କୋରେଇ, ୩ ଅପ୍ରେଲ (ହି.ସ.)- ପାଣିକୋଇଲି ଥାନା ଅନ୍ତର୍ଗତ ବର୍ତମଣା ଠାରେ ଜଣେ ଯୁବକଙ୍କୁ ପିଲା ଚୋର ସନ୍ଦେହରେ କିଛି ଯୁବକ ନିସ୍ତୁକ ମାଡ଼ ମାରି ଲହୁଲୁହାଣ କରିଛନ୍ତି । ପ୍ରକାଶ ଯେ, ଓଚିନ୍ଦା ରୋଡ଼ର ଅମୃତିଆ ରାସ୍ତା ନିକଟରେ ଉକ୍ତ ଯୁବକ ଜଣକ କିଛି ପିଲାଙ୍କୁ ବିସ୍କୁଟ ଦେଉଥିବାର ସ୍ଥାନୀୟ କିଛି ବ୍ୟକ୍ତିଙ୍କ ନଜରକୁ ଆସିଥିଲା । ଏ ନେଇ ଉକ୍ତ ବ୍ୟକ୍ତିଙ୍କୁ ତାଙ୍କ ଘର ଠିକଣା ପଚାରିବାରୁ ସେ କହି ପାରିଲେ ନାହିଁ । ଫଳରେ କିଛି ବ୍ୟକ୍ତି ଉକ୍ତ ଯୁବକଙ୍କୁ ପିଲା ଚୋର ଭାବି ନିସ୍ତୁକ ମାଡ଼ ମାରିଲେ । ଖବର ପାଇ ରାଜପଥ ପେଟ୍ରୋଲିଂ ଅଧିକାରୀ ଅଶୋକ ବଳ ପହଂଚି ଉକ୍ତ ବ୍ୟକ୍ତିଙ୍କୁ ଉଦ୍ଧାର କରି କୋରାଇ ଡ଼ାକ୍ତରଖାନାରେ ଚିକତ୍ସିତ କରିବା ପରେ ଥାନାର ଜିମା ଦେଇଛନ୍ତି । ତେବେ ଉକ୍ତ ଯୁବକ ଜଣକ ଯାଜପୁର ସଦର ଥାନା ଅନ୍ତର୍ଗତ ବରୁଆଁ, ବାଛିଆରୀ ଗ୍ରାମର ନଟିଆ ଦଳେଇଙ୍କ ପୁଅ କଳ୍ପତରୁ (୩୫) ଏବଂ ସେ ଖଂଜଣୀ ବଜାଇ ଭିକ୍ଷାବୃତି କରନ୍ତି ବୋଲି ପୁଲିସ ପ୍ରାଥମିକ ଅନୁସନ୍ଧାନରୁ ତଥ୍ୟ ସଂଗ୍ରହ କରିଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ