କୋଲକାତା, ୦୬ ସେପ୍ଟେମ୍ବର (ହି.ସ.)। ନେପାଳରେ ହୋଇବା ବନ୍ୟା ପରେ ନିଖୋଜ ଥିବା

ପୂର୍ବତନ ରେଳମନ୍ତ୍ରୀ ମୁକୁଲ ରାୟଙ୍କ ବୋହୂ ଶର୍ମିଷ୍ଠା ରାୟ ଭୌମିକଙ୍କର ୧୧ ଦିନ ପରେ ମଧ୍ୟ କୌଣସି

ସୁରାକ ମିଳିନାହିଁ। ସମୟ ଗଡ଼ିବା ସହ ପରିବାରର ଚିନ୍ତା ବଢ଼ିବାରେ ଲାଗିଛି ଏବଂ ଏବେ ସେ

ସୁରକ୍ଷିତ ଭାବେ ଫେରିବା ଆଶା ମଧ୍ୟ ଧୀରେ ଧୀରେ କ୍ଷୀଣ ହେବାରେ ଲାଗିଛି। କାଞ୍ଚରାପାଡ଼ାସ୍ଥିତ

ରାୟ ପରିବାରର ଘରେ ପ୍ରତିଦିନ ଗୋଟିଏ ପ୍ରଶ୍ନ ହିଁ ଘୁରିବୁଲୁଛି— ଶର୍ମିଷ୍ଠା କେବେ ଫେରିବେ?

ଶର୍ମିଷ୍ଠା ଅଗଷ୍ଟ ୨୧ ତାରିଖରେ ୩୨ ଜଣିଆ ଏକ ଦଳ ସହ ନେପାଳ

ବୁଲିବାକୁ ଯାଇଥିଲେ। ସେଠାରେ ପହଞ୍ଚିବା ପରେ ସେ ନିୟମିତ ଭାବେ ସ୍ୱାମୀ, ପିଲା ଏବଂ ମାଆଙ୍କ

ସହ ଫୋନ୍ ଓ ଭିଡିଓ କଲ୍ ମାଧ୍ୟମରେ ଯୋଗାଯୋଗରେ ଥିଲେ। ପରିବାରର କହିବା ଅନୁଯାୟୀ, ବନ୍ୟା ପରେ ହଠାତ୍

ତାଙ୍କ ସହ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଏହା ପରଠାରୁ ତାଙ୍କୁ ନିରନ୍ତର ଖୋଜାଖୋଜି

କରାଯାଉଛି, କିନ୍ତୁ

ଏପର୍ଯ୍ୟନ୍ତ କୌଣସି ଠୋସ୍ ସୂଚନା ମିଳିନାହିଁ।

ଶର୍ମିଷ୍ଠାଙ୍କ ୧୦ ବର୍ଷର ପୁଅ ଏବେ ମଧ୍ୟ ମାଆ ଫେରିବା ବାଟକୁ ଚାହିଁ

ରହିଛି। ସେ ବାରମ୍ବାର ବାପା ଓ ବଡ଼ ଭଉଣୀଙ୍କୁ ପଚାରୁଛି— ମାଆଙ୍କ ବିଷୟରେ କିଛି ଖବର ମିଳିଛି

କି? ୧୬ ବର୍ଷୀୟା ଝିଅ

ନିଜକୁ ସମ୍ଭାଳିବା ସହ ସାନ ଭାଇକୁ ମଧ୍ୟ ସମ୍ଭାଳୁଛନ୍ତି। କିନ୍ତୁ ମାଆଙ୍କ ବିଷୟରେ ପଚରାଗଲେ ସେ

ମଧ୍ୟ ଭାବପ୍ରବଣ ହୋଇପଡ଼ୁଛନ୍ତି।

ମାଆ ନିଖୋଜ ହେବା ପରେ ଏବେ ଦୁଇ ପିଲାଙ୍କ ଦାୟିତ୍ୱ ଶୁଭ୍ରାଂଶୁ ରାୟ

ଏବଂ ଶର୍ମିଷ୍ଠାଙ୍କ ମାଆ ସମ୍ଭାଳୁଛନ୍ତି। ଝିଅ ନିଖୋଜ ହେବା ଖବର ପାଇବା ପରେ ଶର୍ମିଷ୍ଠାଙ୍କ

ବୃଦ୍ଧା ମାଆ ମଧ୍ୟ ବେଲଘରିଆସ୍ଥିତ ନିଜ ଘର ଛାଡ଼ି କାଞ୍ଚରାପାଡ଼ା ଆସିଛନ୍ତି। ପରିବାରର ନିକଟତମ

ଲୋକମାନେ ମଧ୍ୟ ପିଲାମାନଙ୍କ ଯତ୍ନ ନେବାରେ ଲାଗିଛନ୍ତି।

ରାଜନୈତିକ ପରିବାରର ଅଂଶ ହୋଇଥିଲେ ମଧ୍ୟ ଶର୍ମିଷ୍ଠା ନିଜେ ରାଜନୀତିର

ଚାକଚକ୍ୟଠାରୁ ଦୂରରେ ରହିବାକୁ ପସନ୍ଦ କରୁଥିଲେ। ପରିବାର, ପିଲାମାନେ ଓ ନିଜ କାର୍ଯ୍ୟକ୍ଷେତ୍ରରେ ହିଁ ତାଙ୍କର

ଅଧିକାଂଶ ସମୟ ବିତୁଥିଲା। ଦୁଇ ପିଲାଙ୍କ ପାଠପଢ଼ା, ସ୍କୁଲ୍ ଓ ଅନ୍ୟାନ୍ୟ କାର୍ଯ୍ୟକଳାପର ଦାୟିତ୍ୱ ସେ ନିଜେ

ସମ୍ଭାଳୁଥିଲେ। ପରିବାରର ଘରୋଇ ସ୍କୁଲ୍, ପଲିକ୍ଲିନିକ୍ ଏବଂ ଚକ୍ଷୁ ପରୀକ୍ଷା କେନ୍ଦ୍ର ସହ ଜଡ଼ିତ କାର୍ଯ୍ୟରେ

ମଧ୍ୟ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଥିଲା।

ମୁକୁଲ ରାୟଙ୍କ ପୁଅ ଶୁଭ୍ରାଂଶୁ ରାୟ ଏବଂ ଶର୍ମିଷ୍ଠାଙ୍କ ସହ

କଲ୍ୟାଣୀର ଏକ ଘରୋଇ ଇଞ୍ଜିନିୟରିଂ କଲେଜରେ ପଢ଼ିବା ସମୟରେ ପରିଚୟ ହୋଇଥିଲା। ବନ୍ଧୁତ୍ୱ ପରେ

ପ୍ରେମରେ ପରିଣତ ହୋଇଥିଲା ଏବଂ ପ୍ରାୟ ୨୦୦୯ ମସିହାରେ ଦୁହେଁ ବିବାହ କରିଥିଲେ। ସେମାନଙ୍କର

ଦୁଇଟି ପିଲା ଅଛନ୍ତି, ଯେଉଁମାନେ

ବାଣ୍ଡେଲର ଏକ ଘରୋଇ ଇଂରାଜୀ ମାଧ୍ୟମ ସ୍କୁଲ୍ରେ ପଢ଼ୁଛନ୍ତି।

ଶର୍ମିଷ୍ଠାଙ୍କର ଭ୍ରମଣ ପ୍ରତି ମଧ୍ୟ ବେଶ୍ ଆଗ୍ରହ ଥିଲା। ପ୍ରାୟ

ଦେଢ଼ ବର୍ଷ ପୂର୍ବେ ସେ ଦୁଇ ପିଲାଙ୍କ ସହ ଲଦାଖ ବୁଲିବାକୁ ଯାଇଥିଲେ। ନେପାଳ ଯାତ୍ରା ପରେ ମଧ୍ୟ

ସେ ପିଲାମାନଙ୍କ ସହ ବିଦେଶ ଯିବାର ଯୋଜନା କରିଥିଲେ। କିନ୍ତୁ ନେପାଳରୁ ଫେରିବା ପୂର୍ବରୁ ହିଁ

ପରିବାର ସହ ତାଙ୍କର ଯୋଗାଯୋଗ ବିଚ୍ଛିନ୍ନ ହୋଇଗଲା।

ଏବେ ୧୧ ଦିନ ବିତିଗଲାଣି। ଘରେ ଦୈନନ୍ଦିନ କାର୍ଯ୍ୟକଳାପ ଚାଲିଥିଲେ

ମଧ୍ୟ ଶର୍ମିଷ୍ଠାଙ୍କ ଅନୁପସ୍ଥିତି ପ୍ରତି ମୁହୂର୍ତ୍ତରେ ଅନୁଭବ ହେଉଛି। ପିଲାମାନଙ୍କ ଆଖି ମାଆ

ଫେରିବା ବାଟକୁ ଚାହିଁ ରହିଛି ଏବଂ ପରିବାର ଏବେ ମଧ୍ୟ କୌଣସି ଭଲ ଖବର ଆଶାରେ ରହିଛି। କିନ୍ତୁ

ସମୟ ଗଡ଼ିବା ସହ ସେହି ଆଶା ଉପରେ ମଧ୍ୟ ଚିନ୍ତାର ଛାୟା ଅଧିକ ଗଭୀର ହେବାରେ ଲାଗିଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା