ରତ୍ନାଗିରି, ୦୪ ସେପ୍େଟମ୍ବର (ହି.ସ.)- ମହାରାଷ୍ଟ୍ରର ରତ୍ନାଗିରି ଏବଂ ସାତାରା ଜିଲ୍ଲାକୁ ଯୋଡ଼ୁଥିବା ଖେଡ ତାଲୁକାସ୍ଥିତ ରଘୁବୀର ଘାଟରେ ଗୁରୁବାର ରାତିରେ ପୁଣି ଥରେ ବଡ଼ ପଥର ଖସିବାରୁ ଯାତାୟାତ ସମ୍ପୂର୍ଣ୍ଣ ଠପ୍ ହୋଇଯାଇଛି। ପାହାଡ଼ ଢାଲରୁ ମାଟି, ପଥର ଏବଂ ବଡ଼ ବଡ଼ ଚଟାଣ ରାସ୍ତା ଉପରକୁ ଆସିଯିବାରୁ ଉଭୟ ପଟୁ ଯାନବାହନ ଚଳାଚଳ ବନ୍ଦ ହୋଇଯାଇଛି। ଘାଟ ଦେଇ ଯାତ୍ରା କରୁଥିବା ନାଗରିକମାନେ ଭାରୀ ଅସୁବିଧାର ସମ୍ମୁଖୀନ ହେଉଛନ୍ତି। ଭୂସ୍ଖଳନ ଯୋଗୁଁ ସାତାରା ଜିଲ୍ଲାର ଘାଟମାଥା ସଂଲଗ୍ନ ପ୍ରାୟ ୧୫ ରୁ ୨୦ଟି ଗାଁର ରତ୍ନାଗିରି ଜିଲ୍ଲା ସହ ଯୋଗାଯୋଗ ପ୍ରଭାବିତ ହୋଇଛି।
ରଘୁବୀର ଘାଟ ସାତାରା ଏବଂ ରତ୍ନାଗିରି ଜିଲ୍ଲାକୁ ଯୋଡ଼ୁଥିବା ଏକ ଗୁରୁତ୍ୱପୂର୍ଣ୍ଣ ମାର୍ଗ। ଘାଟିର ଉପରି ଅଂଚଳର ଅନେକ ଗାଁର ନାଗରିକମାନେ ଶିକ୍ଷା, ସ୍ୱାସ୍ଥ୍ୟ, ବଜାର ଏବଂ ଅନ୍ୟାନ୍ୟ ଆବଶ୍ୟକ କାର୍ଯ୍ୟ ପାଇଁ ଖେଡ ସହରକୁ ଯାତାୟାତ କରନ୍ତି। ତେବେ, ମାର୍ଗରେ ଯାତାୟାତ ବନ୍ଦ ହେବାରୁ ଏହି ଗାଁଗୁଡ଼ିକର ଦୈନିକ ପରିବହନ ବ୍ୟବସ୍ଥା ଗୁରୁତର ଭାବେ ପ୍ରଭାବିତ ହୋଇଛି। ଏହାର ପ୍ରଭାବ ସ୍କୁଲ ଏବଂ କଲେଜ ଯାଉଥିବା ଛାତ୍ରଛାତ୍ରୀଙ୍କ ଉପରେ ମଧ୍ୟ ପଡ଼ିଛି। ପଥର ଖସିଥିବା ସ୍ଥାନରେ ରାଜ୍ୟ ପରିବହନ ମଣ୍ଡଳର ବସ୍ ସକାଳୁ ହିଁ ଫସି ରହିଛି। ବସ୍ରେ ସ୍କୁଲ ଛାତ୍ରଛାତ୍ରୀ, ମହିଳା ଏବଂ ଅନ୍ୟ ଯାତ୍ରୀମାନେ ଥିବାରୁ ସେମାନଙ୍କୁ ଘାଟିରେ ହିଁ ରହିବାକୁ ପଡ଼ିଛି। ରାସ୍ତା ସମ୍ପୂର୍ଣ୍ଣ ବନ୍ଦ ଥିବାରୁ ବସ୍କୁ ଆଗକୁ କିମ୍ବା ପଛକୁ ନେବା ମଧ୍ୟ ସମ୍ଭବ ହେଉନାହିଁ। ଖେଡରେ ସ୍କୁଲ, କଲେଜ ଏବଂ ଅନ୍ୟ ଜରୁରୀ କାମ ପାଇଁ ବାହାରିଥିବା ଅନେକ ନାଗରିକ ମଧ୍ୟ ପଥର ଖସିଥିବା ସ୍ଥାନରେ ଫସି ରହିଛନ୍ତି।
------------------------
---------------
ହିନ୍ଦୁସ୍ଥାନ ସମାଚାର / ଗଗନ