ଚମ୍ପୁଆ, ୨୯ ଡିସେମ୍ବର (ହି.ସ.) - ଗତ ନଭେମ୍ବର ମାସ ୧୭ ତାରିଖ ଅପରାହ୍ନରେ ଚମ୍ପୁଆ ଥାନା ଅନ୍ତର୍ଗତ ୨୦ ନଂ ଜାତୀୟ ରାଜପଥ ମହେଶ୍ୱରପୁର ନିକଟରେ ଘଟିଥିବା ଦୁର୍ଘଟଣାରେ ଗୁରୁତର ଆହତ ଆଉ ଜଣେ ଯୁବକଙ୍କ ମୃତ୍ୟୁ ଘଟିଥିବା ଜଣାପଡିଛି । ଏହି କାର ଦୁର୍ଘଟଣାରେ ଛଅ ଜଣ ଯୁବକ ଆହତ ହୋଇଥିବା ବେଳେ ସେଥି ମଧ୍ୟରୁ ସଙ୍କଟାପନ୍ନ ଥିବା ପାଂଚ ଜଣ ଯୁବକଙ୍କୁ ଜିଲ୍ଲା ମୂଖ୍ୟ ଚିକିତ୍ସାଳୟକୁ ରେଫର କରା ଯାଇଥିଲା । ଆହତ ସମସ୍ତ ଯୁବକ ଚମ୍ପୁଆ ଏନଏସି ଅନ୍ତର୍ଗତ ଶିରପୁର ଗ୍ରାମର ହୋଇଥିବା ବେଳେ ଗୁରୁତର ଦୀପକ ଦାସ ଓ ଶୁଭମ୍ ନାୟକଙ୍କ ପୂର୍ବରୁ ମୃତ୍ୟୁ ଘଟିଥିଲା। ଗତ ରାତି ସେହି ଦୁର୍ଘଟଣାରେ ଗୁରୁତର ଦଶରଥ ମହାକୁଡଙ୍କ ପୁଅ ବିକାଶ ମହାକୁଡ (୨୦) ଙ୍କ ମୃତ୍ୟୁ ଘଟିଛି। ସେ ଗୁରୁତର ଅବସ୍ଥାରେ ଭୁବନେଶ୍ୱରର ଏକ ଘରୋଇ ମେଡିକାଲରେ ଚିକତ୍ସିତ ହେଉଥିଲେ । ଶୁକ୍ରବାର ଦିନ ସେଠାରୁ ଡିସଚାର୍ଜ ହୋଇ ଘରକୁ ଆସିଥିବା ବେଳେ ଗତ ରାତି ତାଙ୍କର ମୃତ୍ୟୁ ଘଟିଛି। ଆଜି ତାଙ୍କର ମୃତଦେହକୁ ଚମ୍ପୁଆ ଉପଖଣ୍ଡ ଚିକିତ୍ସାଳୟରେ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରା ଯାଇଛି । ଏହି ଘଟଣା ପରେ ଶିରପୁର ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ହିନ୍ଦୁସ୍ଥାନ ସମାଚାର/ତ୍ରିନାଥ/ଭାନୁ
ହିନ୍ଦୁସ୍ଥାନ ସମାଚାର / Trinath Mahanta
