ଜୟପୁର, ୩୧ ଅକ୍ଟୋବର (ହି.ସ.)। ସର୍ଦ୍ଦାର ବଲ୍ଲଭଭାଇ ପଟେଲଙ୍କ ୧୫୧ତମ ଜୟନ୍ତୀ ଅବସରରେ ଜୟପୁରରେ ଆୟୋଜିତ ‘ରନ୍ ଫର୍ ୟୁନିଟି’ କାର୍ଯ୍ୟକ୍ରମକୁ କେନ୍ଦ୍ର ଶିକ୍ଷା, ଖାଦ୍ୟ ଓ ଉପଭୋକ୍ତା ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ଏବଂ ମୁଖ୍ୟମନ୍ତ୍ରୀ ଭଜନଲାଲ ଶର୍ମା ସବୁଜ ପତାକା ଦେଖାଇ ଶୁଭାରମ୍ଭ କରିଛନ୍ତି। ଏହା ପୂର୍ବରୁ ଉପସ୍ଥିତ ଜନସମାବେଶକୁ ଜାତୀୟ ଏକତାର ଶପଥ ମଧ୍ୟ ପାଠ କରାଯାଇଥିଲା।
ଏହି ଅବସରରେ କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ କହିଛନ୍ତି ଯେ, ଆଜି ଆମେ ଯେଉଁ ‘ଏକ ଭାରତ’ ଦେଖୁଛୁ, ତାହା ପଛରେ ସର୍ଦ୍ଦାର ପଟେଲଙ୍କ ଦକ୍ଷ ନେତୃତ୍ୱ ଏବଂ ଅକ୍ଳାନ୍ତ ପରିଶ୍ରମର ଐତିହାସିକ ଅବଦାନ ରହିଛି। ଏହାକୁ କେବେ ମଧ୍ୟ ଭୁଲିହେବ ନାହିଁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସର୍ଦ୍ଦାର ପଟେଲଙ୍କ ‘ଏକ ଭାରତ’ ସଂକଳ୍ପକୁ ‘ଶ୍ରେଷ୍ଠ ଭାରତ’ ରୂପେ ସାକାର କରିବାର କାର୍ଯ୍ୟ କରାଯାଉଛି।
କେନ୍ଦ୍ରମନ୍ତ୍ରୀ କହିଛନ୍ତି ଯେ, ସର୍ଦ୍ଦାର ପଟେଲ ୫୦୦ରୁ ଅଧିକ ଦେଶୀୟ ରାଜ୍ୟକୁ ଏକତ୍ରିତ କରି ଅଖଣ୍ଡ ଭାରତ ଗଠନ କରିଥିଲେ। ସେହିପରି ରାଜସ୍ଥାନ ଗଠନରେ ମଧ୍ୟ ତାଙ୍କର ଅବଦାନକୁ ସର୍ବଦା ମନେ ରଖିବା ଉଚିତ। ତାଙ୍କରି ପ୍ରୟାସରେ ୩୦ ମାର୍ଚ୍ଚ ୧୯୪୯ରେ ବୃହତ୍ ରାଜସ୍ଥାନର ସ୍ୱପ୍ନ ସାକାର ହୋଇଥିଲା। ସର୍ଦ୍ଦାର ପଟେଲଙ୍କୁ ପ୍ରକୃତ ଶ୍ରଦ୍ଧାଞ୍ଜଳି ଦେବା ପାଇଁ ଗୁଜରାଟର କେୱଡ଼ିଆରେ ବିଶ୍ୱର ସର୍ବୋଚ୍ଚ ପ୍ରତିମୂର୍ତ୍ତି ‘ଷ୍ଟାଚ୍ୟୁ ଅଫ୍ ୟୁନିଟି’ ସ୍ଥାପନ କରାଯାଇଛି। ଏହା ଦେଶ ପ୍ରତି ତାଙ୍କର ସମର୍ପଣ ଓ ଏକତାର ସଂକଳ୍ପର ପ୍ରତୀକ। ସେ ଯୁବପିଢ଼ିଙ୍କୁ ଏହି ପ୍ରତିମୂର୍ତ୍ତି ପରିଦର୍ଶନ କରିବା ସହ ସର୍ଦ୍ଦାର ପଟେଲଙ୍କ ଜୀବନ ଓ ବିଚାରଧାରାରୁ ପ୍ରେରଣା ନେବାକୁ ଆହ୍ୱାନ କରିଥିଲେ।
ଏହି ଅବସରରେ ମୁଖ୍ୟମନ୍ତ୍ରୀ ଭଜନଲାଲ ଶର୍ମା କହିଛନ୍ତି ଯେ, ସର୍ଦ୍ଦାର ବଲ୍ଲଭଭାଇ ପଟେଲ ନିଜର ଦୃଢ଼ ସଂକଳ୍ପ, ଅଦମ୍ୟ ଇଚ୍ଛାଶକ୍ତି ଏବଂ ଦୂରଦର୍ଶିତା ବଳରେ ଦେଶକୁ ଏକତାର ସୂତ୍ରରେ ବାନ୍ଧିଥିଲେ। ଆମର ଭାଷା ଓ ପରମ୍ପରା ଭିନ୍ନ ହୋଇପାରେ, କିନ୍ତୁ ଆମର ଜାତୀୟ ପରିଚୟ ଏକ। ପ୍ରଧାନମନ୍ତ୍ରୀଙ୍କ ବିଶ୍ୱାସ ଯେ, ଯୁବପିଢ଼ିଙ୍କ ସହଯୋଗରେ ସର୍ଦ୍ଦାର ପଟେଲଙ୍କ ସ୍ୱପ୍ନର ଏକ ସଶକ୍ତ ଭାରତ ଗଠନ ହୋଇପାରିବ। ତେଣୁ 'ମାଇ ଭାରତ' ଭଳି ମଞ୍ଚ ମାଧ୍ୟମରେ ଦେଶର ଯୁବପିଢ଼ିଙ୍କୁ ରାଷ୍ଟ୍ର ନିର୍ମାଣ ସହ ଯୋଡ଼ାଯାଉଛି। ଷ୍ଟାର୍ଟଅପ୍ ଇଣ୍ଡିଆ ଏବଂ ମୁଦ୍ରା ଯୋଜନା ଯୁବକମାନଙ୍କୁ ଚାକିରି ଖୋଜୁଥିବା ବ୍ୟକ୍ତିରୁ ଚାକିରି ପ୍ରଦାନକାରୀରେ ପରିଣତ କରିଛି। ସେହିପରି ଖେଲୋ ଇଣ୍ଡିଆ ଏବଂ ଫିଟ୍ ଇଣ୍ଡିଆ ଆନ୍ଦୋଳନ ମାଧ୍ୟମରେ ଗାଁ ଓ ଦୁର୍ଗମ ଅଞ୍ଚଳର ପ୍ରତିଭାମାନେ ଅନ୍ତର୍ଜାତୀୟ ସ୍ତରରେ ତ୍ରିରଙ୍ଗା ଉଡ଼ାଉଛନ୍ତି।
ମୁଖ୍ୟମନ୍ତ୍ରୀ ଶର୍ମା କହିଛନ୍ତି ଯେ, ରାଜ୍ୟ ସରକାର ପ୍ରତ୍ୟେକ ଯୁବକଙ୍କୁ ଗୁଣାତ୍ମକ ଶିକ୍ଷା, ସ୍ୱଚ୍ଛ ନିଯୁକ୍ତି ପ୍ରକ୍ରିୟା, ଆଧୁନିକ କ୍ରୀଡ଼ା ସୁବିଧା ଏବଂ ଦକ୍ଷତା ବିକାଶର ଉନ୍ନତ ସୁଯୋଗ ଯୋଗାଇ ଦେଉଛନ୍ତି। ଯୁବନୀତି, ନୂତନ ନିଯୁକ୍ତି ନୀତି ଏବଂ ରାଜ୍ୟ ଦକ୍ଷତା ନୀତି ମାଧ୍ୟମରେ ଭବିଷ୍ୟତକୁ ସୁଦୃଢ଼ କରିବାର ପ୍ରୟାସ କରାଯାଉଛି। ରାଜ୍ୟରେ ୪୧୦ଟି ପରୀକ୍ଷା ସମ୍ପୂର୍ଣ୍ଣ ସ୍ୱଚ୍ଛତାର ସହ ଆୟୋଜନ କରାଯାଇ ୧ ଲକ୍ଷ ୯୩ ହଜାର ଯୁବକଙ୍କୁ ସରକାରୀ ନିଯୁକ୍ତି ଦିଆଯାଇଛି। ଏହା ବ୍ୟତୀତ ୧ ଲକ୍ଷ ୧୮ ହଜାର ନିଯୁକ୍ତି ପ୍ରକ୍ରିୟା ଜାରି ରହିଛି ଏବଂ ୭୦ ହଜାରରୁ ଅଧିକ ପଦବୀ ପାଇଁ ଖୁବ୍ଶୀଘ୍ର ନିଯୁକ୍ତି ପ୍ରକ୍ରିୟା ଆରମ୍ଭ ହେବ। ଏଥିସହିତ ୫ ଲକ୍ଷ ଯୁବକଙ୍କୁ ଘରୋଇ କ୍ଷେତ୍ରରେ ନିଯୁକ୍ତି ଯୋଗାଇ ଦିଆଯାଇଛି।
ସେ କହିଛନ୍ତି ଯେ, ରାଜ୍ୟରେ ୩ ଲକ୍ଷ ୭୦ ହଜାର ଯୁବକଙ୍କୁ ଦକ୍ଷତା ପ୍ରଶିକ୍ଷଣ ଦିଆଯାଇଛି। ଯୁବ ସମ୍ବଲ ଯୋଜନା ଅଧୀନରେ ୪ ଲକ୍ଷ ହିତାଧିକାରୀଙ୍କୁ ୧,୬୪୩ କୋଟି ଟଙ୍କା ବଣ୍ଟନ କରାଯାଇଛି। ଏକ ଜିଲ୍ଲା-ଏକ କ୍ରୀଡ଼ା ଯୋଜନା ଏବଂ କ୍ରୀଡ଼ା ଜୀବନ ବୀମା ଯୋଜନା ଆରମ୍ଭ କରାଯାଇଛି। ୨୦୨୮ ଅଲିମ୍ପିକ୍ସ ପାଇଁ ବିଶ୍ୱସ୍ତରୀୟ ସୁବିଧା ଯୋଗାଇଦେବା ଲକ୍ଷ୍ୟରେ 'ମିଶନ ଅଲିମ୍ପିକ୍-୨୦୨୮' ଆରମ୍ଭ ହୋଇଛି। ଏଥିପାଇଁ ୨୦ କୋଟି ଟଙ୍କା ବ୍ୟୟରେ ଏକ ସେଣ୍ଟର ଫର୍ ଏକ୍ସିଲେନ୍ସ ପ୍ରତିଷ୍ଠା କରାଯାଉଛି। ସେହିପରି ୫୦ଟି ଖେଲୋ ଇଣ୍ଡିଆ କେନ୍ଦ୍ର ସ୍ଥାପନ କରାଯାଇଛି। ସର୍ଦ୍ଦାର ପଟେଲଙ୍କ ବିଚାରଧାରାକୁ ଆପଣାଇ ଶୃଙ୍ଖଳା, ସେବା ଏବଂ ରାଷ୍ଟ୍ର ପ୍ରଥମ ଭାବନା ସହ କାର୍ଯ୍ୟ କରିବାକୁ ସେ ଆହ୍ୱାନ ଦେଇଥିଲେ।
‘ରନ୍ ଫର୍ ୟୁନିଟି’ କାର୍ଯ୍ୟକ୍ରମରେ ଅନେକ ପଦକ ବିଜେତା କ୍ରୀଡ଼ାବିତ୍ଙ୍କ ସମେତ ବହୁ ସଂଖ୍ୟାରେ ଯୁବକ ଉତ୍ସାହର ସହ ଭାଗ ନେଇଥିଲେ। ଏହି ଅବସରରେ ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀ କର୍ଣ୍ଣେଲ ରାଜ୍ୟବର୍ଦ୍ଧନ ରାଠୋର, ସାଂସଦ ମଦନ ରାଠୋର, ମଞ୍ଜୁ ଶର୍ମା, ମେୟର ସୁନୀଲ କୋଠାରୀ, ଉପମେୟର ସରୋଜ କଁୱର, ମୁଖ୍ୟ ଶାସନ ସଚିବ ଭି. ଶ୍ରୀନିବାସ, ପୋଲିସ ମହାନିର୍ଦ୍ଦେଶକ ରାଜୀବ କୁମାର ଶର୍ମାଙ୍କ ସମେତ ବହୁ ସଂଖ୍ୟାରେ ସାଧାରଣ ଲୋକ ଉପସ୍ଥିତ ଥିଲେ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
