୍ର ମାମଲାରେ ଅଭିଯୁକ୍ତ ଉମର ଖାଲିଦ ଓ ଶର୍ଜିଲ ଇମାମଙ୍କ ଜାମିନ ଆବେଦନକୁ ଦିଲ୍ଲୀ ହାଇକୋର୍ଟ ଖାରଜ କରିଦେଇଛନ୍ତି। ଜଷ୍ଟିସ ପ୍ରତିଭା ସିଂହଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଛନ୍ତି ଯେ, ହାଇକୋର୍ଟ ସୁପ୍ରିମକୋର୍ଟଙ୍କ ଆଦେଶରେ ବନ୍ଧା ଏବଂ ନ୍ୟାୟିକ ଅନୁଶାସନର ପାଳନ ଆବଶ୍ୟକ।

ଏହା ପୂର୍ବରୁ ଜୁଲାଇ ୪ ତାରିଖରେ କଡ଼କଡ଼ଡୁମା କୋର୍ଟ ମଧ୍ୟ ଉମର ଖାଲିଦ ଓ ଶର୍ଜିଲ ଇମାମଙ୍କ ଜାମିନ ଆବେଦନ ଖାରଜ କରିଥିଲେ। ଅତିରିକ୍ତ ସେସନ୍ସ ଜଜ୍ ସମୀର ବାଜପେୟୀ କହିଥିଲେ ଯେ, ସେ ସୁପ୍ରିମକୋର୍ଟଙ୍କ ଜାନୁଆରୀ ୫ ତାରିଖର ଆଦେଶ ପାଳନ କରିବାକୁ ବାଧ୍ୟ। କଡ଼କଡ଼ଡୁମା କୋର୍ଟ କହିଥିଲେ ଯେ, ଉମର ଖାଲିଦ ଓ ଶର୍ଜିଲ ଇମାମଙ୍କ ଜାମିନ ଆବେଦନ ଟ୍ରାଏଲ କୋର୍ଟରେ ମଧ୍ୟ ବିଚାରଯୋଗ୍ୟ ନୁହେଁ।

ଶୁଣାଣି ସମୟରେ ଉମର ଖାଲିଦଙ୍କ ପକ୍ଷରୁ ଉପସ୍ଥିତ ଆଇନଜୀବୀ ତ୍ରିଦୀପ ପେସ୍ କହିଥିଲେ ଯେ, ଅନ୍ଦ୍ରାବିଙ୍କ ମାମଲାରେ ଉମର ଖାଲିଦ ଓ ଶର୍ଜିଲ ଇମାମଙ୍କ ଜାମିନ ଆବେଦନ ଖାରଜ କରାଯିବା ନେଇ ସୁପ୍ରିମକୋର୍ଟ ପ୍ରଶ୍ନ ଉଠାଇଥିଲେ। ସେ କହିଥିଲେ ଯେ, ସାକ୍ଷୀମାନଙ୍କ ବୟାନ ରେକର୍ଡ ନହେଲେ ଏକ ବର୍ଷ ପରେ ଜାମିନ ଆବେଦନ କରାଯାଇପାରିବ ବୋଲି ସୁପ୍ରିମକୋର୍ଟ ଦେଇଥିବା ଆଦେଶ ଏବେ ପ୍ରଯୁଜ୍ୟ ନୁହେଁ।

ଜାନୁଆରୀ ୫ ତାରିଖରେ ସୁପ୍ରିମକୋର୍ଟ ଉମର ଖାଲିଦ ଓ ଶର୍ଜିଲ ଇମାମଙ୍କ ଜାମିନ ଆବେଦନ ଖାରଜ କରିଥିଲେ। ସେହି ଦିନ ସୁପ୍ରିମକୋର୍ଟ ଯେଉଁ ପାଞ୍ଚ ଜଣ ଅଭିଯୁକ୍ତଙ୍କୁ ଜାମିନ ଦେଇଥିଲେ, ସେମାନଙ୍କ ମଧ୍ୟରେ ଗୁଲଫିଶା ଫାତିମା, ମୀରାନ ହାଇଦର, ଶିଫା ଉର ରହମାନ, ଶାଦାବ ଅହମ୍ମଦ ଓ ମହମ୍ମଦ ସଲିମ ଖାନ ସାମିଲ ଅଛନ୍ତି। ଏହାପରେ ମେ ୨୨ ତାରିଖରେ ସୁପ୍ରିମକୋର୍ଟ ଏହି ମାମଲାର ଅଭିଯୁକ୍ତ ଖାଲିଦ ସୈଫି ଓ ତସଲିମ ଅହମ୍ମଦଙ୍କୁ ଛଅ ମାସ ପାଇଁ ଅନ୍ତରୀଣ ଜାମିନ ପ୍ରଦାନ କରିଥିଲେ। ଏହି ମାମଲାର ଆଉ ଚାରିଜଣ ଅଭିଯୁକ୍ତ ପୂର୍ବରୁ ହିଁ ଜାମିନ ପାଇସାରିଛନ୍ତି। ସେମାନଙ୍କ ମଧ୍ୟରେ ସଫୁରା ଜରଗର, ଆସିଫ ଇକବାଲ ତାନ୍ହା, ଦେବାଙ୍ଗନା କଲିତା ଓ ନତାଶା ନରୱାଲ ସାମିଲ ଅଛନ୍ତି।

ଏହି ମାମଲାରେ ୧୮ ଜଣ ଅଭିଯୁକ୍ତଙ୍କ ବିରୋଧରେ ୟୁଏପିଏ ଅଧୀନରେ ରୁଜୁ ମାମଲାରେ ଚାର୍ଜସିଟ୍ ଦାଖଲ କରାଯାଇଛି। ଅଭିଯୁକ୍ତମାନଙ୍କ ମଧ୍ୟରେ ସଫୁରା ଜରଗର, ତାହିର ହୁସେନ, ଉମର ଖାଲିଦ, ଖାଲିଦ ସୈଫି, ଇଶରତ ଜାହାନ, ମୀରାନ ହାଇଦର, ଗୁଲଫିଶା, ଶିଫା ଉର ରହମାନ, ଆସିଫ ଇକବାଲ ତାନ୍ହା, ଶାଦାବ ଅହମ୍ମଦ, ତସଲିମ ଅହମ୍ମଦ, ସଲିମ ମଲିକ, ମହମ୍ମଦ ସଲିମ ଖାନ, ଅତହର ଖାନ, ଶର୍ଜିଲ ଇମାମ, ଫୈଜାନ ଖାନ, ନତାଶା ନରୱାଲ ଓ ଦେବାଙ୍ଗନା କଲିତା ସାମିଲ ଅଛନ୍ତି।

ହିନ୍ଦୁସ୍ଥାନ ସମାଚାର / ସମନ୍ୱୟ