ବଲାଙ୍ଗିର, ୧ ଜୁନ୍ (ହି.ସ.)- ବର୍ଷ ବର୍ଷର ପରମ୍ପରା ଅନୁଯାୟୀ ପଦ ଓ ରାଜ ଅଭିଷେକରେ କରାଯାଉଛି ଅଭିଷିକ୍ତ । ଏଭଳି ନିଆରା ପରମ୍ପରା ଦେଖିବାକୁ ମିଳିଛି ବଲାଙ୍ଗିର ଜିଲ୍ଲା ଲୋଇସିଂହା ଜମିଦାର ପରିବାରରେ, ଯେଉଁଥିରେ ଗତକାଲି ସାମିଲ ହୋଇଥିଲେ ଆଖପାଖ ଅଞ୍ଚଳର ନେତା, ବୁଦ୍ଧିଜୀବୀ, ଆଇନଜୀବୀ ତଥା ସାଆନ୍ତ ମାନେ । ସାଂପ୍ରତିକ ସମୟର ଗଣତନ୍ତ୍ର ଶାସନରେ ରାଜତନ୍ତ୍ର ପ୍ରଥା ଧୀରେ ଧୀରେ ଲୋପ ପାଇ ଯାଉଥିବା ବେଳେ ଲୋଇସିଂହାରେ ଏବେ ବି ବଞ୍ଚି ରହିଛି ବର୍ଷ ବର୍ଷର ପରମ୍ପରା । ପିଢ଼ି ପରେ ପିଢ଼ି ଜମିଦାର ଶାସନକୁ ସମ୍ମାନ ଦେଇ ଆସୁଛନ୍ତି ଲୋକେ । ଏହି କ୍ରମରେ ୧୯ତମ ଜମିଦାର ପଦ ଗ୍ରହଣ ଓ ରାଜ୍ୟାଭିଷେକ ଉତ୍ସବ ସ୍ଥାନୀୟ ରାଜବାଟି ପରିସର ମଧ୍ୟରେ ଅନୁଷ୍ଠିତ ହୋଇଯାଇଛି । ପ୍ରାକ୍ତନ ଜମିଦାର ଜୟକୃଷ୍ଣ ସିଂ ରାଏଙ୍କ ପରଲୋକ ପରେ ତାଙ୍କ ଉତ୍ତରାଧିକାରୀ ଭାବେ ତାଙ୍କ ନାତୁଣୀ ତଥା ଜ୍ୟେଷ୍ଠ ପୁତ୍ର ସ୍ୱର୍ଗତ ତ୍ରୟମ୍ବକିଶୋର ସିଂ ରାଏଙ୍କ ଜ୍ୟେଷ୍ଠା କନ୍ୟା ଅର୍ଚ୍ଚନା ସିଂ ରାଏ ଜମିଦାର ଭାବେ ଅଭିଷିକ୍ତା ହୋଇଛନ୍ତି । ପ୍ରଥମ ମହିଳା ଭାବେ ସେ ଏହି ପଦବୀ ମଣ୍ଡନ କରିଛନ୍ତି ।
ଏହି ଅବସରରେ ଏକ ବର୍ଣ୍ଣାଢ଼୍ୟ ପରିବେଶରେ ରାଜ ଅଭିଷେକ ଉତ୍ସବ ଅନୁଷ୍ଠିତ ହୋଇଯାଇଛି । ଏଥିରେ ପୂର୍ବତନ ଆଇନମନ୍ତ୍ରୀ ନରସିଂହ ମିଶ୍ର, ଆଦିବାସୀ ନେତା ସତ୍ୟନାରାୟଣ ଭୋଇ, ଦିଲ୍ଲୀପ ବେହେରାଙ୍କ ସମେତ ବିଭିନ୍ନ ଗଡ଼ଜାତ ଅଞ୍ଚଳର ସାଆନ୍ତ ମାନେ ନିମନ୍ତ୍ରିତ ଅତିଥି ଭାବେ ଯୋଗ ଦେଇଥିଲେ । ଏହି ଅବସରରେ ଗୋଣ୍ଡ ପରମ୍ପରା ଅନୁଯାୟୀ ପୂଜାର୍ଚ୍ଚନା ପୂର୍ବକ ଜନସାଧାରଣଙ୍କ ଉପସ୍ଥିତିରେ ଅର୍ଚ୍ଚନା ଦେବୀଙ୍କୁ ପଗଡି ଭିଡି ପୌଷ୍ୟାଭିଶେକ କରାଯିବା ସହିତ ସୁସଜ୍ଜିତ ପାଲିଙ୍କିରେ ବସାଇ ନଗର ପରିକ୍ରମା କରାଯାଇଥିଲା । ବିଭିନ୍ନ ଅଂଚଳରୁ ଆସିଥିବା ସାଆନ୍ତ ମାନେ ଆସନ ଅଳଙ୍କୃତ କରିଥିବା ଅର୍ଚ୍ଚନା ସିଂ ରାଏଙ୍କୁ ଉପଢୌକନ ପ୍ରଦାନ କରି ସିରିପା ପିନ୍ଧାଇଥିଲେ ।
ହିନ୍ଦୁସ୍ଥାନ ସମାଚାର / ଗୋପବନ୍ଧୁ
