ଜୟପୁର, ୩ ଏପ୍ରିଲ୍ (ହି.ସ.) - ଅବିଭକ୍ତ କୋରାପୁଟ ଜିଲ୍ଲା ରାଜନୀତି ବିଜ୍ଞାନ ବିଭାଗ ପକ୍ଷରୁ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଯାଇଅଛି। ବିକ୍ରମ ଦେବ ବିଶ୍ୱବିଦ୍ୟାଳୟ ଜୟପୁର ରାଜନୀତି ବିଜ୍ଞାନ ବିଭାଗୀୟ ମୁଖ୍ୟ ତଥା ସିଡିସି ଡଃ ମହେଶ୍ୱର ଦୂରିୟାଙ୍କ ସଭାପତିତ୍ୱରେ ଦିବଙ୍ଗତ ରାଜନୀତି ବିଜ୍ଞାନ ଅଧ୍ୟାପକ ଡ଼ଃ ପ୍ରଫୁଲ୍ଲ କୁମାର ମହାରଣା ଓ ଡଃ ହରି ପ୍ରସାଦ ତୁଳଙ୍କ ଶ୍ରଦ୍ଧାଞ୍ଜଳି ସଭା ବିଶ୍ୱବିଦ୍ୟାଳୟ ରାଜନୀତି ବିଜ୍ଞାନ ବିଭାଗ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଥିଲା। କୋରାପୁଟ ଜିଲ୍ଲା ରାଧାକୃଷ୍ଣ ଉଚ୍ଚମାଧ୍ୟମିକ ବିଦ୍ୟାଳୟ ଅଧ୍ୟାପକ ଡ଼ଃ ପ୍ରଫୁଲ୍ଲ କୁମାର ମହାରଣା ଓ କଳାହାଣ୍ଡି ଜିଲ୍ଲା ମଦନପୁର ରାମପୁର ମହାବିଦ୍ୟାଳୟ ପୂର୍ବତନ ଅଧ୍ୟକ୍ଷ ଡଃ ହରି ପ୍ରସାଦ ତୁଳ ଉଭୟ ସ୍ନେହି, ମିଷ୍ଟଭାଷୀ ଓ ଛାତ୍ର ବତ୍ସଳ ବୋଲି ଉପସ୍ଥିତ ଅଧ୍ୟାପକ ଅଧ୍ୟାପିକାମାନେ ମତପୋଷଣ କରିଥିଲେ। ବିକ୍ରମ ଦେବ ଉଚ୍ଚମାଧ୍ୟମିକ ବିଦ୍ୟାଳୟ ଜୟପୁର ଅଧ୍ୟକ୍ଷ କ୍ୟାପଟେନ ଲକ୍ଷଣ ପାତ୍ର, ଅଧ୍ୟାପକ ଡ଼ଃ ଗିରସ କୁମାର ଦାସ, ଡଃ ପ୍ରଦୀପ କୁମାର ସ୍ୱାଇଁ ଓ ଡଃ ପବିତ୍ର କୁମାର ବେଦାନ୍ତ ମଂଚାସିନ ରହି ଉଭୟ ସ୍ୱର୍ଗତ ମହାରଣା ଓ ତୁଳଙ୍କ ସ୍ମୃତି ଚାରଣ କରିଥିଲେ। ବିଜୁ ପଟ୍ଟନାୟକ ଉଚ୍ଚମାଧ୍ୟମିକ ବିଦ୍ୟାଳୟ ଅଧ୍ୟାପକ ସ୍ୱତ ବସନ୍ତ ରଥ ଶ୍ରଦ୍ଧାଞ୍ଜଳି ସଭାର ପ୍ରାରମ୍ଭିକ ସୂଚନା ପ୍ରଦାନ କରିଥିଲା ବେଳେ ସିନ୍ଧେଦେବୀ ସ୍ନାତକ ମହାବିଦ୍ୟାଳୟ ନନ୍ଦପୁର ଅଧ୍ୟାପକ କିଶୋର ଚନ୍ଦ୍ର ବେହେରା କାର୍ଯ୍ୟକ୍ରମକୁ ପରିଚାଳନା କରୁଥିଲେ। ଅଧ୍ୟାପକ ଆଲଫ୍ରଡ ଉଇଲିୟମ ତୁରୁକ, ସରୋଜ କୁମର ଭୁୟାଁ, ସୁରଥ ଡାକୁଆ, ସନ୍ତୋଷ କୁମାର ସାମଲ, ଅନିଲ କୁମର ପଟ୍ଟନାୟକ, ଅଧ୍ୟାପିକା ପଲ୍ଲବୀ ନାୟକ, ଜୋଛନା ରାଓ, ଓ ଇନ୍ଦିରା ବେହେରା ପ୍ରମୁଖ ଉପସ୍ଥିତ ରହିଥିଲେ। ଶେଷରେ ଡଃ ବି. ଆର. ଆମ୍ବେଦକର ଉଚ୍ଚମାଧ୍ୟମିକ ବିଦ୍ୟାଳୟ ଲମତାପୁଟ ଅଧ୍ୟାପକ ସତ୍ୟନାରାୟଣ ମହାପାତ୍ର ଧନ୍ୟବାଦ୍ ଅର୍ପଣ କରିଥିଲେ।
ହିନ୍ଦୁସ୍ଥାନ ସମାଚାର/ପବନ/ଭାନୁ
ହିନ୍ଦୁସ୍ଥାନ ସମାଚାର / ପିକେପି
