ନୂଆଦିଲ୍ଲୀ, ୦୧ ସେପ୍େଟମ୍ବର (ହି.ସ.)- ପଞ୍ଜାବ ବିଶ୍ୱବିଦ୍ୟାଳୟ ଛାତ୍ରସଂଘ ନିର୍ବାଚନରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ କ୍ରମାଗତ ଦ୍ୱିତୀୟ ଥର ଅଧ୍ୟକ୍ଷ ପଦରେ ବିଜୟ ହାସଲ କରିଥିବାରୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଗୃହମନ୍ତ୍ରୀ ଅମିତ ଶାହ, କୃଷି ମନ୍ତ୍ରୀ ଶିବରାଜ ସିଂହ ଚୌହାନ, ବାଣିଜ୍ୟ ଓ ଶିଳ୍ପ ମନ୍ତ୍ରୀ ପୀୟୂଷ ଗୋୟଲ ସମେତ ଅନେକ ନେତା ଅଭାବିପର କାର୍ଯ୍ୟକର୍ତାମାନଙ୍କୁ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି।

ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଙ୍ଗଳବାର ଏକ୍ସ ପୋଷ୍ଟରେ ଅଭାବିପର ବିଜୟ ପାଇଁ କାର୍ଯ୍ୟକର୍ତାମାନଙ୍କୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି ଯେ ଏହି ନିର୍ଣ୍ଣାୟକ ଜନାଦେଶ ଯୁବମାନଙ୍କର ‘ରାଷ୍ଟ୍ର ପ୍ରଥମ’ ଆଦର୍ଶ ପ୍ରତି ଅଟୁଟ ବିଶ୍ୱାସକୁ ପ୍ରତିଫଳିତ କରୁଛି। ସେ ଆଶା ବ୍ୟକ୍ତ କରିଛନ୍ତି ଯେ ଅଭାବିପ ଛାତ୍ର କଲ୍ୟାଣ ଓ ରାଷ୍ଟ୍ର ନିର୍ମାଣ ପାଇଁ ସମ୍ପୂର୍ଣ୍ଣ ନିଷ୍ଠାର ସହ କାମ କରିଚାଲିବ।

ଅମିତ ଶାହ ଏକ୍ସ ପୋଷ୍ଟରେ ପଞ୍ଜାବ ବିଶ୍ୱବିଦ୍ୟାଳୟ ଛାତ୍ରସଂଘ ନିର୍ବାଚନରେ ଅଭାବିପର ବିଜୟ ପାଇଁ ପରିଷଦର ସମସ୍ତ କାର୍ଯ୍ୟକର୍ତାଙ୍କୁ ଅଭିନନ୍ଦନ ଜଣାଇଛନ୍ତି। ସେ କହିଛନ୍ତି ଯେ କ୍ରମାଗତ ଦ୍ୱିତୀୟ ଥର ମିଳିଥିବା ଏହି ବିଜୟ ଯୁବ ଶକ୍ତିର ‘ରାଷ୍ଟ୍ର ପ୍ରଥମ’ ବିଚାରଧାରା ପ୍ରତି ଅଟୁଟ ବିଶ୍ୱାସର ପ୍ରମାଣ। ଶାହ ବିଶ୍ୱାସ ବ୍ୟକ୍ତ କରିଛନ୍ତି ଯେ ପରିଷଦର କାର୍ଯ୍ୟକର୍ତାମାନେ ସ୍ୱାମୀ ବିବେକାନନ୍ଦଙ୍କ ଆଦର୍ଶରେ ଚାଲି ଛାତ୍ରହିତ ପାଇଁ ନିରନ୍ତର ସଂକଳ୍ପବଦ୍ଧ ଭାବରେ କାମ କରିଚାଲିବେ।

କେନ୍ଦ୍ରୀୟ କୃଷି ଓ କୃଷକ କଲ୍ୟାଣ ମନ୍ତ୍ରୀ ଶିବରାଜ ସିଂହ ଚୌହାନ କହିଛନ୍ତି ଯେ ପଞ୍ଜାବ ବିଶ୍ୱବିଦ୍ୟାଳୟ ଛାତ୍ରସଂଘ ନିର୍ବାଚନରେ ଅଭାବିପର କ୍ରମାଗତ ଦ୍ୱିତୀୟ ଥର ଚମତ୍କାର ବିଜୟ ଏହାର ସଙ୍କେତ ଯେ ଆଜିର ଯୁବକ ସକାରାତ୍ମକ ଚିନ୍ତାଧାରା, ସ୍ପଷ୍ଟ ବିଚାର ଓ କାମ କରୁଥିବା ଟିମ୍ ସହ ଠିଆ ହୋଇଛନ୍ତି। ସେ ପରିଷଦର କାର୍ଯ୍ୟକର୍ତାମାନଙ୍କୁ ଅଭିନନ୍ଦନ ଜଣାଇ ଛାତ୍ରହିତକୁ ସର୍ବୋପରି ରଖି ଆଗକୁ ବଢ଼ିବା ପାଇଁ ଶୁଭେଚ୍ଛା ଜଣାଇଛନ୍ତି।

ପୀୟୂଷ ଗୋୟଲ ଅଭାବିପର କ୍ରମାଗତ ଦ୍ୱିତୀୟ ବିଜୟକୁ ବିଶ୍ୱବିଦ୍ୟାଳୟର ଯୁବମାନଙ୍କ ବିଶ୍ୱାସ ଏବଂ ପରିଷଦର କାର୍ଯ୍ୟକର୍ତାମାନଙ୍କ ବର୍ଷ ବର୍ଷର ପରିଶ୍ରମ, ପ୍ରତିବଦ୍ଧତା ତଥା ଛାତ୍ରହିତ ପ୍ରତି ସମର୍ପଣର ବିଜୟ ବୋଲି କହିଛନ୍ତି। ସେ କହିଛନ୍ତି ଯେ ସ୍ୱାମୀ ବିବେକାନନ୍ଦଙ୍କ ବିଚାରରୁ ପ୍ରେରିତ ହୋଇ ଅଭାବିପର ପଞ୍ଜାବର କାର୍ଯ୍ୟକର୍ତାମାନେ ଛାତ୍ରଛାତ୍ରୀଙ୍କ ସ୍ୱର ହୁଅନ୍ତୁ ଏବଂ ବିଶ୍ୱବିଦ୍ୟାଳୟର ବିକାଶରେ ନିଜର ଗୁରୁତ୍ୱପୂର୍ଣ୍ଣ ଭୂମିକା ନିଭାନ୍ତୁ।

----------------------

---------------

ହିନ୍ଦୁସ୍ଥାନ ସମାଚାର / ଗଗନ