ଭୁବନେଶ୍ୱର, 12 ଅଗଷ୍ଟ (ହି.ସ.)- ଡ. ବିକ୍ରମ
ସାରାଭାଇଙ୍କ ଜୟନ୍ତୀରେ ତାଙ୍କୁ ଶ୍ରଦ୍ଧାଂଜଳି ଜ୍ଞାପନ କରିଛନ୍ତି ଉପମୁଖ୍ୟମନ୍ତ୍ରୀ ଓ ବିରୋଧୀ
ଦଳ ନେତା ।
ଏନେଇ ସୋସିଆଲ ମିଡିଆ
ଏକ୍ସରେ ଏକ ବାର୍ତ୍ତା ଜାରି କରି ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ କହିଛନ୍ତି ଯେ, ଭାରତୀୟ
ମହାକାଶ କାର୍ଯ୍ୟକ୍ରମର ଜନକ, ପଦ୍ମ ବିଭୂଷଣ ଡ. ବିକ୍ରମ ସାରାଭାଇଙ୍କ ଜୟନ୍ତୀ ଅବସରରେ ତାଙ୍କ
ପ୍ରତି ମୋର ଗଭୀର ଶ୍ରଦ୍ଧାଞ୍ଜଳି। ତାଙ୍କର ଅଗ୍ରଣୀ ବୈଜ୍ଞାନିକ ଚିନ୍ତାଧାରା ଏବଂ
ଦୂରଦୃଷ୍ଟିସମ୍ପନ୍ନ ଦୃଷ୍ଟିକୋଣ ମହାକାଶ ଅନୁସନ୍ଧାନ କ୍ଷେତ୍ରରେ ଭାରତର ଅସାଧାରଣ ଯାତ୍ରାର
ମୂଳଦୁଆ ପକାଇଥିଲା।
ବିରୋଧୀ ଦଳର ନେତା ତଥା
ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାରତୀୟ ମହାକାଶ କାର୍ଯ୍ୟକ୍ରମର ଜନକ ତଥା ପଦ୍ମ
ବିଭୂଷଣ ସମ୍ମାନରେ ସମ୍ମାନିତ ମହାନ ବୈଜ୍ଞାନିକ ଡ. ବିକ୍ରମ ସାରାଭାଇଙ୍କ ଜୟନ୍ତୀ ଅବସରରେ
ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।
ନବୀନ ପଟ୍ଟନାୟକ ତାଙ୍କ
ସୋସିଆଲ ମିଡିଆ ପୋଷ୍ଟରେ ଡ. ସାରାଭାଇଙ୍କ ରାଷ୍ଟ୍ର ଗଠନରେ ଥିବା ଅବଦାନକୁ ସ୍ମରଣ କରି
କହିଛନ୍ତି ଯେ, ଭାରତର ମହାକାଶ କାର୍ଯ୍ୟକ୍ରମର ମୂଳଦୁଆ ପକାଇବା ଏବଂ ପରମାଣୁ ଶକ୍ତିର
ବିକାଶରେ ତାଙ୍କର ନେତୃତ୍ୱର ଗୁରୁତ୍ୱପୂର୍ଣ୍ଣ ଅବଦାନ ରହିଥିଲା।
ସେ କହିଛନ୍ତି ଯେ, ଭାରତୀୟ
ମହାକାଶ ଗବେଷଣା ସଂଗଠନ ଏବଂ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟ, ଅହମଦାବାଦଭଳି
ପ୍ରତିଷ୍ଠିତ ଜାତୀୟ ଅନୁଷ୍ଠାନର ସ୍ଥାପନାରେ ଡ. ସାରାଭାଇଙ୍କ ଅଗ୍ରଣୀ ଭୂମିକା ତାଙ୍କ ସମୃଦ୍ଧ
ଐତିହ୍ୟର ସ୍ଥାୟୀ ସ୍ତମ୍ଭ ହୋଇ ରହିଛି।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
