କୋରେଇ, ୩ ଅପ୍ରେଲ (ହି.ସ.)- ଯାଜପୁର ଜିଲ୍ଲାର ବିଭିନ୍ନ ଥାନା ଅଂଚଳରୁ ଚୋରି ହୋଇଥିବା ମୋବାଇଲ ଫୋନକୁ ଫୋନର ପ୍ରକୃତ ମାଲିକଙ୍କ ପାଖରେ ପହଂଚାଇବା ଲାଗି ଯାଜପୁର ପୁଲିସର ଏକ ମୋବାଇଲ ମେଳା କାର୍ଯ୍ୟକ୍ରମ ପାଣିକୋଇଲି ସ୍ଥିତ ଜିଲ୍ଲା ଆରକ୍ଷୀ ଅଧିକ୍ଷକଙ୍କ କାର୍ଯ୍ୟାଳୟ ପରିସରରେ ଆୟୋଜିତ ହୋଇଥିଲା । ଉକ୍ତ ମେଳାରେ ଜିଲ୍ଲାର ଅତିରିକ୍ତ ଆରକ୍ଷୀ ଅଧିକ୍ଷକ ଅନିରୁଦ୍ଧ ରାଉତରାୟ ଯୋଗ ଦେଇ ବିଭିନ୍ନ ଥାନା ପକ୍ଷରୁ ଉଦ୍ଧାର ହୋଇଥିବା ୪୮ଟି ମୋବାଇଲ ଫୋନ ମଧ୍ୟରୁ ମେଳାକୁ ଆସିଥିବା ୧୦ ଜଣ ବ୍ୟକ୍ତିଙ୍କୁ ସେମାନଙ୍କ ମୋବାଇଲ ଫୋନ ପ୍ରଦାନ କରିଥିଲେ । ବାକି ୩୮ ଫୋନ ଗୁଡ଼ିକୁ ସେମାନେ ଉପଯୁକ୍ତ ପ୍ରମାଣ ଦେଇ ନିଜ ନିଜ ଥାନାରୁ ନେଇଯିବେ ବୋଲି ଶ୍ରୀ ରାଉତରାୟ ପ୍ରକାଶ କରିଥିଲେ । ଜିଲ୍ଲାର କଳିଙ୍ଗନଗର, ବିଞ୍ଝାରପୁର, ଯାଜପୁର ସଦର, କୋରାଇ , ଧର୍ମଶାଳା. ପାଣିକୋଇଲି ଥାନାରୁ ଏକ ବର୍ଷ ମଧ୍ୟରେ ଉକ୍ତ ମୋବାଇଲ ଗୁଡ଼ିକ ଚୋରି ହୋଇଥିବାର ସଂପୃକ୍ତ ଥାନାରେ ଅଭିଯୋଗ ହୋଇଥିଲା । ପରେ ଏହି ମୋବାଇଲ ଗୁଡ଼ିକ ଟ୍ରାକିଙ୍ଗ କରି ଧରାଯାଇଥିଲା । ଯାଜପୁର ଜିଲ୍ଲା ପୁଲିସ ଇତିହାସରେ ପ୍ରଥମ ଥର ପାଇଁ ଏଭଳି କାର୍ଯ୍ୟକ୍ରମ ଅନୁଷ୍ଠିତ ହୋଇଅଛି ବୋଲି ଅତିରିକ୍ତ ଏସପି ସାମ୍ବାଦିକ ସମ୍ମିଳନୀରେ ଜଣାଇବା ସହିତ ସାଧାରଣ ଜନତାଙ୍କୁ (ଉଋଓଜ) ସେଂଟ୍ରାଲ ଇକ୍ୱିପମେଂଟ ଆଇଡ଼େଂଟି ରେଜିଷ୍ଟର ମୋବାଇଲ ଆପ ବିଷୟରେ ସୁଚନା ପ୍ରଦାନ କରିଥିଲେ । ଯାହାର ମୋବାଇଲ ଫୋନ ଚୋରି ହୋଇଛି ଥାନାକୁ ନ ଯାଇ ଉକ୍ତ ଆପ ମାଧ୍ୟମରେ ଚୋରି ହୋଇଯାଇଥିବା ମୋବାଇଲର ଆଇଏମଆଇଇ ନମ୍ବରକୁ ରେଜିଷ୍ଟ୍ରସନ କରିବାକୁ ଅନୁରୋଧ କରିଥିଲେ । ଯାହାଦ୍ୱାରା ଉକ୍ତ ଅଭିଯୋଗଟି ସିଧା ପୁଲିସ ମୂଖ୍ୟାଳୟରେ ପହଂଚି ପାରିବ ଓ ପୁଲିସ ଉକ୍ତ ମୋବାଇଲକୁ ଟ୍ରାକିଙ୍ଗ କରି ପ୍ରକୃତ ମାଲିକଙ୍କୁ ଫେରାଇପାରିବ । ଉକ୍ତ ମେଳାରେ ରିଜର୍ଭ ଇନିସପେକ୍ଟର ଦିନେଶ କୁମାର ସାହୁଙ୍କ ସମେତ ବିଭିନ୍ନ ଥାନାର କର୍ମଚାରୀ ମାନେ ଉପସ୍ଥିତ ଥିଲେ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ