ହାଇଦ୍ରାବାଦ, ୦୪ ନଭେମ୍ବର (ହି.ସ.) ପ୍ରବର୍ତନ ନିର୍ଦ୍ଦେଶାଳୟ (ଇଡି) ବୁଧବାର ଏପିପିଏସସି ଗ୍ରୁପ୍-୧ ମୁଖ୍ୟ ପରୀକ୍ଷାରେ ହୋଇଥିବା କଥିତ ଅନିୟମିତତା ସମ୍ପର୍କରେ ଚଢ଼ଉ କରିଛି। ତେଲେଙ୍ଗାନାର ହାଇଦ୍ରାବାଦ ଓ ସିକନ୍ଦରାବାଦ ସମେତ ଆନ୍ଧ୍ରପ୍ରଦେଶର ଗୁଂଟୁର ଜିଲ୍ଲାରେ ମୋଟ ୭ଟି ସ୍ଥାନରେ ଏହି କାର୍ଯ୍ୟାନୁଷ୍ଠାନ କରାଯାଇଛି।

ଇଡିର ହାଇଦ୍ରାବାଦ ଜୋନାଲ କାର୍ଯ୍ୟାଳୟର ତତ୍ୱାବଧାନରେ ବୁଧବାର ସକାଳେ ଧନ ଶୋଧନ ନିବାରଣ ଆଇନ (ପିଏମଏଲଏ)ର ବ୍ୟବସ୍ଥା ଅନୁଯାୟୀ ଏହି ଅଭିଯାନ ଆରମ୍ଭ ହୋଇଥିଲା। ଅଧିକାରୀମାନେ କହିଛନ୍ତି ଯେ ଏପିପିଏସସି ଗ୍ରୁପ୍-୧ ମୁଖ୍ୟ ପରୀକ୍ଷାର ଉତର ଖାତାଗୁଡ଼ିକର ହସ୍ତଚାଳିତ ମୂଲ୍ୟାଙ୍କନ ପ୍ରକ୍ରିୟାରେ ଅନିୟମିତତା ହୋଇଥିବା ଅଭିଯୋଗ ରହିଛି। ଏହି ସମୟରେ କଥିତ ଭାବେ ଏକ ଘରୋଇ କମ୍ପାନୀକୁ ୧,୧୪,୩୨,୩୧୨ ଟଙ୍କା ପ୍ରଦାନ କରାଯାଇଥିଲା।

ଏହି ଚଢ଼ଉ ମୁଖ୍ୟତଃ ତତ୍କାଳୀନ ସଚିବ ତଥା ପୂର୍ବତନ ଆଇପିଏସ୍ ଅଧିକାରୀ ପି. ସୀତାରାମ ଆଞ୍ଜନେୟୁଲୁଙ୍କ ବାସଭବନ ଓ କାର୍ଯ୍ୟାଳୟ, ‘କାମସିନ୍ ମିଡିଆ ପ୍ରାଇଭେଟ୍ ଲିମିଟେଡ୍’ (ଉତର ଖାତାଗୁଡ଼ିକର ହସ୍ତଚାଳିତ ମୂଲ୍ୟାଙ୍କନ କାର୍ଯ୍ୟ ଦାୟିତ୍ୱରେ ଥିବା ସଂସ୍ଥା)ର ପରିସର ଏବଂ କମ୍ପାନୀର ପରିଚାଳନା ନିର୍ଦ୍ଦେଶକ ପି. ମଧୁସୂଦନ ରାଓଙ୍କ ସହ ଜଡ଼ିତ ସ୍ଥାନଗୁଡ଼ିକ ଉପରେ କେନ୍ଦ୍ରିତ ରହିଛି।

ଏହା ବ୍ୟତୀତ ଗୁଂଟୁର ଜିଲ୍ଲାର ଚିନାକାକାନି ଗ୍ରାମସ୍ଥିତ ‘ଆବାସା ରିସର୍ଟ ହାଇଲାଣ୍ଡ’ରେ ମଧ୍ୟ ତଲାସୀ ଚାଲିଛି। ଏଠାରେ ଉତର ଖାତାଗୁଡ଼ିକୁ ରଖାଯାଇଥିଲା ଏବଂ ମୂଲ୍ୟାଙ୍କନ ପ୍ରକ୍ରିୟା ଆୟୋଜିତ ହୋଇଥିଲା।

ଏଥିସହ ଇଡି ‘ଷ୍ଟୋନ୍ ମିଡିଆ ଆଡଭାଇଜରି ସର୍ଭିସେସ୍ ପ୍ରାଇଭେଟ୍ ଲିମିଟେଡ୍’ର ଏକ ବିଭାଗ ‘ଟ୍ରୁଗ୍ରେଡର ସର୍ଭିସେସ୍’ ଉପରେ ମଧ୍ୟ ଚଢ଼ଉ କରିଛି। ଏହି ସଂସ୍ଥା ପୂର୍ବରୁ ଏପିପିଏସସି ପାଇଁ ଡିଜିଟାଲ୍ ମୂଲ୍ୟାଙ୍କନ କାର୍ଯ୍ୟ କରୁଥିଲା। ଏହାର ପରିଚାଳନା ନିର୍ଦ୍ଦେଶକ ଅକେଲା ପେରି ଶ୍ରୀନିବାସ ରାଓ ଏବଂ ଏହି ମୂଲ୍ୟାଙ୍କନ କାର୍ଯ୍ୟରେ ସାମିଲ ଥିବା ମହାକାଳୀ ରଘୁରାମଙ୍କ ସମେତ ଅନ୍ୟ ସଂସ୍ଥା ଓ ବ୍ୟକ୍ତିବିଶେଷଙ୍କ ବାସଭବନ ଏବଂ କାର୍ଯ୍ୟାଳୟରେ ମଧ୍ୟ ଚଢ଼ଉ କରାଯାଇଛି।

ହିନ୍ଦୁସ୍ଥାନ ସମାଚାର / ଗଗନ