ଚେନ୍ନାଇ, ୮ ଜୁଲାଇ (ହି.ସ.)- ମଙ୍ଗଳବାର ସକାଳେ ତାମିଲନାଡୁର କୁଡ୍ଡାଲୋର ଜିଲ୍ଲାର ସେମ୍ମନକୁପ୍ପମରେ ଏକ ସ୍କୁଲ ଭ୍ୟାନ୍ ରେଳ କ୍ରସିଂରେ ଟ୍ରେନ ଆଗକୁ ଚାଲିଆସିବା ଫଳରେ ଦୁଇ ଜଣ ଛାତ୍ରଙ୍କ ସମେତ ତିନି ଜଣଙ୍କର ମୃତ୍ୟୁ ହୋଇଛି । ଦୁର୍ଘଟଣାରେ ୬ ଜଣ ଛାତ୍ରଙ୍କ ସମେତ ୭ ଜଣ ଆହତ ହୋଇଥିବା କୁହାଯାଉଛି ।

ଜିଲ୍ଲା ପ୍ରଶାସନ ଅନୁଯାୟୀ, ସକାଳ ୭ଟା ୪୫ ରେ ଏହି ଦୁର୍ଘଟଣା ଘଟିଥିଲା । ସ୍କୁଲ ଭ୍ୟାନଟି ରେଳ କ୍ରସିଂ ପାର୍ ହେଉଥିବା ସମୟରେ ଭିଲୁପୁରମ-ମୟିଲାଦୁଥୁରାଇ ପାସେଞ୍ଜର ଟ୍ରେନଟି ଭ୍ୟାନକୁ ଧକ୍କା ଦେଇଥିଲା । ଧକ୍କା ଏତେ ଜୋରଦାର ଥିଲା ଯେ ଭ୍ୟାନଟି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି । ଭ୍ୟାନ୍ ଡ୍ରାଇଭର ଏବଂ ୬ ଜଣ ଛାତ୍ର ଆହତ ହୋଇଛନ୍ତି, ତନ୍ମଧ୍ୟରୁ କେତେକଙ୍କ ଅବସ୍ଥା ଗୁରୁତର ଅଛି । ଆହତ ଛାତ୍ରମାନଙ୍କୁ କୁଡ୍ଡାଲୋର ସରକାରୀ ଡାକ୍ତରଖାନାକୁ ନିଆଯାଇଛି, ଯେଉଁଠାରେ ସେମାନଙ୍କ ସ୍ୱାସ୍ଥ୍ୟାବସ୍ଥା ଉପରେ ନଜର ରଖାଯାଇଛି ।

ସ୍ଥାନୀୟ ଅଧିକାରୀମାନେ ସୂଚନା ଦେଇଛନ୍ତି ଯେ, ଦୁର୍ଘଟଣାରେ ନିମିଲେଶ (୧୨) ଏବଂ ଡି. ଚାରୁମତି (୧୬) ନାମକ ଦୁଇ ପିଲାଙ୍କ ମୃତ୍ୟୁ ହୋଇଛି, ଯେତେବେଳେ ଛିଡି ପଡିଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ଆନ୍ନାଦୁରାଇ (୫୫) ନାମକ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ରେଳବାଇ ଅଧିକାରୀମାନେ ଦୁର୍ଘଟଣାର ତଦନ୍ତ ଆରମ୍ଭ କରିଛନ୍ତି ।

ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନ ଦୁର୍ଘଟଣାରେ ଦୁଃଖ ପ୍ରକାଶ କରିଛନ୍ତି ଏବଂ ମୃତକଙ୍କ ପରିବାରକୁ ୫ ଲକ୍ଷ ଟଙ୍କା କ୍ଷତିପୂରଣ ଘୋଷଣା କରିଛନ୍ତି । ସେ ସୋସିଆଲ ମିଡିଆ ଏକ୍ସ ରେ ଲେଖିଛନ୍ତି ଯେ, ଦୁର୍ଘଟଣାରେ ଦୁଇ ଛାତ୍ରଙ୍କ ମୃତ୍ୟୁର ଦୁଃଖଦ ଖବରରେ ମୁଁ ମର୍ମାହତ ଏବଂ ଦୁଃଖିତ । ମୃତ ଛାତ୍ରଙ୍କ ପରିବାର ପ୍ରତି ମୁଁ ଗଭୀର ସମବେଦନା ଜ୍ଞାପନ କରୁଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ