ଜୟପୁର, 06 ସେପ୍ଟେମ୍ବର (ହି.ସ.) ଭାରତର ପୂର୍ବତନ ରାଷ୍ଟ୍ରପତି, ବିଶିଷ୍ଟ ଦାର୍ଶନିକ ଓ ଶିକ୍ଷାବିତ୍ ଡ଼. ସର୍ବପଲ୍ଲୀ ରାଧାକୃଷ୍ଣନଙ୍କ ଜନ୍ମଦିନ ଅବସରରେ ବିକ୍ରମ ଦେବ ଉଚ୍ଚ ମାଧ୍ୟମିକ ବିଦ୍ୟାଳୟରେ ଶିକ୍ଷକ ଦିବସ ଶ୍ରଦ୍ଧା ଓ ଉତ୍ସାହର ସହ ପାଳିତ ହୋଇଥିଲା।
ଏହି ଅବସରରେ ବିକ୍ରମ ଦେବ ବିଶ୍ୱବିଦ୍ୟାଳୟର କୁଳପତି ପ୍ରଫେସର ହୃଷୀକେଶ ସେନାପତି, କୁଳସଚିବ ଶ୍ରୀ ମହେଶ୍ୱର ଚନ୍ଦ୍ର ନାୟକ ଏବଂ ବିଦ୍ୟାଳୟର ଅଧ୍ୟକ୍ଷ କ୍ୟାପ୍ଟେନ୍ ଡ଼. ଲକ୍ଷ୍ମଣ ପାତ୍ର ଉପସ୍ଥିତ ଥିଲେ। ସେମାନେ ଶିକ୍ଷକ ଦିବସର ମହତ୍ତ୍ୱ ଏବଂ ଛାତ୍ରଛାତ୍ରୀଙ୍କ ଜୀବନ ଗଠନରେ ଶିକ୍ଷକଙ୍କ ଭୂମିକା ଉପରେ ନିଜର ମତ ପ୍ରକାଶ କରିଥିଲେ।
କାର୍ଯ୍ୟକ୍ରମରେ ବିଦ୍ୟାଳୟର ଶିକ୍ଷକ-ଶିକ୍ଷୟିତ୍ରୀ, କର୍ମଚାରୀ ଓ ଛାତ୍ରଛାତ୍ରୀମାନେ ସକ୍ରିୟ ଭାବେ ଯୋଗଦେଇଥିଲେ। ଛାତ୍ରଛାତ୍ରୀ ଓ କର୍ମଚାରୀମାନେ ଶିକ୍ଷାର ମହତ୍ତ୍ୱ, ଗୁରୁ-ଶିଷ୍ୟ ସମ୍ପର୍କ ଏବଂ ଜୀବନରେ ଶିକ୍ଷକଙ୍କ ଅବଦାନ ସମ୍ପର୍କରେ ନିଜ ନିଜର ମତାମତ ରଖିଥିଲେ।
ବକ୍ତାମାନେ କହିଥିଲେ ଯେ ଶିକ୍ଷକ କେବଳ ଜ୍ଞାନ ପ୍ରଦାନ କରନ୍ତି ନାହିଁ, ବରଂ ଛାତ୍ରଛାତ୍ରୀଙ୍କ ଚରିତ୍ର ଗଠନ ଓ ଭବିଷ୍ୟତ ନିର୍ମାଣରେ ମଧ୍ୟ ମାର୍ଗଦର୍ଶକ ଭୂମିକା ନିର୍ବାହ କରନ୍ତି। ଡ଼. ରାଧାକୃଷ୍ଣନଙ୍କ ଆଦର୍ଶ ଓ ଶିକ୍ଷାଦର୍ଶନରୁ ପ୍ରେରଣା ନେଇ ଜ୍ଞାନ ସହିତ ନୈତିକତା ଓ ମାନବିକ ମୂଲ୍ୟବୋଧକୁ ଗୁରୁତ୍ୱ ଦେବାକୁ ଆହ୍ୱାନ ଦିଆଯାଇଥିଲା।
ବିଶେଷ ଉଲ୍ଲେଖଯୋଗ୍ୟ ଯେ, ସମଗ୍ର କାର୍ଯ୍ୟକ୍ରମଟି ଉଚ୍ଚ ମାଧ୍ୟମିକ ବିଦ୍ୟାଳୟର ଛାତ୍ରଛାତ୍ରୀମାନେ ସମନ୍ୱୟ କରିଥିଲେ। ସେମାନଙ୍କର ଉତ୍ସାହ ଓ ଶୃଙ୍ଖଳିତ ପରିଚାଳନା ଯୋଗୁଁ ଆୟୋଜନଟି ସଫଳ ଓ ସ୍ମରଣୀୟ ହୋଇଥିଲା।
ଶେଷରେ ଉପସ୍ଥିତ ଅତିଥି, ଅଧ୍ୟକ୍ଷ, ଶିକ୍ଷକ-ଶିକ୍ଷୟିତ୍ରୀ, କର୍ମଚାରୀ ଓ ଛାତ୍ରଛାତ୍ରୀଙ୍କୁ କୃତଜ୍ଞତା ଜଣାଇ କାର୍ଯ୍ୟକ୍ରମର ସମାପନ କରାଯାଇଥିଲା।
ଏହି ଆୟୋଜନ ଶିକ୍ଷକଙ୍କ ପ୍ରତି ସମ୍ମାନ ପ୍ରକାଶ ସହିତ ଛାତ୍ରଛାତ୍ରୀଙ୍କ ମନରେ ଶିକ୍ଷା, ଶୃଙ୍ଖଳା ଓ ମୂଲ୍ୟବୋଧ ପ୍ରତି ନୂତନ ପ୍ରେରଣା ସୃଷ୍ଟି କରିଥିଲା।
---------------
ହିନ୍ଦୁସ୍ଥାନ ସମାଚାର / ପିକେପି
06 Sep 2026
