ଭୁବନେଶ୍ୱର / ନୂଆପଡା, 09 ନଭେମ୍ବର (ହି.ସ.) - ବିଜେପି ସରକାର ଯେଉଁସବୁ ପ୍ରତିଶ୍ରୁତି ଦେଇଛି, ତାହା ପାଳନ କରିଛି। ବିଜେପି ସରକାରକୁ ଆସିବା ପରେ ନୂଆପଡ଼ାବାସୀଙ୍କୁ ଅନେକ ଯୋଜନାରେ ଲାଭ ମିଳିଛି । ନୂଆପଡ଼ା ବିକାଶର ଆଗଧାଡ଼ିରେ ରହିବ । ନିର୍ବାଚନ ପ୍ରଚାରର ଶେଷ ଦିନରେ ନୂଆପଡ଼ାରେ ବିଜେପି (ଭାରତୀୟ ଜନତା ପାର୍ଟି) ରାଜ୍ୟ ସଭାପତି ମନମୋହନ ସାମଲ ଆଜି ଏକ ସାମ୍ବାଦିକ ସମ୍ମିଳନୀରେ ଏହା କହିଛନ୍ତି ।

ସେ କହିଛନ୍ତି, ଆମ ସରକାର ଖରିଆର ରୋଡ ଏନଏସିକୁ ମ୍ୟୁନିସିପାଲଟି ଭାବେ ଘୋଷଣା କରିଛନ୍ତି। ନୂଆପଡ଼ାରୁ ଘାଟିପଡ଼ାକୁ ୪ ଲେନ୍ ବିଶିଷ୍ଟ ରାସ୍ତା ହେବ। ନୂଆପଡ଼ା-ବରଗଡ଼ ରେଲଲାଇନ ୪ ଲେନ୍ ବିଶିଷ୍ଟ ହେବ। ନୂଆପଡ଼ାରେ ଷ୍ଟାଡିୟମ୍ ନିର୍ମାଣ ଲାଗି ପ୍ରତିଶ୍ରୁତି ଦେଇଥିଲୁ, ନୂଆ ଷ୍ଟାଡିୟମ୍ ଲାଗି ଶିଳାନ୍ୟାସ କରାଯାଇଛି। ଖୁବ୍ ଶୀଘ୍ର ନିର୍ମାଣ କାମ ଆରମ୍ଭ ହେବ। ନୂଆପଡ଼ାରେ ମେଡିକାଲ୍ କଲେଜ୍ କରିବୁ। ଏଥିଲାଗି କେନ୍ଦ୍ର ସରକାର ସବୁଜ ସଂକେତ ଦେଇସାରିଛନ୍ତି। ତେଣେ ନୂଆପଡ଼ାରେ ଫିସେରି କଲେଜ୍ ପ୍ରତିଷ୍ଠା କରାଯିବ। ନୂଆପଡ଼ାର ୪୫ ହଜାର ୮୦୦ ଚାଷୀ ଇନପୁଟ୍ ସହାୟତା ପାଇଛନ୍ତି। ଠିକ୍‌ ସେହିପରି ୭୫ ହଜାର ମା ଭଉଣୀଙ୍କୁ ସୁଭଦ୍ରା ଯୋଜନାରେ ଆମ ସରକାର ଉପକୃତ କରିଛନ୍ତି। ୧୪୨୧ କୋଟି ଟଙ୍କାର ଯୋଜନା ପ୍ରସ୍ତୁତ କରିସାରିଛୁ। ନୂଆପଡ଼ାରେ ହେବ ମାଛର ହବ୍। ବେଇମାନ୍, ଭୋଟ୍ ଚୋରି ଭଳି ଅପଶବ୍ଦର ମୁଁ କଡ଼ା ଭାଷାରେ ନିନ୍ଦା କରୁଛି ବୋଲି ସେ କହିଛନ୍ତି ।

---------------

ହିନ୍ଦୁସ୍ଥାନ ସମାଚାର / ସମନ୍ୱୟ