ଭଦ୍ରକ, ୩ ଅପ୍ରେଲ (ହି.ସ.) - ଭଦ୍ରକ ସହରର ଗବସାହି ହାଉସିଂ ବୋର୍ଡ କଲୋନୀରେ ଜଳ ନିଷ୍କାସନ ନିମନ୍ତେ ଥିବା ସାଧାରଣ ଡ୍ରେନ୍ ଉପରେ କେତେକ ଅସାଧୁ ଜମି ମାଫିଆ ବେଆଇନ୍ ରାସ୍ତା ନିର୍ମାଣ କରୁଥିବାର ଅଭିଯୋଗ ନେଇ ଆଜି କଲୋନୀ ବାସୀଙ୍କ ପକ୍ଷରୁ ଜିଲାପାଳ ଦିଲ୍ଲୀପ ରାଉତରାଏଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି। କଲୋନୀ ବାସୀଙ୍କ ପକ୍ଷରୁ ହରେକୃଷ୍ଣ ସ୍ୱାଇଁ, ବୈଜୟନ୍ତୀ ସ୍ୱାଇଁ, କପିଳ ଚରଣ ସେଠୀ, ଶିବାନୁରଂଜନ ଦାସ, ରାଜକିଶୋର ସାହୁ, ବିଦ୍ୟାଧର ମହାପାତ୍ର, ସୁଶାନ୍ତ କୁମାର ନାୟକ, ଗଣେଶ ଚନ୍ଦ୍ର ସେଠୀ ପ୍ରମୁଖ ଦେଇଥିବା ଅଭିଯୋଗ ପତ୍ର ମୂଳେ ଏହି କଲୋନୀବାସୀଙ୍କ ଜଳ ନିଷ୍କାସନ ନିମନ୍ତେ ଥିବା ମୁଖ୍ୟ ଡ୍ରେନ୍ଟି ଉପରେ ଅଶୋକ ନାୟକ (ଚିକୁ) ଓ ନିରାକାର ବାରିକ (ହୁଲି) ନାମକ ୨ ଜଣ ଅସାମାଜିକ ଜମି ମାଫିଆ ବଳପୂର୍ବକ ଭାବେ ରେଲ୍ୱେ ଲାଇନ୍ ସ୍ଥାନକୁ ଜବରଦଖଲ ପୂର୍ବକ ମାଟି ପକାଇ ଏକ ରାସ୍ତା ନିର୍ମାଣ କରୁଛନ୍ତି। ଯାହାଫଳରେ କଲୋନୀବାସୀଙ୍କର ସମସ୍ତ ଉଦ୍ବୃତ ଜଳ ନିଷ୍କାସିତ ହେବାରେ ବାଧା ଉପୁଜିଛି। ଏ ସଂପର୍କରେ ସ୍ଥାନୀୟ ଅଂଚଳବାସୀ ବିରୋଧ କରିବାରୁ ସେମାନେ ହତ୍ୟା ଧମକ ଦେବା ସହ ମହିଳାମାନଙ୍କ ପ୍ରତି ଅଶ୍ଳୀଳ ଭାଷା ପ୍ରୟୋଗ କରୁଛନ୍ତି। ଏ ସଂପର୍କରେ ରେଲ୍ୱେର କର୍ତୃପକ୍ଷଙ୍କୁ ଅବଗତ କରାଗଲେ ମଧ୍ୟ ସେମାନେ ନୀରବ ରହିଛନ୍ତି। ଏଣୁ ଏହି ଘଟଣାକୁ ନେଇ ସେଠାରେ କୌଣସି ଅପ୍ରିତିକର ପରିସ୍ଥିତି ଉପୁଜିବା ପୂର୍ବରୁ ଏହାର କ୍ଷେତ୍ରୀୟ ତଦନ୍ତ ପୂର୍ବକ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ କଲୋନୀବାସୀ ଜିଲାପାଳଙ୍କ ଠାରେ ନିବେଦନ କରିଛନ୍ତି। ଏହି ଅଭିଯୋଗ ପତ୍ର ମୂଳେ ଜିଲାପାଳ ଶ୍ରୀ ରାଉତରାଏ ତୁରନ୍ତ ଘଟଣାର ତଦନ୍ତ କରାଯାଇ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ ନିମନ୍ତେ ତହସିଲଦାର ସଂଗ୍ରାମ ପ୍ରିୟଦର୍ଶୀ ଖୁଂଟିଆଙ୍କୁ ନିର୍ଦ୍ଦେଶ ଦେଇଥିବାର ଜଣାପଡିଛି। ହିନ୍ଦୁସ୍ଥାନ ସମାଚାର / ପ୍ରମୋଦ
ହିନ୍ଦୁସ୍ଥାନ ସମାଚାର / ପ୍ରମୋଦ କୁମାର ରାୟ
