ନୂଆଦିଲ୍ଲୀ, ଅଗଷ୍ଟ ୫ (ହି.ସ.)- ରାଷ୍ଟ୍ରୀୟ ସ୍ୱୟଂସେବକ ସଂଘ ଏହାର ପ୍ରତିଷ୍ଠାର ଶହେ ବର୍ଷ ପୂରଣ କରିଛି। ଏବେ ସଂଘ ଆଗାମୀ ଏକ ବର୍ଷ ପାଇଁ ସମାଜ ମଧ୍ୟରେ ସଂଘ, ସଂଘର କାର୍ଯ୍ୟ, ଚିନ୍ତାଧାରା ଏବଂ ପ୍ରେରଣା ସହିତ ଯିବ। ଏହି କ୍ରମରେ, ସରସଂଘଚାଳକ ମୋହନ ଭାଗବତ ଆସନ୍ତା ବର୍ଷ ଫେବୃଆରୀ ପର୍ଯ୍ୟନ୍ତ ଦେଶର ଚାରୋଟି ବଡ଼ ସହରରେ ଚାରୋଟି ପ୍ରମୁଖ ବକ୍ତୃତାମାଳାକୁ ସମ୍ବୋଧିତ କରିବେ। ଏହି ବକ୍ତୃତାମାଳାକୁ ଅଗଷ୍ଟ ୨୬ ରୁ ୨୮ ପର୍ଯ୍ୟନ୍ତ ଦିଲ୍ଲୀରେ ଆୟୋଜନ କରାଯିବ। ଏଥିରେ ଦିଲ୍ଲୀ ଏବଂ ଆଖପାଖ ରାଜ୍ୟର ବିଭିନ୍ନ କ୍ଷେତ୍ରର ପ୍ରମୁଖ ବ୍ୟକ୍ତିତ୍ୱଙ୍କୁ ନିମନ୍ତ୍ରଣ କରାଯିବ।

ଦିଲ୍ଲୀର କେଶବକୁଞ୍ଜସ୍ଥିତ ସଂଘ ମୁଖ୍ୟାଳୟରେ ମଙ୍ଗଳବାର ଏକ ସାମ୍ବାଦିକ ସମ୍ମିଳନୀରେ ଅଖିଳ ଭାରତୀୟ ପ୍ରଚାର ପ୍ରମୁଖ ସୁନୀଲ ଆମ୍ବେକର ଏହି କାର୍ଯ୍ୟକ୍ରମ ବିଷୟରେ ସୂଚନା ଦେଇଥିଲେ। ସେ କହିଥିଲେ ଯେ ବକ୍ତୃତାମାଳାର ବିଷୟ 'ସଂଘର ଯାତ୍ରାର ୧୦୦ ବର୍ଷ - ନୂତନ ଦିଗନ୍ତ' ରଖାଯାଇଛି। ସଂଘ ମୁଖ୍ୟ ତାଙ୍କ ବକ୍ତୃତାମାଳାରେ ପଂଚ ପରିବର୍ତନର ବିଷୟକୁ ସମାଜ ସମ୍ମୁଖରେ ପ୍ରମୁଖ ଭାବରେ ରଖିବେ। ଦିଲ୍ଲୀର ବିଜ୍ଞାନ ଭବନରେ ଆୟୋଜିତ ବକ୍ତୃତାରେ, ପ୍ରଥମ ଦୁଇ ଦିନରେ ଜ୍ଞାନାନୁଷ୍ଠାନ ଅଧିବେଶନ ଆୟୋଜନ କରାଯିବ ଏବଂ ତୃତୀୟ ଦିନରେ ପ୍ରଶ୍ନ ଓ ଉତର ଆୟୋଜନ କରାଯିବ।

ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ) ପ୍ରତିଷ୍ଠାର ୧୦୦ ବର୍ଷ ପୂରଣ ଅବସରରେ, ସଂଘ ସମାଜରେ ଏହାର ଚିନ୍ତାଧାରା, କାର୍ଯ୍ୟ ଏବଂ ଦିଗଦର୍ଶନ ପହଂଚାଇବା ଲକ୍ଷ୍ୟରେ ବିଭିନ୍ନ ନାଗରିକ ଆଲୋଚନାଚକ୍ରର ଏକ ଶୃଙ୍ଖଳା ଆରମ୍ଭ କରିଛି। ସରସଂଘଚାଳକଙ୍କ ବକ୍ତୃତା ଶୃଙ୍ଖଳା ବେଙ୍ଗାଲୁରୁ, କୋଲକାତା ଏବଂ ମୁମ୍ବାଇ ଭଳି ମହାନଗରଗୁଡ଼ିକରେ ମଧ୍ୟ ଆୟୋଜିତ ହେବ।

ଦିଲ୍ଲୀ କାର୍ଯ୍ୟକ୍ରମ ସମ୍ପର୍କରେ, ଆମ୍ବେକର କହିଛନ୍ତି ଯେ ଏନସିଆର ଏବଂ ଆଖପାଖ ରାଜ୍ୟର ପ୍ରମୁଖ ନାଗରିକମାନଙ୍କୁ ବକ୍ତୃତା ପାଇଁ ନିମନ୍ତ୍ରଣ କରାଯାଉଛି। ୧୭ଟି ପ୍ରମୁଖ ବର୍ଗରେ ମନୋନୀତ ଅତିଥିଙ୍କ ତାଲିକା ପ୍ରସ୍ତୁତ କରାଯାଇଛି, ଯେଉଁଥିରେ ମୋଟ ୧୩୮ଟି ଉପ-ବର୍ଗ ଅନ୍ତର୍ଭୁକ୍ତ। ଗଣମାଧ୍ୟମ ସହିତ ଜଡିତ ପ୍ରମୁଖ ବ୍ୟକ୍ତି, ମୁସଲିମ ସମ୍ପ୍ରଦାୟର ପ୍ରତିନିଧି ଏବଂ ବିଭିନ୍ନ ଦୂତାବାସ ସହିତ ଯୋଗାଯୋଗ କରି ମଧ୍ୟ ନିମନ୍ତ୍ରଣ ପଠାଯାଉଛି।

ସାମ୍ବାଦିକ ସମ୍ମିଳନୀରେ ସଂଘର ପ୍ରାନ୍ତ ସଂଘଚାଳକ ଅନିଲ ଅଗ୍ରୱାଲ ମଧ୍ୟ ମଂଚ ଉପରେ ଉପସ୍ଥିତ ଥିଲେ। ଏହା ବ୍ୟତୀତ ଅଖିଳ ଭାରତୀୟ ସମ୍ପର୍କ ପ୍ରମୁଖ ରାମଲାଲ, ଦିଲ୍ଲୀର ପ୍ରାନ୍ତ କାର୍ଯ୍ୟବାହ ଅନିଲ ଗୁପ୍ତା ଏବଂ ସଂଘର ଅଖିଳ ଭାରତୀୟ ସହ-ପ୍ରଚାର ପ୍ରମୁଖ ନରେନ୍ଦ୍ର କୁମାର ମଧ୍ୟ ଏହି ସମୟରେ ଉପସ୍ଥିତ ଥିଲେ।

----------------

---------------

ହିନ୍ଦୁସ୍ଥାନ ସମାଚାର / ଗଗନ