ନୂଆପଡ଼ା, ୧୧ ଡ଼ିସେମ୍ବର (ହି.ସ.)- ନୂଆପଡ଼ା ଜିଲ୍ଲା ଖଡ଼ିଆଳ ସ୍ଥିତ ଆଦର୍ଶ ସ୍ନାତକ ମହାବିଦ୍ୟାଳୟର ୟୁଥ ରେଡକ୍ରସ୍ ପକ୍ଷରୁ ଆଖପାଖର ପଶୁମାନଙ୍କ ସୁରକ୍ଷା ପଦ୍ଧତି : କାମୁଡ଼ା ପ୍ରତିରୋଧ ଏବଂ କୁକୁର କାମୁଡ଼ାର ପ୍ରାଥମିକ ଚିକିତ୍ସା ଉପରେ ଏକ ସଚେତନମୂଳକ ଆଲୋଚନାଚକ୍ର ଆଜି ଆୟୋଜିତ ହୋଇଥିଲା । ଏହି ଅଧିବେଶନକୁ ଅଧ୍ୟକ୍ଷ ଡଃ. ଅକ୍ଷୟ କୁମାର ସାହୁ ଆନୁଷ୍ଠାନିକ ଭାବେ ଉଦଘାଟନ କରି କ୍ୟାମ୍ପସରେ ବୁଲା ପଶୁଙ୍କ କାମୁଡ଼ା ରୋକିବା ପାଇଁ ସୁରକ୍ଷା ପଦ୍ଧତି ଉପରେ ଆଲୋକପାତ କରିଥିଲେ । ମାନବ ବିଜ୍ଞାନ ବିଭାଗର ମୁଖ୍ୟ ଡଃ. ଶିବ କୁମାର ମଣିଷ-ପଶୁ ସହବସ୍ଥାନର ଇତିହାସ ଏବଂ ମଣିଷ ଓ କୁକୁର ମଧ୍ୟରେ ଦୀର୍ଘ ଦିନର ପାରସ୍ପରିକ ସମ୍ପର୍କ ଉପରେ ଏକ ସୂଚନାତ୍ମକ ବକ୍ତବ୍ୟ ପ୍ରଦାନ କରିଥିଲେ । ୟୁଥ ରେଡ୍ କ୍ରସର କାଉନସେଲର୍ ଡଃ ସୁବାସ ଚନ୍ଦ୍ର ବିଶ୍ୱାଳ ବିଷୟର ମୁଖ୍ୟ ପ୍ରସଙ୍ଗ ଉପରେ ବକ୍ତବ୍ୟ ରଖିଥିଲେ । ସେ କୁକୁର ଏବଂ ଅନ୍ୟାନ୍ୟ ପଶୁଙ୍କ ଆଚରଣଗତ ଢାଞ୍ଚା, ସତର୍କ ସଙ୍କେତ ଏବଂ କୁକୁର କାମୁଡ଼ିବା ପରେ ଆଶୁ ଚିକିତ୍ସା ବିଷୟରେ ବୁଝାଇଥିଲେ । ଡଃ. ସୁରେନ୍ଦ୍ର କଲେତ ସମାଜ ଉପରେ ପୋଷା କୁକୁର ଏବଂ ବୁଲା କୁକୁର ମଧ୍ୟରେ ବିକଶିତ ସମ୍ପର୍କ ଉପରେ ସୂଚନା ପ୍ରଦାନ କରିଥିଲେ । ଶେଷରେ ୟୁଥ ରେଡ଼କ୍ରସର ସହଯୋଗୀ କାଉନସେଲର୍ ଡଃ. ପ୍ରଦୀପ କାମିଲା ଆନୁଷ୍ଠାନିକ ଭାବେ ଧନ୍ୟବାଦ ଅର୍ପଣ କରିଥିଲେ ।
ଅଧ୍ୟାପକ ଚନ୍ଦ୍ରକାନ୍ତ ଦାସ, ପ୍ରବୀଣ ପଟ୍ଟନାୟକ, ଆଶିଷ ଭୋଇ, ସୌମ୍ୟା ମହାପାତ୍ର ଏବଂ ନିବେଦିତା ବାରିକ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ଏଥିରେ ବହୁ ସଂଖ୍ୟକ ଛାତ୍ରଛାତ୍ରୀ ତଥା ସମସ୍ତ ଅଧ୍ୟାପକ ଅଧ୍ୟାପିକା ଅଂଶଗ୍ରହଣ କରିଥିଲେ ।
ହିନ୍ଦୁସ୍ଥାନ ସମାଚାର / ହେମନ୍ତ
