ନୂଆଦିଲ୍ଲୀ, ୦୪ ଅକ୍ଟୋବର (ହି.ସ.)। ବିଦେଶରେ ରହୁଥିବା ଭାରତୀୟମାନଙ୍କୁ ସ୍ୱାଧୀନତା ପାଇଁ ପ୍ରେରିତ କରିଥିବା ମହାନ କ୍ରାନ୍ତିକାରୀ ଶ୍ୟାମଜୀ କୃଷ୍ଣ ବର୍ମାଙ୍କ ଜୟନ୍ତୀରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ତାଙ୍କୁ ଶ୍ରଦ୍ଧାଂଜଳି ଜଣାଇଛନ୍ତି। ତାଙ୍କ ସଂଘର୍ଷ, ତ୍ୟାଗ ଓ ଦେଶ ପ୍ରତି ଅବଦାନକୁ ସ୍ମରଣ କରି ଶାହ କହିଛନ୍ତି ଯେ, ରାଷ୍ଟ୍ର ତାଙ୍କ ଅବଦାନକୁ କେବେ ଭୁଲିବ ନାହିଁ।

ସୋସିଆଲ ମିଡିଆରେ ଏକ ପୋଷ୍ଟ ମାଧ୍ୟମରେ ଗୃହମନ୍ତ୍ରୀ କହିଛନ୍ତି ଯେ, ଲଣ୍ଡନରେ ‘ଇଣ୍ଡିଆ ହାଉସ’ ପ୍ରତିଷ୍ଠା କରି ଶ୍ୟାମଜୀ କୃଷ୍ଣ ବର୍ମା ଇଂରେଜମାନଙ୍କ ମାଟିରୁ ସ୍ୱାଧୀନତାର ଏପରି ଏକ ଜ୍ୟୋତି ପ୍ରଜ୍ୱଳିତ କରିଥିଲେ, ଯାହା କ୍ରାନ୍ତିକାରୀମାନଙ୍କ ଏକ ନୂତନ ପିଢ଼ିକୁ ପ୍ରସ୍ତୁତ କରିଥିଲା।

ସେ କହିଛନ୍ତି ଯେ, ‘ଦ ଇଣ୍ଡିଆନ ସୋସିଓଲୋଜିଷ୍ଟ’ ପତ୍ରିକା ଏବଂ ‘ଇଣ୍ଡିଆନ ହୋମ ରୁଲ ସୋସାଇଟି’ ମାଧ୍ୟମରେ ଶ୍ୟାମଜୀ କୃଷ୍ଣ ବର୍ମା ବ୍ରିଟିଶ ଶାସନର ଦମନମୂଳକ ନୀତିର ମୁଖର ବିରୋଧ କରିଥିଲେ। ବିଦେଶରେ ରହି ଭାରତର ସ୍ୱାଧୀନତା ପାଇଁ ସେ ଯେଉଁ ସଂଘର୍ଷ ଓ ତ୍ୟାଗ କରିଥିଲେ, ତାହା ଦେଶବାସୀଙ୍କ ପାଇଁ ସର୍ବଦା ପ୍ରେରଣାର ଉତ୍ସ ହୋଇ ରହିବ ବୋଲି ଅମିତ ଶାହ କହିଛନ୍ତି।

---------------

ହିନ୍ଦୁସ୍ଥାନ ସମାଚାର / ସମନ୍ୱୟ