ଅହମଦାବାଦ, ୩ ଅପ୍ରେଲ (ହି.ସ.)- ଗୁଜୁରାଟରେ ୬୪ ବର୍ଷ ପରେ ଆୟୋଜିତ ହେବାକୁ ଯାଉଥିବା କଂଗ୍ରେସର ରାଷ୍ଟ୍ରିୟ ଅଧିବେଶନକୁ ନେଇ ଜୋରଦାର୍ ପ୍ରସ୍ତୁତି ଚାଲିଛି । ଅହମଦାବାଦରେ କଂଗ୍ରେସର ଅଧିବେଶନ ଅପ୍ରେଲ ୮ ଓ ୯ ତାରିଖରେ ଅନୁଷ୍ଠିତ ହେବାକୁ ଯାଉଛି । ୮ ତାରିଖରେ ଅହମଦାବାଦର ସର୍ଦ୍ଦାର ପଟେଲ ସ୍ମାରକରେ କଂଗ୍ରେସ ୱାର୍କିଙ୍ଗ କମିଟି (ସିଡବ୍ଲୁସି)ର ମିଟିଂ ଅନୁଷ୍ଠିତ ହେବ । ୯ ତାରିଖରେ ସାବରମତୀ ରିଭରଫ୍ରଂଟ ଇଭେଂଟ ସେଂଟରର ୩ ବ୍ଲକ ରେ ବିଶାଲ ଏୟାରକଣ୍ଡିସନ ଜର୍ମନ ଡୋମ ରେ କଂଗ୍ରେସର ଅଧିବେଶନ ହେବ । ୧୯୬୧ ରେ ଭାବନଗର ପରେ ଏବେ ଗୁଜୁରାଟରେ କଂଗ୍ରେସର ରାଷ୍ଟ୍ରିୟ ଅଧିବେଶନ ଅନୁଷ୍ଠିତ ହେବାକୁ ଯାଉଛି ।
ପାର୍ଟି ପ୍ରବକ୍ତା ମନୀଷ ଦୋଶିଙ୍କ ସୂଚନା ଅନୁସାରେ, ଅପ୍ରେଲ ୮ ତାରିଖ ପୂର୍ବାହ୍ନ ୧୧ଟାରେ ଶାହିବାଗ ସ୍ଥିତ ସର୍ଦ୍ଦାର ପଟେଲ ସ୍ମାରକରେ ସିଡବ୍ଲୁସି ର ମିଟିଙ୍ଗରେ ରାହୁଲ ଗାନ୍ଧି, ସୋନିଆ ଗାନ୍ଧି, ମଲ୍ଲିକାର୍ଜ୍ଜୁନ ଖଡ଼ଗେଙ୍କ ସମେତ ସିଡବ୍ଲୁସି ର ସଦସ୍ୟମାନେ ଉପସ୍ଥିତ ରହିବେ । ଏନେଇ ସର୍ଦ୍ଦାର ସ୍ମାରକ ପଡ଼ିଆରେ ସ୍ୱତନ୍ତ୍ର ପ୍ରକାରର ଏସି ଡୋମ ପ୍ରସ୍ତୁତ କରାଯାଇଛି । ଏହି ଡୋମ ରେ ସିଡବ୍ଲୁସି ର ମିଟିଂ ଅନୁଷ୍ଠିତ ହେବ । ଏହାପରେ ଗାନ୍ଧି ଆଶ୍ରମରେ ପ୍ରାର୍ଥନା ସଭାର ଆୟୋଜନ କରାଯିବ । ସିଡବ୍ଲୁସି ର ମିଟିଂ ନିମନ୍ତେ ସର୍ଦ୍ଦାର ପଟେଲ ସ୍ମାରକରେ ଅବସ୍ଥିତ ହଲ୍ ରେ ବିଶେଷ ପ୍ରକାରର ଡୋମ ତିଆରି କରାଯାଉଛି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ