କୋଲକାତା, ୧୩ ସେପ୍ଟେମ୍ବର (ହି.ସ.)- ନେପାଳରେ ସାମ୍ପ୍ରତିକ ରାଜନୈତିକ ସଙ୍କଟ ମଧ୍ୟରେ ନେପାଳରେ ଫସି ରହିଥିବା ଭାରତୀୟଙ୍କ ପ୍ରତ୍ୟାବର୍ତନ ପ୍ରକ୍ରିୟା ଏବେ ବି ଜାରି ରହିଛି । ପଶ୍ଚିମବଙ୍ଗର ବାଙ୍କୁଡ଼ା ଜିଲ୍ଲାର ୧୦ ଜଣ ପ୍ରବାସୀ ଶ୍ରମିକ ଏବେ ସୁରକ୍ଷିତ ଭାବରେ ଘରକୁ ଫେରିଛନ୍ତି । ଏମାନଙ୍କ ମଧ୍ୟରୁ ୭ ଜଣ ଶ୍ରମିକ ହୀରାବନ୍ଧ ବ୍ଲକର ମୋଲିଆନ୍ ଅଂଚଳର ଲାଲବଜାର ଗାଁର ବାସିନ୍ଦା, ଅନ୍ୟ ଦୁଇ ଜଣ ଶ୍ରମିକଙ୍କ ମଧ୍ୟରୁ ଜଣେ ସିମଲାପାଳର ଲକ୍ଷ୍ମୀସାଗରର ବାସିନ୍ଦା ଏବଂ ଅନ୍ୟ ଜଣେ ବିଷ୍ଣୁପୁରର ବାସିନ୍ଦା ।

ଏହି ସମସ୍ତ ଶ୍ରମିକ ନେପାଳର ବୀରଗଞ୍ଜରେ ଏକ କଂସା-ପିତଳ ବାସନ ତିଆରି କାରଖାନାରେ କାମ କରୁଥିଲେ । ନେପାଳରେ ସାମ୍ପ୍ରତିକ ରାଜନୈତିକ ସଙ୍କଟ ଯୋଗୁଁ ପରିସ୍ଥିତି ଆହୁରି ଖରାପ ହୋଇଯାଇଥିଲା ଏବଂ ଶ୍ରମିକମାନେ କାରଖାନା ଭିତରେ ଫସି ରହିଥିଲେ । ଅନେକ ଦିନ ଧରି ଭୟ ଏବଂ ଅନିଶ୍ଚିତତାର ସମ୍ମୁଖୀନ ହେବା ପରେ, ଶେଷରେ ସେମାନେ ନିରାପଦରେ ଭାରତ ଫେରିବା ଆରମ୍ଭ କରିଛନ୍ତି ।

ଲାଲ ବଜାରର ବାସିନ୍ଦା ପ୍ରଶାନ୍ତ କର୍ମକାର ଶନିବାର କହିଛନ୍ତି ଯେ, ଗତ ଗୁରୁବାର ଅପରାହ୍ନରେ କିଛି ସମୟ ପାଇଁ କର୍ଫ୍ୟୁ କୋହଳ କରାଯାଇଥିଲା । ତା’ପରେ ସେ ତାଙ୍କ ସାଥୀମାନଙ୍କ ସହିତ ଏକ କାର୍ ଭଡ଼ା ନେଇ ନେପାଳର ବୀରଗଞ୍ଜରୁ ପ୍ରାୟ ୧୫ କିଲୋମିଟର ଯାତ୍ରା କରିଥିଲେ । ଏହା ପରେ ସେମାନେ ୧୦ କିଲୋମିଟର ଚାଲି ଚାଲି ବୀରଗଞ୍ଜ-ରକ୍ସୌଲ ସୀମାରେ ପହଂଚିଥିଲେ । ଅନେକ ସ୍ଥାନରେ ଯାଂଚ୍ କରାଯାଇଥିଲା, କିନ୍ତୁ ଆଧାର କାର୍ଡ ଦେଖାଇବା ପରେ ସେମାନଙ୍କୁ ଛାଡି ଦିଆଯାଇଥିଲା ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ