ହାଇଦ୍ରାବାଦ, ସେପ୍େଟମ୍ବର ୮ (ହି.ସ.) - ତେଲେଙ୍ଗାନା ବିଧାନସଭା ଅଧିବେଶନ ସମୟରେ ଚାଲିଥିବା ରାଜନୈତିକ କାର୍ଯ୍ୟକଳାପ ମଧ୍ୟରେ ପୋଲିସ ମଙ୍ଗଳବାର ଭାରତ ରାଷ୍ଟ୍ର ସମିତି (ବି. ଆର.ଏସ୍.) ନେତା ଏବଂ କାର୍ଯ୍ୟକର୍ତାଙ୍କ ବିରୋଧରେ ରାଜ୍ୟବ୍ୟାପୀ କାର୍ଯ୍ୟାନୁଷ୍ଠାନ ଆରମ୍ଭ କରିଛି। ଅନେକ ବିରୋଧୀ ନେତାଙ୍କୁ ଗୃହବନ୍ଦୀ କରାଯାଇଛି କିମ୍ବା ପ୍ରତିଷେଧକ ଅଟକ ରଖାଯାଇଛି। ବି. ଆର.ଏସ୍. ମୁଖ୍ୟ ତଥା ବିରୋଧୀ ଦଳ ନେତା କେ. ଚନ୍ଦ୍ରଶେଖର ରାଓଙ୍କ ଏରାବଲ୍ଲୀସ୍ଥିତ ଫାର୍ମହାଉସ୍ ଚାରିପଟେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଥିଲା।

ସୋମବାର ବିଧାନସଭା ଫାଟକରେ ବି. ଆର.ଏସ୍. ବିଧାୟକ ଏବଂ ପୋଲିସ କର୍ମଚାରୀଙ୍କ ମଧ୍ୟରେ ସଂଘର୍ଷ ପରେ ରାଜନୈତିକ ଗଣ୍ଡଗୋଳ ମଧ୍ୟରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହି ଘଟଣାରେ ପୋଲିସ ପାଂଚଟି ମାମଲା ରୁଜୁ କରିଛି। ବାଚସ୍ପତି ଗଦ୍ଦାମ ପ୍ରସାଦ କୁମାରଙ୍କ ବିରୋଧରେ ମନ୍ତବ୍ୟ ଦେଇଥିବା ଅଭିଯୋଗରେ ଏମ୍. ଏଲ୍. ସି. ଟାଟା ମଧୁ ଏବଂ ବି. ନବୀନ କୁମାର ରେଡ୍ଡୀଙ୍କ ବିରୋଧରେ ଏସ୍. ସି./ଏସ୍. ଟି. ଅତ୍ୟାଚାର ନିବାରଣ ଆଇନ ଏବଂ ଅନ୍ୟାନ୍ୟ ଧାରାରେ ମାମଲା ରୁଜୁ କରାଯାଇଛି। କେ. ଟି. ରାମା ରାଓ, ଟି. ହରିଶ ରାଓ, ଜି. ଜଗଦୀଶ ରେଡ୍ଡୀ, ପାଦି କୌଶିକ ରେଡ୍ଡୀ, ଗାଙ୍ଗୁଲା କମଲାକର, ଭି. ସୁନୀତା ଲକ୍ଷ୍ମୀ ରେଡ୍ଡୀ, ପି. ସବିତା ଇନ୍ଦ୍ର ରେଡ୍ଡୀଙ୍କ ସମେତ ଅନ୍ୟ କେତେକ ବି. ଆର. ଏସ୍. ନେତାଙ୍କ ବିରୋଧରେ ପୋଲିସ ଉପରେ ଆକ୍ରମଣ ଏବଂ ଦୁର୍ବ୍ୟବହାର ଅଭିଯୋଗରେ ମାମଲା ରୁଜୁ କରାଯାଇଛି।

ଏହି ସମୟରେ ଶାସକ କଂଗ୍ରେସ ବିକ୍ଷୋଭ ଘୋଷଣା କରିବା ପରେ ପୋଲିସ ଚନ୍ଦ୍ରଶେଖର ରାଓଙ୍କ ଏରାବଲ୍ଲୀ ବାସଭବନ ଚାରିପାଖରେ ନଜର ରଖିଥିଲା। ଏରାବଲ୍ଲୀର ଏକ ସମାରୋହ ହଲରେ ରହୁଥିବା ବି. ଆର. ଏସ୍. କର୍ମୀମାନଙ୍କୁ ମଧ୍ୟ ଅଟକ ରଖାଯାଇଥିଲା ଏବଂ ହାଇଦ୍ରାବାଦର ବେଗମପେଟ୍ ପୋଲିସ ଷ୍ଟେସନକୁ ପଠାଯାଇଥିଲା।

ହିନ୍ଦୁସ୍ଥାନ ସମାଚାର / ଭାନୁ ଚରଣ