ଭୁବନେଶ୍ୱର, ୨୯ ଜୁଲାଇ (ହି.ସ)- ଭୁବନେଶ୍ୱର ଉନ୍ନୟନ କ୍ର୍ୃପକ୍ଷ ପକ୍ଷରୁ ସମସ୍ତ ଆବଂଟନ ପ୍ରାପ୍ତକାରୀଙ୍କୁ ୩୧ ଅଗଷ୍ଟ ସୁଦ୍ଧା ଏକ ୟୁନିକ୍ ଆକାଉଂଟ୍ ନମ୍ବର (ୟୁଏଏନ୍) ଜେନେରେଟ୍ କରିବାକୁ ନିବେଦନ କରାଯାଇଛି। ଏହି ୟୁଏଏନ୍ ବିଭିନ୍ନ ପୂର୍ବ ଓ ପରବର୍ତୀ ଆବଂଟନ ସେବା ପାଇଁ ବାଧ୍ୟତାମୂଳକ ରହିବ । ସଂପୃକ୍ତ ସେବାଗୁଡ଼ିକ ମଧ୍ୟରେ ସମ୍ପତି ଆବଂଟନ, ଲିଜ୍ ଡିଡ୍ କାର୍ଯ୍ୟକାରୀ କରିବା, ଋଣ ପାଇଁ ଆପତିମୁକ୍ତ ପ୍ରମାଣପତ୍ର (ଏନଓସି) ପ୍ରାପ୍ତି, ସମ୍ପତି ହସ୍ତାନ୍ତର ଏବଂ ଲିଜ୍ହୋଲ୍ଡରୁ ଫ୍ରିହୋଲ୍ଡ ଜମିରେ ପରିବର୍ତନ ଭଳି ସେବା ଅନ୍ତର୍ଭୁକ୍ତ ରହିବ ବୋଲି ବିଡିଏ ପକ୍ଷରୁ କୁହାଯାଇଛି।
ଆବେଦନକାରୀମାନେ ବିଡିଏର ସରକାରୀ ୱେବସାଇଟ୍ ଡବ୍ଲୁଡବ୍ଲୁଡବ୍ଲୁ.ବିଡିଏ.ଜିଓଭି .ଇନ୍ ପରିଦର୍ଶନ କରି ନିଜର ୟୁଏଏନ୍ (ୟୁନିକ୍ ଆକାଉଣ୍ଟ୍ ନମ୍ବର) ତିଆରି କରିପାରିବେ। ଏହି ୟୁନିକ୍ ଆକାଉଣ୍ଟ୍ ନମ୍ବର (ୟୁଏଏନ୍) ଭବିଷ୍ୟତରେ ବିଡିଏ ସହିତ ସମସ୍ତ କାରବାର ଏବଂ ଆବେଦନ ପାଇଁ ଏକ ସ୍ୱତନ୍ତ୍ର ରେଫରେନ୍ସ ନମ୍ବର ଭାବେ କାର୍ଯ୍ୟ କରିବ। ଆବେଦନକାରୀମାନଙ୍କୁ ପଞ୍ଜିକରଣ ପ୍ରକ୍ରିୟା ଏବଂ ସମ୍ବନ୍ଧୀୟ ପ୍ରଶ୍ନରେ ସାହାଯ୍ୟ କରିବା ନିମନ୍ତେ ବିଡିଏ ଏହାର କାର୍ଯ୍ୟାଳୟରେ ଏକ ୟୁଏଏନ୍ ସୁବିଧା କେନ୍ଦ୍ର ସ୍ଥାପନ କରିବ।
ସେହିପରି, ଲିଜ୍ ହୋଲ୍ଡ ସମ୍ପତିକୁ ଫ୍ରିହୋଲ୍ଡ ଜମିରେ ପରିବର୍ତନ କରିବା ପାଇଁ ଚାଲୁଥିବା ପ୍ରକ୍ରିୟାରେ ବିଡିଏ ଏକ ଗୁରୁତ୍ୱପୂର୍ଣ୍ଣ ଅଗ୍ରଗତି ହାସଲ କରିଛି। ଲିଜ୍ ହୋଲ୍ଡରୁ ଫ୍ରିହୋଲ୍ଡ ପରିବର୍ତନ ପାଇଁ ପ୍ରାପ୍ତ ୧,୨୫୦ଟି ଆବେଦନ ମଧ୍ୟରୁ, ବିଡିଏ ଏପର୍ଯ୍ୟନ୍ତ ୭୪୩ଟି ଆବେଦନ ସଫଳତାର ସହିତ ପଞ୍ଜୀକୃତ କରିଛି। ଏଥିମଧ୍ୟରୁ ଉଲ୍ଲେଖନୀୟ ଭାବେ, ଆବେଦନକାରୀ ୮୪୩ଟି ଆବେଦନ ବିଡିଏ ଅନଲାଇନ୍ ପୋର୍ଟାଲ୍ ମାଧ୍ୟମରେ ଦାଖଲ କରିଛନ୍ତି। ଯାହା ଡିଜିଟାଲ୍ ପ୍ରକ୍ରିୟା ପ୍ରତି ଜନସାଧାରଣଙ୍କ ଆଗ୍ରହକୁ ପ୍ରତିଫଳିତ କରୁଛି ।
ଫ୍ରିହୋଲ୍ଡ ମାନ୍ୟତା ପାଇଁ ଯୋଗ୍ୟ ହେବା ପାଇଁ, ଆବଂଟିତ ବ୍ୟକ୍ତିଙ୍କୁ ନିଜ ପ୍ଲଟରେ ଗୃହ ନିର୍ମାଣ କରି ଅତି କମରେ ପାଞ୍ଚ ବର୍ଷ ଧରି ସେଠାରେ ବସବାସ କରିଥିବା ଆବଶ୍ୟକ। ଏହା ସହ, ପରିବର୍ତନ ପାଇଁ ଆବେଦନ କରିବା ପୂର୍ବରୁ ଭୁବନେଶ୍ୱର ଉନ୍ନୟନ କର୍ତୃପକ୍ଷ (ବିଡିଏ) ସହ ଏକ ବୈଧ ଲିଜ୍ ଡିଡ୍ ହୋଇଥିବା ଜରୁରୀ।
ସେହିଭଳି ଏହି ପରିବର୍ତନ କାର୍ଯ୍ୟକ୍ରମ ଅଧୀନରେ ୨୭ଟି ଗୃହ ଯୋଜନା ଅନ୍ତର୍ଭୁକ୍ତ ହୋଇଥିବା ନେଇ ବିଡିଏ ପକ୍ଷରୁ ସୂଚନା ଦିଆଯାଇଛି। ଏହାର ପ୍ରମୁଖ ଯୋଜନାଗୁଡ଼ିକ ମଧ୍ୟରେ ପୋଖରୀପୁଟ ପର୍ଯ୍ୟାୟ-୧, ପର୍ଯ୍ୟାୟ-୨ ଏବଂ ପର୍ଯ୍ୟାୟ-୩, ଚନ୍ଦ୍ରଶେଖରପୁରର ପ୍ରାଚୀ ଏନକ୍ଲେଭ, ଲୁମ୍ବିନୀ ବିହାର, ପାତ୍ରପଡ଼ାର ଉଦୟଗିରି ବିହାର ଏବଂ ଭୀମପୁରର ଲିଙ୍ଗରାଜ ବିହାର ଅନ୍ତର୍ଭୁକ୍ତ ରହିଛି।
ଆବାସିକ ପ୍ଲଟ୍ ର ଫ୍ରିହୋଲ୍ଡ ପରିବର୍ତନ ଶୁଳ୍କ ରାଜ୍ୟ ସରକାରଙ୍କ ଦ୍ୱାରା ୨୦୨୪ ବର୍ଷ ପାଇଁ ସ୍ଥିର କରାଯାଇଥିବା ଘରୋଇ ଜମିର ସର୍ବଶେଷ ବେଞ୍ଚମାର୍କ ମୂଲ୍ୟାଙ୍କନର ୩% ଧାର୍ଯ୍ୟ କରାଯାଇଛି।
ଏହାଛଡା ଯେଉଁ ଆବେଦନକାରୀଙ୍କ ପ୍ଲଟ୍ ବନ୍ଧକ ରଖାଯାଇଛି, ସେମାନଙ୍କୁ ସମ୍ପୃକ୍ତ ଆର୍ôଥକ ସଂସ୍ଥାରୁ ଏକ ଆପତିମୁକ୍ତ ପ୍ରମାଣପତ୍ର (ଏନଓସି) ଦାଖଲ କରିବାକୁ ହେବ। ଏହା ସହିତ, କୌଣସି ଦେୱାନୀ ବିବାଦ ନ ଥିବା ଏକ ଶପଥପତ୍ର ମଧ୍ୟ ଦାଖଲ କରିବା ଆବଶ୍ୟକ। ଯଦି କୌଣସି ଆଇନଗତ ମାମଲା ବିଚାରାଧୀନ ଥାଏ, ତେବେ କୋର୍ଟ ଚୂଡ଼ାନ୍ତ ରାୟ ପ୍ରଦାନ କରିବା ପରେ ହିଁ ଆବେଦନ ଉପରେ ବିଚାର କରାଯିବ ବୋଲି କୁହାଯାଇଛି।
ଏହା ବ୍ୟତୀତ, ଯେଉଁମାନେ ସରକାରୀ, ସାର୍ବଜନୀନ ଉଦ୍ୟୋଗ ବା ବିଡିଏ ଜମି ଉପରେ ଜବରଦଖଲ କରିଛନ୍ତି, ସେମାନେ ଫ୍ରିହୋଲ୍ଡ ପରିବର୍ତନ ପାଇଁ ଯୋଗ୍ୟ ହେବା ନିମନ୍ତେ ପ୍ରଥମେ ଜବରଦଖଲ କରିଥିବା ସମ୍ପତି ଖାଲି କରି ଏ ବାବଦରେ ଏକ ସତ୍ୟପାଠ ଦାଖଲ କରିବା ଆବଶ୍ୟକ। ଅନ୍ୟଥା, ସେମାନେ ଫ୍ରିହୋଲ୍ଡ ପରିବର୍ତନ ପାଇଁ ଅଯୋଗ୍ୟ ହେବେ ବୋଲି ବିଡିଏ ପକ୍ଷରୁ ସୂଚନା ଦିଆଯାଇଛି।
---------------
ହିନ୍ଦୁସ୍ଥାନ ସମାଚାର / ବନ୍ଦନା
