ଭୁବନେଶ୍ୱର, 3 ଏପ୍ରିଲ୍ (ହି.ସ.)- ଶ୍ରୀମତୀ ସୋନିଆ ଗାନ୍ଧୀଙ୍କ ପ୍ରତି ବିଜେପିର ନେତୃମଣ୍ଡଳୀ ଯେଉଁ ଅଶାଳୀନ ଭାଷା ପ୍ରୟୋଗ କରୁଛନ୍ତି ତାହା ଦୁର୍ଭାଗ୍ୟଜନକ ବୋଲି ପିସିସି ସଭାପତି ଭକ୍ତ ଚରଣ ଦାସ କହିଛନ୍ତି ।

ସେ କହିଛନ୍ତି ବିଜେପି ନେତା ଭାଷା ଶୁଦ୍ଧି କରନ୍ତୁ ନହେଲେ ଯେଉଁ ରାଷ୍ଟ୍ରୀୟନେତା ମାନେ ଅଶାଳୀନ ଭାଷା ପ୍ରୟୋଗ କରିଥିବେ ସେମାନଙ୍କୁ ଓଡ଼ିଶାରେ କଂଗ୍ରେସ ପକ୍ଷରୁ ଦୃଢ଼ ବିରୋଧ କରାଯିବ। ସୋନିଆ ଗାନ୍ଧୀଙ୍କ ଆଦର୍ଶ ଅତୁଳନୀୟ । ସେ କ୍ଷମତା ପାଇଁ ଲାଳାୟିତ ନୁହନ୍ତି । ପ୍ରଧାନମନ୍ତ୍ରୀ ପଦକୁ ମଧ୍ୟ ସେ ଗ୍ରହଣ କଲେ ନାହିଁ । ଶ୍ରୀ ଦାସ କହିଲେ ଯେ ସେ ବିରୋଧ ଦଳରେ ଥିବା ବେଳେ ସେ କଳାହାଣ୍ଡି ଗସ୍ତରେ ଆସିଥିଲେ । ତୁରନ୍ତ ଖାଦ୍ୟ ବ୍ୟବସ୍ଥା, ଚାଉଳ ବ୍ୟବସ୍ଥା, ଭତା ବ୍ୟବସ୍ଥା ଓ ଅନେକ ଜନ ହିତୈଷୀ ଯୋଜନା ହୋଇଥିଲା । ଉପା ସରକାରର ମଧ୍ୟ ଉପଦେଷ୍ଟା ମଣ୍ଡଳୀର ଅଧ୍ୟକ୍ଷା ରହି ସୋନିଆ ଗାନ୍ଧୀ ଭାରତରେ ଖାଦ୍ୟ ଅଧିକାର ଆଇନ, ଶିକ୍ଷା ଅଧିକାର ଆଇନ, ସୂଚନା ଅଧିକାର ଆଇନ, ଜାତୀୟ ଗ୍ରାମ୍ୟ ସ୍ୱାସ୍ଥ୍ୟ ମିଶନ, ମହାତ୍ମା ଗାନ୍ଧୀ ନରେଗା ପ୍ରଭୃତି ଯୁଗାନ୍ତକାରୀ ଯୋଜନା ପ୍ରଣୟନ କରାଇଥିଲେ । ତେଣୁ ଏଭଳି ଜଣେ ଆଦର୍ଶ ମହିଳାଙ୍କ ପ୍ରତି ଅଶାଳୀନ ଭାଷା ପ୍ରୟୋଗକୁ ବରଦାସ୍ତ କରାଯିବ ନାହିଁ ବୋଲି ଶ୍ରୀ ଦାସ କହିଥିଲେ ।

ଏହି ସାମ୍ବାଦିକ ସମ୍ମିଳନୀରେ ବିରୋଧି ଦଳ ନେତା ରାମଚନ୍ଦ୍ର କାଡାମ କହିଥିଲେ ଯେ ବିଜେପି ସରକାର ଗୃହରେ ବିଧାୟକ ମାନଙ୍କର ସାମ୍ବିଧାନିକ ଅଧିକାର ଛଡ଼ାଇ ନେଉଛନ୍ତି । କଂଗ୍ରେସର ବିଧାୟକ ମାନଙ୍କର କଣ୍ଠରୋଧ କରାଯାଉଛି । ତିନିଦିନ ପୂର୍ବରୁ ବିଧାନସଭା ବନ୍ଦ କରିଦିଆଗଲା।କଂଗ୍ରେସର ୧୪ ଜଣ ବିଧାୟକ ଗୃହରେ ଅପମାନିତ ହେବା ସହ ଆକ୍ରମଣର ଶିକାର ହେଲେ ଏବଂ ନିଲମ୍ବିତ ହେଲେ। ମହିଳାଙ୍କୁ ନ୍ୟାୟ ଦେବାପାଇଁ କଂଗ୍ରେସର ଗୃହ କମିଟି ଦାବିକୁ ବିଜେପି ସରକାର ଗ୍ରହଣ କଲେ ନାହିଁ। ପ୍ରତିବାଦ କରିବାରୁ କଂଗ୍ରେସ ବିଧାୟକମାନଙ୍କୁ ପୋଲିସ ଲଗାଇ ବିଧାନସଭା ଭିତରୁ ଜବରଦସ୍ତ ରାତିଅଧରେ ଅଣାଯାଇ ରାଜରାସ୍ତାରେ ଫିଙ୍ଗିଦିଆଗଲା। କଂଗ୍ରେସର ଦାବିକୁ ସାମନା କରି ନପାରି ବିଜେପି ସରକାର ପଳାୟନପନ୍ଥୀ ହେଇଛି।

---------------

ହିନ୍ଦୁସ୍ଥାନ ସମାଚାର / ବନ୍ଦନା