ନୂଆ ଦିଲ୍ଲୀ, ୨୯ ଅଗଷ୍ଟ (ହି.ସ.)- ଭାରତୀୟ ରେଳବାଇ ଗୁରୁ ତେଗ ବାହାଦୁରଙ୍କ ୩୫୦ତମ ସହିଦ ଦିବସକୁ ଶ୍ରଦ୍ଧା ଏବଂ ସମ୍ମାନର ସହିତ ପାଳନ କରିବାକୁ ଯାଉଛି। ରେଳବାଇର ଏହି ପଦକ୍ଷେପର ଲକ୍ଷ୍ୟ ହେଉଛି ଯୁବ ପିଢ଼ିକୁ ଶିଖ ଗୁରୁଙ୍କ ଶିକ୍ଷା ଏବଂ ବଳିଦାନ ବିଷୟରେ ସଚେତନ କରିବା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମାର୍ଗଦର୍ଶନରେ ଏହି ପଦକ୍ଷେପ ନିଆଯାଉଛି।
ରେଳ ରାଷ୍ଟ୍ରମନ୍ତ୍ରୀ ରଭନୀତ ସିଂହ ଶୁକ୍ରବାର ରେଳ ଭବନରେ ଏକ ଉଚ୍ଚସ୍ତରୀୟ ବୈଠକରେ କହିଛନ୍ତି ଯେ ଭାରତୀୟ ରେଳବାଇ ଏହି ଐତିହାସିକ ଘଟଣାର ସ୍ମୃତିଚାରଣ ପାଇଁ ବିଭିନ୍ନ ଶିଖ ସଂଗଠନର ନେତାମାନଙ୍କ ଦ୍ୱାରା ଦିଆଯାଇଥିବା ମୂଲ୍ୟବାନ ପରାମର୍ଶକୁ ସ୍ୱାଗତ କରୁଛି। ଏହି ପଦକ୍ଷେପ ଶିଖମାନଙ୍କର ନବମ ଗୁରୁ ଗୁରୁ ତେଗ ବାହାଦୁରଙ୍କ ଐତିହ୍ୟକୁ ସମ୍ମାନ ଦେବା ପାଇଁ ଭାରତୀୟ ରେଳବାଇ ଏବଂ ଶିଖ ସମ୍ପ୍ରଦାୟ ମଧ୍ୟରେ ଏକ ଐତିହାସିକ ସହଯୋଗକୁ ଚିହ୍ନିତ କରେ, ଯାହାଙ୍କ ଧାର୍ମିକ ସ୍ୱାଧୀନତା ପାଇଁ ସର୍ବୋଚ୍ଚ ବଳିଦାନ ପିଢ଼ିକୁ ପ୍ରେରଣା ଯୋଗାଇବ।
ରଭନୀତ ସିଂହ କହିଛନ୍ତି ଯେ ଆଗାମୀ ଶତାବ୍ଦୀ ସ୍ମୃତି ପାଇଁ ସମସ୍ତ ପ୍ରମୁଖ ଶିଖ ସଂଗଠନର ଆବଶ୍ୟକତା ଏବଂ ପରାମର୍ଶ ଉପରେ ଆଲୋଚନା କରିବା ପାଇଁ ଏହା ପ୍ରଥମ ଥର ଥିଲା ଯେ ରେଳ ଭବନରେ ଏକ ଉତ୍ସର୍ଗୀକୃତ ବୈଠକ ଅନୁଷ୍ଠିତ ହୋଇଥିଲା।
ବୈଠକରେ ଦେଶର ବିଭିନ୍ନ ରେଳ ଷ୍ଟେସନ ଏବଂ ଟ୍ରେନରେ ଗୁରୁ ତେଗ ବାହାଦୁରଙ୍କ ଶ୍ଲୋକ ପ୍ରଦର୍ଶନ, ଶତବାର୍ଷିକୀ ଅବସରରେ ସ୍ୱତନ୍ତ୍ର ସ୍ମାରକୀ ଟ୍ରେନ ଚଲାଇବା, ହରିୟାଣା, ପାଟନା ଏବଂ ହଜୁର ସାହିବ ଷ୍ଟେସନରେ ପଞ୍ଜାବୀ ଭାଷାରେ ସାଇନ୍ ବୋର୍ଡ ସ୍ଥାପନ, ସଚଖଣ୍ଡ ଏକ୍ସପ୍ରେସ ଭଳି ଟ୍ରେନରେ ପରିଷ୍କାର ପରିଚ୍ଛନ୍ନତା ଏବଂ ଯାତ୍ରୀ ସୁବିଧାରେ ଉନ୍ନତି, ଟ୍ରେନରେ ଲଙ୍ଗର ସେବା ବ୍ୟବସ୍ଥା ଏବଂ ଶିଖ ତୀର୍ଥସ୍ଥଳଗୁଡ଼ିକୁ ଉନ୍ନତ ସଂଯୋଗୀକରଣ ଉପରେ ଆଲୋଚନା ହୋଇଥିଲା।
ଏହା ସହିତ, ଦିଲ୍ଲୀ ରେଳ ଷ୍ଟେସନକୁ ଗୁରୁ ତେଗ ବାହାଦୁର ରେଳ ଷ୍ଟେସନ ନାମରେ ନାମିତ କରିବା, ତଖ୍ତ ଶ୍ରୀ ପାଟନା ସାହିବ ପାଇଁ ଦୈନିକ ଟ୍ରେନ ସେବାରେ ପ୍ୟଂଟ୍ରି କାର ଏବଂ ଆଧୁନିକ ଭିତିଭୂମି ବିକାଶ କରିବା, ବନ୍ଦେ ଭାରତ ଏକ୍ସପ୍ରେସ ମାଧ୍ୟମରେ ପାଟନା ସାହିବକୁ ଉତମ ସଂଯୋଗ, ତିନି ମାସ ପାଇଁ ପାଂଚଟି ତଖ୍ତକୁ ସଂଯୋଗ କରୁଥିବା ଏକ ସ୍ୱତନ୍ତ୍ର ଟ୍ରେନ ଚଲାଇବା ଏବଂ କର୍ଣ୍ଣାଲ ଏବଂ କୁରୁକ୍ଷେତ୍ର ଭଳି ପ୍ରମୁଖ ଷ୍ଟେସନରେ ଟ୍ରେନର ରହଣି ବୃଦ୍ଧି କରିବା ପାଇଁ ମଧ୍ୟ ପରାମର୍ଶ ଦିଆଯାଇଥିଲା।
ରେଲୱେ ବୋର୍ଡର ଅଧ୍ୟକ୍ଷ ସତୀଶ କୁମାର ସମସ୍ତ ପ୍ରତିନିଧିମାନଙ୍କୁ ଆଶ୍ୱାସନା ଦେଇଥିଲେ ଯେ ଭାରତୀୟ ରେଳ ସମସ୍ତ ପରାମର୍ଶକୁ ଗମ୍ଭୀରତାର ସହ ବିଚାର କରିବ ଏବଂ ଶତବାର୍ଷିକୀ ପାଳନର ସଫଳତା ସୁନିଶ୍ଚିତ କରିବା ପାଇଁ ଉପଯୁକ୍ତ ପଦକ୍ଷେପ ନେବ।
ବୈଠକରେ ଯୋଗ ଦେଇଥିବା ବରିଷ୍ଠ ରେଳ ଅଧିକାରୀମାନଙ୍କ ମଧ୍ୟରେ ସଦସ୍ୟ (ଭିତିଭୂମି) ନବୀନ ଗୁଲାଟି, ସଦସ୍ୟ (ଅପରେସନ ଏବଂ ବ୍ୟବସାୟ ବିକାଶ) ହିତେନ୍ଦ୍ର ମାଲହୋତ୍ରା, ଉତର ରେଳବାଇ ମହାପ୍ରବନ୍ଧକ ଅଶୋକ କୁମାର ବର୍ମା, ଆଇଆରସିଟିସି ସଞ୍ଜୟ କୁମାର ଜୈନ ଏବଂ ରେଳ ମନ୍ତ୍ରଣାଳୟ କାର୍ଯ୍ୟନିର୍ବାହୀ ନିର୍ଦ୍ଦେଶକ (ପିଜି) ଧନଞ୍ଜୟ ସିଂହ ସାମିଲ ଥିଲେ।
-----------------
---------------
ହିନ୍ଦୁସ୍ଥାନ ସମାଚାର / ଗଗନ