ନୂଆଦିଲ୍ଲୀ, ୧୪ ଜୁଲାଇ (ହି.ସ.)- କାଶୀ, ହରିଦ୍ୱାର ଏବଂ ଉଜ୍ଜୈନରୁ ସାରା ଦେଶରେ ଆଜି ଶ୍ରାବଣ ମାସର ପ୍ରଥମ ସୋମବାର ପାଳନ କରାଯାଉଛି। ଲୋକମାନେ ସକାଳୁ ପବିତ୍ର ଜଳଧାରାରେ ସ୍ନାନ ଏବଂ ବୁଡ଼ ପକାଇ ଦେବଙ୍କ ଦେବ ମହାଦେବଙ୍କ ଜଳାଭିଷେକ ଏବଂ ରୁଦ୍ରାଭିଷେକ କରୁଛନ୍ତି। ଶିବ ମନ୍ଦିର ଏବଂ ଅନ୍ୟାନ୍ୟ ମନ୍ଦିରରେ ଶିବ ଦର୍ଶନ ପାଇଁ ଧାଡ଼ି ଲାଗିଛି। ସବୁ ଦିଗରେ ହର ହର ମହାଦେବ ପ୍ରତିଧ୍ୱନିତ ହେଉଛି। ଭଗୀରଥଙ୍କ ତପସ୍ୟା ଯୋଗୁଁ ପୃଥିବୀରେ ଅବତରଣ କରିଥିବା ମାତା ଗଙ୍ଗା ନଦୀ କୂଳରେ ଥିବା ସହର ଏବଂ ଗ୍ରାମର ପବିତ୍ର ଘାଟରେ ଭୋର ତିନିଟାରୁ ଚାରିଟା ସମୟରେ ଲୋକମାନେ ବୁଡ଼ ପକାଇ ଭଗବାନ ଶଙ୍କରଙ୍କୁ ଜଳ ଅର୍ପଣ କରୁଛନ୍ତି। ଏହି ସମୟରେ, ଅମରନାଥ ତୀର୍ଥଯାତ୍ରୀଙ୍କ କଷ୍ଟକର ଯାତ୍ରା ଜାରି ରହିଛି। ଦକ୍ଷିଣ ରାଜ୍ୟ ତାମିଲନାଡୁର ମଦୁରୈର ଥିରୁପରନକୁନ୍ଦ୍ରମରେ ସୁବ୍ରମଣ୍ୟମ ସ୍ୱାମୀ ମନ୍ଦିରରେ କୁମ୍ଭଭିଷେକମ ଆୟୋଜନ କରାଯାଇଛି। ଉତ୍ତରପ୍ରଦେଶର ଅଯୋଧ୍ୟାରେ କ୍ଷୀରେଶ୍ୱର ନାଥ ମନ୍ଦିରରେ ଭକ୍ତମାନେ ପୁଜାର୍ଚ୍ଚନା କରୁଛନ୍ତି। ବାରାଣସୀର କାଶୀ ବିଶ୍ୱନାଥ ମନ୍ଦିରରେ ଭକ୍ତଙ୍କ ଭିଡ଼ ଜମିଛି। ଜାତୀୟ ରାଜଧାନୀ ଦିଲ୍ଲୀର ଚାନ୍ଦନୀ ଚୌକରେ ଅବସ୍ଥିତ ଗୌରୀ ଶଙ୍କର ମନ୍ଦିରରେ ତିଳ ରଖିବା ପାଇଁ ମଧ୍ୟ ସ୍ଥାନ ନାହିଁ। ଲୋକମାନେ ଧୈର୍ଯ୍ୟର ସହିତ ଜଳାଭିଷେକ ପାଇଁ ଆଗକୁ ବଢ଼ୁଛନ୍ତି। ସାରା ଦେଶରେ ଶିବ ମନ୍ଦିରରେ ସମାନ ଦୃଶ୍ୟ ଦେଖିବାକୁ ମିଳୁଛି। ଉତ୍ତରାଖଣ୍ଡର ହରିଦ୍ୱାରରେ ମା ଗଙ୍ଗାରେ ବୁଡ଼ ପକାଇଛନ୍ତି। ଏଠାରେ ଥିବା ଦକ୍ଷେଶ୍ୱର ମହାଦେବ ମନ୍ଦିରରେ ଭକ୍ତଙ୍କ ଲମ୍ବା ଧାଡ଼ି ଲାଗିଛି।

---------------

ହିନ୍ଦୁସ୍ଥାନ ସମାଚାର / ରଶ୍ମିତା