ଭୁବନେଶ୍ୱର, 3 ଏପ୍ରିଲ୍ (ହି.ସ.)– ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ବିଲ୍ ରେ ପ୍ରସ୍ତାବିତ ସଂଶୋଧନ ସମୃଦ୍ଧ ଶିକ୍ଷା ବ୍ୟବସ୍ଥା ପ୍ରତିଷ୍ଠା ଦିଗରେ ସହାୟକ ହେବ ବୋଲି ଉଚ୍ଚ ଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି ।

ମନ୍ତ୍ରୀ ସୂରଜ ସୋସିଆଲ ମିଡିଆ ପୋଷ୍ଟରେ କହିଛନ୍ତି ଯେ, ଗତ କାଲି ଓଡ଼ିଶା ବିଧାନସଭା ଇତିହାସ ପାଇଁ ଏକ ଐତିହାସିକ ଦିନ ଥିଲା । ଗଣତନ୍ତ୍ର ମନ୍ଦିରର ଗୃହ କାର୍ଯ୍ୟ ଆଜି ସକାଳ ଯାଏଁ ଚାଲୁରହିଥିଲା । ଇତି ମଧ୍ୟରେ ବିଭିନ୍ନ ଆଲୋଚନା ଓ ପର୍ଯ୍ୟାଲୋଚନା ପରେ ଗଣତାନ୍ତ୍ରିକ ମୂଲ୍ୟବୋଧକୁ ସମ୍ମାନ ଦେଇ ଦୁଇଟି ବିଲ ମଧ୍ୟ ପାରିତ ହୋଇଛି । ତନ୍ମଧ୍ୟରୁ ଓଡ଼ିଶା ବିଶ୍ୱ ବିଦ୍ୟାଳୟ ସଂଶୋଧନ ବିଲ୍ ଅନ୍ୟତମ। ବିଲ୍ ରେ ପ୍ରସ୍ତାବିତ ସଂଶୋଧନ ଗୁଡ଼ିକ ବିଶ୍ୱ ବିଦ୍ୟାଳୟଗୁଡ଼ିକର ସ୍ୱାୟତ୍ତତା ଫେରାଇ ଆଣି ଏକ ସମୃଦ୍ଧ ଶିକ୍ଷା ବ୍ୟବସ୍ଥା ପ୍ରତିଷ୍ଠା ଦିଗରେ ସହାୟକ ହେବ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପରିକଳ୍ପନା, ଲୋକଙ୍କ ମୁଖ୍ୟମନ୍ତ୍ରୀ ଶ୍ରୀ ମୋହନ ମାଝୀ ଓ ପ୍ରିୟ କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରଚେଷ୍ଟାରେ ଲାଗୁ ହେଉଥିବା ‘ଜାତୀୟ ଶିକ୍ଷା ନୀତି -୨୦୨୦’ର ଉପାଦାନଗୁଡ଼ିକୁ ଏହା ସୁଦୃଢ଼ କରିବା ସହିତ ଏକ ଉତ୍ତମ ଶୈକ୍ଷିକ ବାତାବରଣ ସୃଷ୍ଟି କରିବ ।

---------------

ହିନ୍ଦୁସ୍ଥାନ ସମାଚାର / ସମନ୍ୱୟ