ଗ୍ୟାଙ୍ଗଟକ, 14 ଡିସେମ୍ବର (ହି.ସ.)- ସିକ୍କିମର ପ୍ରତିଷ୍ଠିତ ପର୍ବତାରୋହୀ ମନୀତା ପ୍ରଧାନ ଆଣ୍ଟାର୍କଟିକାର

ସବୁଠାରୁ ଉଚ୍ଚ ଶିଖର ମାଉଣ୍ଟ ଭିନସନ୍ ମ୍ୟାସିଫ୍‌ ଉପରେ ସଫଳତାର ସହିତ ଆରୋହଣ କରି ଏକ

ଐତିହାସିକ ସଫଳତା ହାସଲ କରିଛନ୍ତି। ଏହା ସହିତ ସେ ଭାରତୀୟ ପର୍ବତାରୋହଣ ଇତିହାସରେ ଏକ ନୂଆ

ଅଧ୍ୟାୟ ଯୋଡ଼ିଛନ୍ତି। ବିଶ୍ୱପ୍ରସିଦ୍ଧ ‘ସେଭେନ୍ ସମିଟ୍ସ’ ଚ୍ୟାଲେଞ୍ଜ ପୂରଣ କରିବାରେ ବର୍ତ୍ତମାନ

ସେ କେବଳ ଗୋଟିଏ ଶିଖର ଦୂରରେ ଅଛନ୍ତି।

ମାଉଣ୍ଟ ଭିନସନ୍ ମ୍ୟାସିଫ୍ ଅଭିଯାନ ପର୍ବତାରୋହୀ ମନୀତା ପ୍ରଧାନଙ୍କ

ଆକାଂକ୍ଷାପୂର୍ଣ୍ଣ ‘ପ୍ରୋଜେକ୍ଟ ସେଭେନ୍ ସମିଟ୍ସ’ର ଏକ ଗୁରୁତ୍ୱପୂର୍ଣ୍ଣ ଅଂଶ ଅଟେ। ଏହି

ପ୍ରକଳ୍ପର ଉଦ୍ଦେଶ୍ୟ ହେଉଛି ସାତଟି ମହାଦେଶର ସବୁଠାରୁ ଉଚ୍ଚ ଶିଖରଗୁଡ଼ିକୁ ଆରୋହଣ କରିବା।

ମାଉଣ୍ଟ ଭିନସନ୍‌ର ସଫଳ ଆରୋହଣ ସହିତ ସେ ଏପର୍ଯ୍ୟନ୍ତ ଛଅଟି ମହାଦେଶର ସର୍ବୋଚ୍ଚ ଶିଖର ଜୟ

କରିସାରିଛନ୍ତି। ବର୍ତ୍ତମାନ କେବଳ ଅଷ୍ଟ୍ରେଲିଆର ମାଉଣ୍ଟ କୋସିଉସ୍କୋ ଆରୋହଣ ବାକି ରହିଛି।

ପର୍ବତାରୋହୀ ମନୀତା ପ୍ରଧାନ ୧ ଡିସେମ୍ବର ୨୦୨୫ ତାରିଖରେ ରାଜଧାନୀ

ଗାଙ୍ଗଟକ୍‌ରୁ ନିଜ ଅଭିଯାନ ଆରମ୍ଭ କରିଥିଲେ। ନିଜ ଆକାଂକ୍ଷାପୂର୍ଣ୍ଣ ସ୍ୱପ୍ନକୁ ସାକାର କରିବା

ପାଇଁ ସେ ନ୍ୟୁୟର୍କ, ପୁଣ୍ଟା ଆରେନାସ୍

(ଚିଲି) ହୋଇ ଅଣ୍ଟାର୍କଟିକାର ପ୍ରମୁଖ ପର୍ବତାରୋହଣ ଆଧାର ଶିବିର ‘ୟୁନିଅନ୍ ଗ୍ଲେସିଅର

କ୍ୟାମ୍ପ’ ଏବଂ ପରେ ମାଉଣ୍ଟ ଭିନସନ୍ ବେସ୍ କ୍ୟାମ୍ପ ପର୍ଯ୍ୟନ୍ତ ଦୀର୍ଘ ଆନ୍ତର୍ଜାତୀୟ ଯାତ୍ରା

ସମ୍ପୂର୍ଣ୍ଣ କରିଥିଲେ। ୧୦ ଡିସେମ୍ବରରେ ସେ ବେସ୍ କ୍ୟାମ୍ପରୁ ଶିଖର ଦିଗରେ ଶେଷ ଆରୋହଣ ଆରମ୍ଭ

କରିଥିଲେ। ଏହି ସମୟରେ ତାପମାତ୍ରା –୩୧ ଡିଗ୍ରୀ ସେଲସିଅସ୍ ପର୍ଯ୍ୟନ୍ତ ଗଡ଼ିଯାଇଥିଲା, ଭୟଙ୍କର ପବନ

ବହୁଥିଲା ଏବଂ ବରଫାଚ୍ଛାଦିତ ଢିପଗୁଡ଼ିକ ଆରୋହଣକୁ ଅତ୍ୟନ୍ତ କଠିନ କରିଦେଇଥିଲା। ତଥାପି, ପର୍ବତାରୋହୀ

ପ୍ରଧାନ ଅଦ୍ଭୁତ ସହନଶୀଳତା, ଟିମ୍‌ୱର୍କ ଏବଂ

ଦୃଢ଼ ସଙ୍କଳ୍ପର ପରିଚୟ ଦେଇ ଏହି ଦୁର୍ଗମ ଚ୍ୟାଲେଞ୍ଜକୁ ସଫଳତାର ସହିତ ଜୟ କରିଥିଲେ।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା