ଘଟଗାଁ, ୩ ଅପ୍ରେଲ (ହି.ସ.)- ସମୟ ସମୟରେ ବେଢ଼ି ଉପରେ କୋରୋଡା ପଡିଲା ଭଳି ଦଣ୍ଡ ଭଗବାନ ଦେଇଥାନ୍ତି । ସେହିଭଳି ଏକ ଅଭାବନୀୟ ଦୃଶ୍ୟ କେନ୍ଦୁଝର ଜିଲ୍ଲା ଘଷିପୁରା ବ୍ଲକ ଅନ୍ତର୍ଗତ ଗୋହିରା ପଞ୍ଚାୟତ କଲାବିଲା ଗ୍ରାମ ମୁଣ୍ଡାସାହିରେ ଘଟିଯାଇଛି । ଏକ ଜନଜାତି ମୁଣ୍ଡା ପରିବାରର ସ୍ତ୍ରୀ ରଶ୍ମିତା ମୁଣ୍ଡା ଗତ ଆଠ ମାସ ପୂର୍ବେ ମୃତ୍ୟୁବରଣ କରିଥିବା ବେଳେ ଏକ ସପ୍ତାହ ପୂର୍ବରୁ ତାଙ୍କ ସ୍ୱାମୀ ରମେଶ ମୁଣ୍ଡାଙ୍କର ମୃତ୍ୟୁ ହୋଇଯାଇଛି । ସେହି ମୃତକ ପିତାମାତାଙ୍କ ଠାରୁ ଜନ୍ମ ହୋଇଥିବା ୧୦ ବର୍ଷର ଶିଶୁ ପୁତ୍ର ସଞ୍ଜୟ ମୁଣ୍ଡା ଓ ୪ ବର୍ଷର ଶିଶୁ କନ୍ୟା ଶୁଭଲକ୍ଷ୍ମୀ ମୁଣ୍ଡା ବେସାହାରା ହୋଇପଡିଛନ୍ତି । ନା ସେମାନେ ବାପା ମାଙ୍କୁ ଭୁଲି ପାରୁଛନ୍ତି କିମ୍ବା ସମାଜରେ ଠିଆ ହେବାଭଳି କ୍ଷମତା ଅଛି । ଦିନକୁ ଦୁଇ ଓଳା ଖାଇବାକୁ ପାଉନଥିବା ବଡ଼ ବାପାଙ୍କ ପାଖରେ ଆଶ୍ରୟ ନେଇଛନ୍ତି ସେହି ଦୁଇ ଶିଶୁ । ଖବର ପାଇ ଶାଳପଡା ଗରିବ ସେବା ସଦନର ସଭାପତି ଡ଼ଃ. ଶମ୍ବୁନାଥ ରାଉତ ଏବଂ ସଦନର ସଦସ୍ୟ ସଦସ୍ୟା ଘଟଣାସ୍ଥଳରେ ପହଞ୍ଚି ମୃତକ ପିତାମାତାଙ୍କର ଶୁଦ୍ଧିକ୍ରିୟା ପାଇଁ ସହାୟତାର ହାତ ବଢାଇଛନ୍ତି । ଭବିଷ୍ୟତରେ ସରକାରୀ ସ୍ତରରେ ସେମାନଙ୍କର ଶିକ୍ଷାଦାନ ନିମନ୍ତେ ସହଯୋଗ କରିବା ପାଇଁ ସ୍ଥାନୀୟ ଉପଜିଲ୍ଲାପାଳ ଓ ଜିଲ୍ଲାପାଳଙ୍କ ଦୁଷ୍ଟି ଆକର୍ଷଣ କରିଛନ୍ତି । ନିକଟସ୍ଥ ସେବାଶ୍ରମ ଗୁଡିକର ପ୍ରଧାନ ଶିକ୍ଷକମାନଙ୍କ ସହ ଯୋଗାଯୋଗ ସ୍ଥାପନ କରିଛନ୍ତି । ସେଥିପାଇଁ ଆବଶ୍ୟକ କାଗଜାତ ପ୍ରସ୍ତୁତ କରାଯାଇ ଉପଯୁକ୍ତ ସ୍ଥାନରେ ନାମ ଲେଖିବା ପାଇଁ ପ୍ରୟାସ ଜାରି ରଖିଛନ୍ତି । ଏହି ଘଟଣାକୁ ଗମ୍ଭୀରତା ସହ ଗ୍ରହଣ କରାଯିବ ବୋଲି ଡ଼ଃ ରାଉତ ଓ ସଦସ୍ୟ ସଦସ୍ୟାମାନେ ପ୍ରତିଶ୍ରୁତି ବଦ୍ଧ ହୋଇଛନ୍ତି । ଅନ୍ୟମାନଙ୍କ ମଧ୍ୟରେ ସେବା ସଦନର ମାନସ କୁମାର ଆଚାର୍ଯ୍ୟ, ତପନ କୁମାର ଧୀର, ପୁଷ୍ପଲତା ମହାନ୍ତି, ରାଜେଶ ଆଚାର୍ଯ୍ୟ, ବିଜୟ କୁମାର ରାଉତ, କୀର୍ତ୍ତନ ନାୟକ, ଶ୍ୟାମସୁନ୍ଦର ମୁର୍ମୁ, ଗୌତମ ନାୟକ ପ୍ରମୁଖ ଯୋଗଦେଇଥିଲେ ।

ହିନ୍ଦୁସ୍ଥାନ ସମାଚାର / ଘନଶ୍ୟାମ