ନୂଆଦିଲ୍ଲୀ, ୩୦ ସେପ୍େଟମ୍ବର (ହି.ସ.)- ସ୍ୱତନ୍ତ୍ର ଗଭୀର ପୁନରୀକ୍ଷଣ (ଏସଆଇଆର) ପ୍ରକ୍ରିୟା ଏବଂ ନିର୍ବାଚନ ଆୟୋଗର କାର୍ଯ୍ୟପ୍ରଣାଳୀକୁ ନେଇ ବିରୋଧୀ ଦଳଗୁଡ଼ିକର ଇଣ୍ଡି ମେଂଟର ବୈଠକ ବୁଧବାର ଏଠାରେ କନ୍ଷ୍ଟିଟ୍ୟୁସନ କ୍ଲବରେ ଆରମ୍ଭ ହୋଇଛି। ବୈଠକରେ ଏସଆଇଆର ଅଧୀନରେ ଭୋଟର ତାଲିକାରୁ ନାମ ହଟାଯିବାର ଅଭିଯୋଗ, ନିର୍ବାଚନ ଆୟୋଗ ମଧ୍ୟରେ କଥିତ ମତଭେଦ ଏବଂ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କୁ ହଟାଇବା ଦାବି ସମେତ ବିଭିନ୍ନ ମୁଦ୍ଦା ଉପରେ ବିରୋଧୀଙ୍କ ମିଳିତ ରଣନୀତି ନେଇ ଆଲୋଚନା ହେବାର ସମ୍ଭାବନା ରହିଛି।

ବୈଠକରେ ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ, ତୃଣମୂଳ କଂଗ୍ରେସ ପ୍ରମୁଖ ମମତା ବାନାର୍ଜୀ, ରାଷ୍ଟ୍ରୀୟ ଜନତା ଦଳର ନେତା ତେଜସ୍ୱୀ ଯାଦବ, ଜମ୍ମୁ-କଶ୍ମୀରର ମୁଖ୍ୟମନ୍ତ୍ରୀ ଓମର ଅବଦୁଲ୍ଲା ଏବଂ ଭାକପା (ମାଲେ)ର ମହାସଚିବ ଦୀପଙ୍କର ଭଟ୍ଟାଚାର୍ଯ୍ୟଙ୍କ ସମେତ ଅନେକ ବିରୋଧୀ ନେତା ପହଂଚିଛନ୍ତି। ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ବୈଠକରେ ସାମିଲ ହୋଇନାହାନ୍ତି ଏବଂ ତାଙ୍କ ସ୍ଥାନରେ ପାର୍ଟିର ଅନ୍ୟ ନେତାମାନେ ପ୍ରତିନିଧିତ୍ୱ କରୁଛନ୍ତି।

କଂଗ୍ରେସ ସାଂସଦ ଜୟରାମ ରମେଶ ସୋସିଆଲ ମିଡିଆ ମଂଚ‘ଏକ୍ସ’ରେ କହିଛନ୍ତି ଯେ ବୈଠକରେ କଂଗ୍ରେସ, ସମାଜବାଦୀ ପାର୍ଟି, ତୃଣମୂଳ କଂଗ୍ରେସ, ରାଷ୍ଟ୍ରବାଦୀ କଂଗ୍ରେସ ପାର୍ଟି (ଶରଦ ପୱାର ଗୋଷ୍ଠୀ), ଶିବସେନା (ଉଦ୍ଧବ ଠାକରେ ଗୋଷ୍ଠୀ), ରାଷ୍ଟ୍ରୀୟ ଜନତା ଦଳ, ମାକପା, ଭାକପା, ଜମ୍ମୁ-କଶ୍ମୀର ନ୍ୟାସନାଲ କନଫରେନ୍ସ, ପିଡିପି, ଝାଡ଼ଖଣ୍ଡ ମୁକ୍ତି ମୋର୍ଚ୍ଚା, ଭାକପା (ମାଲେ), ଇଣ୍ଡିଆନ ୟୁନିଅନ ମୁସଲିମ ଲିଗ, କେରଳ କଂଗ୍ରେସ (ଏମ), ଏମଡିଏମକେ, ଭିସିକେ, ଆରଏସପି, କେରଳ କଂଗ୍ରେସ (ଜେ) ଏବଂ ଅଖିଳ ଭାରତୀୟ ଫରୱାର୍ଡ ବ୍ଲକ ସମେତ ଅନେକ ଦଳର ପ୍ରତିନିଧି ସାମିଲ ଅଛନ୍ତି।

ସୂତ୍ର ଅନୁଯାୟୀ, ବୈଠକରେ ମୁଖ୍ୟ ନିର୍ବାଚନ ଆୟୁକ୍ତଙ୍କୁ ହଟାଇବା ପାଇଁ ଲୋକସଭା ଏବଂ ରାଜ୍ୟସଭାରେ ପ୍ରସ୍ତାବ ଆଣିବାର ଖସଡ଼ା ଉପରେ ମଧ୍ୟ ଆଲୋଚନା ହୋଇପାରେ। ଏହା ବ୍ୟତୀତ ଏସଆଇଆର ପ୍ରକ୍ରିୟା ଏବଂ ନିର୍ବାଚନ ଆୟୋଗ ମଧ୍ୟରେ କଥିତ ଅସହମତି ସହ ଜଡ଼ିତ ରିପୋର୍ଟ ଆଧାରରେ ଆଗାମୀ ରାଜନୈତିକ ଏବଂ ସଂସଦୀୟ ରଣନୀତି ଉପରେ ବିଚାର କରାଯାଇପାରେ।

--------------------------

---------------

ହିନ୍ଦୁସ୍ଥାନ ସମାଚାର / ଗଗନ