ଭୋପାଳ, ୨୨ ଅକ୍ଟୋବର (ହି.ସ.)। ମଧ୍ୟପ୍ରଦେଶର ଉଜ୍ଜୟିନୀସ୍ଥିତ ବିଶ୍ୱପ୍ରସିଦ୍ଧ ଜ୍ୟୋତିର୍ଲିଙ୍ଗ ଭଗବାନ ଶ୍ରୀ ମହାକାଳେଶ୍ୱର ମନ୍ଦିରର ସୁରକ୍ଷା ବ୍ୟବସ୍ଥା ଯାଞ୍ଚ କରିବା ପାଇଁ ସିଂହସ୍ଥ-୨୦୨୮ ପୂର୍ବରୁ ଜାତୀୟ ସୁରକ୍ଷା ଗାର୍ଡ (ଏନ୍ଏସ୍ଜି) ପକ୍ଷରୁ ଏକ ମକ୍ ଡ୍ରିଲ୍ ଆୟୋଜନ କରାଯାଇଛି। ରାତିର ଅନ୍ଧାରରେ ଅସ୍ତ୍ରଶସ୍ତ୍ରରେ ସଜ୍ଜିତ ଏନ୍ଏସ୍ଜିର ବ୍ଲାକ୍ କ୍ୟାଟ୍ କମାଣ୍ଡୋମାନେ ମନ୍ଦିର ପରିସର ଓ ମହାକାଳ ଲୋକରେ ଜରୁରୀକାଳୀନ ପରିସ୍ଥିତିର ମୁକାବିଲା ପାଇଁ ଅଭ୍ୟାସ କରିଥିଲେ।

ମହାକାଳ ମନ୍ଦିରରେ ଗୁରୁବାର ରାତି ୧୧ଟାରେ ଆରମ୍ଭ ହୋଇଥିବା ଏହି ସୁରକ୍ଷା ଅଭ୍ୟାସ ରାତି ୨ଟା ପର୍ଯ୍ୟନ୍ତ ଚାଲିଥିଲା। ପ୍ରାୟ ତିନି ଘଣ୍ଟା ଧରି ଚାଲିଥିବା ଏହି ମକ୍ ଡ୍ରିଲ୍ରେ ଏକ କାଳ୍ପନିକ ଆତଙ୍କବାଦୀ ଆକ୍ରମଣର ପରିସ୍ଥିତି ସୃଷ୍ଟି କରାଯାଇ ସୁରକ୍ଷା ପ୍ରସ୍ତୁତିର ଯାଞ୍ଚ କରାଯାଇଥିଲା। ଏଥିରେ ୧୦୦ରୁ ଅଧିକ ଏନ୍ଏସ୍ଜି କମାଣ୍ଡୋଙ୍କ ସହ ଏଟିଏସ୍, ସ୍ଥାନୀୟ ପୁଲିସ ଓ ପ୍ରଶାସନର ଟିମ୍ ମଧ୍ୟ ସାମିଲ ହୋଇଥିଲେ।

ରାତି ପ୍ରାୟ ୧୧ଟା ସମୟରେ ମହାକାଳ ମନ୍ଦିରର ନୀଳକଣ୍ଠ ଦ୍ୱାର ଓ ନନ୍ଦୀ ଦ୍ୱାର ନିକଟରେ ସୁରକ୍ଷା କାର୍ଯ୍ୟକଳାପ ତୀବ୍ର ହୋଇଥିଲା। ସୁରକ୍ଷା ଅଭ୍ୟାସର ଅଂଶ ଭାବେ ଅଞ୍ଚଳକୁ ଖାଲି କରାଯିବା ସହ ଆଲୋକ ବ୍ୟବସ୍ଥା ବନ୍ଦ କରାଯାଇଥିଲା। ଏହାପରେ ଅତ୍ୟାଧୁନିକ ଅସ୍ତ୍ରଶସ୍ତ୍ର ଓ ସୁରକ୍ଷା ଉପକରଣରେ ସଜ୍ଜିତ ଏନ୍ଏସ୍ଜି କମାଣ୍ଡୋମାନେ ମୋର୍ଚ୍ଚାକୁ ଆଗେଇ ଯାଇଥିଲେ। ରାତି ପ୍ରାୟ ୨ଟା ପର୍ଯ୍ୟନ୍ତ ଚାଲିଥିବା ଏହି ଅଭିଯାନରେ ଜରୁରୀକାଳୀନ ପରିସ୍ଥିତିର ମୁକାବିଲା ପାଇଁ ଥିବା ପ୍ରସ୍ତୁତିକୁ ପରୀକ୍ଷା କରାଯାଇଥିଲା।

ମକ୍ ଡ୍ରିଲ୍ ସମୟରେ ମହାକାଳ ଲୋକର ମାନସରୋବର ଅଞ୍ଚଳଠାରୁ ତ୍ରିନେତ୍ର କଣ୍ଟ୍ରୋଲ୍ ରୁମ୍ ପର୍ଯ୍ୟନ୍ତ ସୁରକ୍ଷା ବ୍ୟବସ୍ଥାର ଯାଞ୍ଚ କରାଯାଇଥିଲା। ସମ୍ଭାବ୍ୟ ଆକ୍ରମଣ ସ୍ଥିତିରେ ତ୍ୱରିତ କାର୍ଯ୍ୟାନୁଷ୍ଠାନ, ବିପଦକୁ ନିଷ୍କ୍ରିୟ କରିବା, ଶ୍ରଦ୍ଧାଳୁଙ୍କୁ ସୁରକ୍ଷିତ ଭାବେ ବାହାର କରିବା ଏବଂ ବିଭିନ୍ନ ସୁରକ୍ଷା ଏଜେନ୍ସି ମଧ୍ୟରେ ସମନ୍ୱୟ ରକ୍ଷା କରିବାର ପ୍ରକ୍ରିୟା ଅଭ୍ୟାସ କରାଯାଇଥିଲା। ଏଥିସହ ମନ୍ଦିରର ପ୍ରବେଶ ଓ ପ୍ରସ୍ଥାନ ପଥ ସହ ଜରୁରୀକାଳୀନ ରାସ୍ତାଗୁଡ଼ିକର ବ୍ୟବସ୍ଥା ମଧ୍ୟ ଯାଞ୍ଚ କରାଯାଇଥିଲା।

ହିନ୍ଦୁସ୍ଥାନ ସମାଚାର / ସ୍ୱାଗତିକା