ଆଜି ଅପରାହ୍ନ ରେ ଶ୍ରୀମନ୍ଦିରରେ ରାହୁରେଖା ନୀତି, ୪ଘଣ୍ଟା ଦର୍ଶନ ବନ୍ଦ

ପୁରୀ,, 13 ଅଗଷ୍ଟ (ହି.ସ.)ଶ୍ରୀମନ୍ଦିରରେ ରାହୁରେଖା ନୀତି ପାଇଁ ବୁଧବାର ଅପରାହ୍ନ ସାଢେ ୨ଟାରୁ ସଂନ୍ଧ୍ଯା ସାଢେ ୬ଟା ପର୍ଯ୍ୟନ୍ତ ଭକ୍ତ ଦର୍ଶନ ବନ୍ଦ ରହିବ । ସ୍ନାନପୂର୍ଣ୍ଣମୀ ଦିନ ମହାପ୍ରଭୁଙ୍କ ମସ୍ତକରୁ ସୁବର୍ଣ୍ଣ ରାହୁରେଖା ଓଲାଗି କରାଯାଇ ରତ୍ନଭଣ୍ଡାରରେ ରଖାଯାଇଥିଲା । ଭାଦ୍ରବ ମାସ କୃଷ୍ଣପକ୍ଷ ପଞ୍ଚମୀ ତିଥିରେ ଏହି ରାହୁରେଖା ନୀତି ଅନୁଷ୍ଠିତ ହେବ । ପ୍ରଥମ ଭୋଗ ମଣ୍ଡପ ଶେଷ ହେବା ପରେ ରାହୁରେଖା ନୀତି ଆରମ୍ଭ ହେବ । ଶ୍ରୀବିଗ୍ରହଙ୍କ କପାଳରେ ସ୍ବର୍ଣ୍ଣ ନିର୍ମିତ ଏକ ବଳୟ ପଟି ଲାଗି ହେବ । ଗୋପାଳ ବଲ୍ଲଭଭୋଗ ବଢିବା ପରେ ଚଢାଉକରଣ ଓ ଦେଉଳକରଣ ସେବକ ଭଣ୍ଡାର ମେକାପକୁ କହି ଭଣ୍ଡାର ଘରୁ ମୁଦ ହୋଇ ରଖାଯାଇଥିବା ରାହୁ ରେଖାକୁ ଆଣି ବେହେରଣ ଦ୍ୱାର ନିକଟରେ ବଣିଆ ସେବକଙ୍କୁ ଦେବା ପରେ ସେ ଏହାକୁ ମାଜି ସଫା କରିବେ । ଭୋଗମଣ୍ଡପ ନୀତି ବଢିବା ପରେ ପାଳିଆ ସେବକ ଓ ଶ୍ରୀଅଙ୍ଗଲାଗି ଦଇତାପତି ସେବକ ଜୟବିଜୟ ଦ୍ୱାର ବନ୍ଦ କରି ଏହି ଗୁପ୍ତ ନୀତି ସମାପନ କରିବେ । ପାଳିଆ ପୁଷ୍ପାଳକ ସେବକ ରତ୍ନସିଂହାସନ ଉପରେ ଚଢି ଝୋବାକଣ୍ଠି ମଇଲମ କରିବେ । ମହାଜନ ସେବକ ଭୂଦେବୀ ଓ ଶ୍ରୀଦେବୀଙ୍କୁ ଖଟଶେଜ ଘରେ ବିଜେ କରାଇବେ । ଶୁଦ୍ଧସୁଆର ସେବକ ରତ୍ନସିଂହାସନ ତଳେ ଓଷୁଅ ପ୍ରସ୍ତୁତ କରି ରଖିବେ । ଦଇତାପତି ସେବକ ଓଷୁଅ ଓ ଚାଙ୍ଗଡା ମେକାପଙ୍କ ଠାରୁ ସଫା ଧଳା କପଡା ନେଇ ଶ୍ରୀମୁଖରେ ରାହୁରେଖା ଲାଗି କରିବେ । ପରେ ରତ୍ନସିଂହାସନ ପୋଛା ମରାଯିବ । ପରେ ମହାସ୍ନାନ ନୀତି ଅନୁଷ୍ଠିତ ହେବ । ମହାସ୍ନାନ ନୀତି ପରେ ଭକ୍ତ ମାନେ ଶ୍ରୀଜୀଉଙ୍କ ଦର୍ଶନ କରିବେ ।

---------------

ହିନ୍ଦୁସ୍ଥାନ ସମାଚାର / ବିଜୟ