କୋରେଇ, ୩ ଅପ୍ରେଲ (ହି.ସ.)- ଜଣେ ନାବାଳିକାକୁ ବିବାହର ପ୍ରଲୋଭନ ଦେଖାଇ ଗର୍ଭବତୀ କରିବା ପରେ ନାବାଳିକା ବିବାହ ଲାଗି ଜିଦ ଧରିବାରୁ ଅଭିଯୁକ୍ତ ଜଣକ ଫେରାର ହୋଇଯିବା ପରେ ନାବାଳିକାଙ୍କ ଅଭିଯୋଗ ଆଧାରରେ ପୁଲିସ ଅଭିଯୁକ୍ତକୁ ବ୍ରହ୍ମପୁରରୁ ଗିରଫ କରି କୋର୍ଟ ଚାଲାଣ କରିଛି । ପ୍ରକାଶ ଯେ, ଢେଙ୍କାନାଳ ଜିଲ୍ଲା ଭୁବନ ଥାନା ଅନ୍ତର୍ଗତ ଗଡ଼ବନ୍ଦୀ ଗ୍ରମର ସଂଜୟ ସେଠୀଙ୍କ ପୁଅ ଲଲାଟ (୨୧) ପାଣିକୋଇଲି ଥାନା ଅଂଚଳରେ ଏକ ମିଲରେ ଜେସିବି ଅପରେଟର ଭାବେ କାର୍ଯ୍ୟ କରେ । ତେବେ ଉକ୍ତ ମିଲରେ ଅଭିଯୋଗକାରିଣୀ ଏହି ଥାନା ଅନ୍ତର୍ଗତ ଚାନ୍ଦପୁର ଗ୍ରାମରେ ଥିବା ଆଦିବାସୀ ବସ୍ତିର ଜୈନେକା ନାବାଳିକା (୧୫)ର ଭାଇ କାର୍ଯ୍ୟ କରୁଥିଲା । ତେବେ ନାବାଳିକାର ଭାଇ ସହିତ ସମ୍ପର୍କ ରଖି ଲଲାଟ ପ୍ରାୟ ସମୟରେ ନାବାଳିକା ଘରକୁ ଯିବା ଆସିବା କରୁଥିଲା । ଇତ୍ୟବସରରେ ନାବାଳିକା ସହିତ ଲଲାଟର ପ୍ରେମ ସମ୍ପର୍କ ସୃଷ୍ଟି ହେବା ପରେ ଲଲାଟ ତାକୁ ବିବାହର ପ୍ରଲୋଭନ ଦେଖାଇ ଶାରିରୀକ ସମ୍ପର୍କ ରଖି ଆସୁଥିଲା । ତେବେ ନାବଳିକା ଜଣକ ଅନ୍ତସତ୍ୱା ଥିବାର ଜାଣି ଲଲାଟକୁ ବିବାହ ଲାଗି ଜିଦ ଧରିବାରୁ ଲଲାଟ ନିଜର କର୍ମସଂସ୍ଥାନରୁ ଫେରାର ହୋଇଯିବା ସହିତ ନାବାଳିକାର ଫୋନ ଆଉ ଉଠାଇନଥିଲା । ଏ ନେଇ ନାବାଳିକା ଜଣକ ପାଣିକୋଇଲି ଥାନାରେ ଅଭିଯୋଗ କରିବା ପରେ ପୁଲିସ ଏକ ମାମଲା ୭୩/୨୫ ଋଜୁ କରିବା ସହିତ ଅଭିଯୁକ୍ତର ନମ୍ବରକୁ ଟ୍ରାକିଙ୍ଗ କରି ବ୍ରହ୍ମପୁରରୁ ଉଠାଇ ଆଣିଥିଲା । ଗୁରୁବାର ଅଭିଯୁକ୍ତ ଲଲାଟକୁ ଅଦାଲତ ଚାଲାଣ କରାଯାଇଛି ବୋଲି ତଦନ୍ତକାରୀ ଅଧିକାରୀ ପ୍ରଶାନ୍ତ କୁମାର ଦାଶ ଜଣାଇଛନ୍ତି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
