ସମ୍ବଲପୁର, ୧୯ ସେପ୍ଟେମ୍ବର (ହି.ସ.) ସମ୍ବଲପୁର ମହାନଗର ନିଗମ ଅନ୍ତର୍ଗତ ତାଲପାଲିରେ ଫେଲ ମାରିଛି ସ୍ଵଛ ଭାରତ ଅଭିଯାନ। ମଳମୁକ୍ତଗାଁ ଘୋଷଣା ହୋଇଥିଲେ ବି ରାଜରାସ୍ତାରେ ପଡ଼ିରହିଛି କୁଢକୁଢ ମଳ। ମାଛି ଭଣ ଭଣ ରାସ୍ତା ପାଲଟିଛି ଦୁର୍ଗନ୍ଧମୟ । ମାନେଶ୍ଵର ଠାରୁ କିସିଣ୍ଡା ଯାଇଥିବା ତାଲପାଲି ରାସ୍ତା ୨ କଡ଼ ପାଲଟିଛି ଖୋଲା ଶୌଚାଳୟ। ଆବାଳ ବୃଦ୍ଧ ବନିତା ଏହି ରାସ୍ତାକୁ ଆଦରି ନେଇଛନ୍ତି ନିଜର ଶୌଚାଳୟ ଭାବରେ। କାହାକୁ ଲାଜ କି ଭୟ ନାହିଁ, ବର୍ଷ ବର୍ଷ ଧରି ଆପଣେଇ ନେଇଛନ୍ତି ରାଜରାସ୍ତାରେ ମଳତ୍ୟାଗ ଭଳି ଅସହାୟ ଜୀବନ। 'ଗାଁ ପରିମଳ ଧୋବା ତୁଠ'ରୁ ପରି ଗାଁ ର ପରିବେଶ କହିଲେ ନସରେ।ସତେ ଯେମିତି ଏଠି ହଜି ଯାଇଛି ମଣିଷର ମାନବିକତା।ଏହି ରାସ୍ତା ପାରି ହୋଇ ନେତାଠୁ ଅଧିକାରୀ ଶହ ଶହ ଜନତା ଯିବା ଆସିବା କରୁଥିଲେବି କାହାର ନଜର ପଡିବା ଅବା ଏହାର ପ୍ରତିକାର ବ୍ୟବସ୍ଥା ପ୍ରତି ପଦକ୍ଷେପ କେହି ଗ୍ରହଣ ନକରିବା ପ୍ରଶାସନର କେବଳ ବିଫଳତାକୁ ଦର୍ଶାଯାଉନି ବରଂ ଏଠି ସ୍ଵଛ ଭାରତ ଅଭିଯାନ ଭୁଷୁଡ଼ି ପଡିଥିବା ଦର୍ଶାଉଛି। ବର୍ଷ ବର୍ଷ ଧରିଏହି ରାସ୍ତା ଖୋଲା ଶୌଚାଳୟରେ ପରିଣତ ହୋଇଥିବାରୁ, ମେଘପାଳ, କିସିଣ୍ଡା ଭଳି ଅଞ୍ଚଳରୁ ଶୁଭିଲାଣି ପ୍ରତିବାଦର ସ୍ୱର।

ସରକାରଙ୍କ ଯୋଜନାନୁସାରେ ପ୍ରତ୍ୟେକ ଘରେ ଶୌଚାଳୟ ପାଇଖାନା ଅଛି।ଏହାପରେ ମଧ୍ୟ ଶହ ଶହ ଲୋକ ଆସି ରାସ୍ତା କଡ଼ରେ ସନ୍ଧ୍ୟା ଓ ସକାଳ ସମୟରେ ମଳତ୍ୟାଗ କରୁଛନ୍ତି।ଯାହା କି ସେଇ ବ୍ୟସ୍ତ ବହୁଳ ରାସ୍ତାରେ ଦୁର୍ଗନ୍ଧ ମୟ ପରିବେଶ ବାଟୋଇ ପଥ ଚାରିଙ୍କ ପାଇଁ କାଳ ସାଜିଛି।ସେଇ ରାସ୍ତା ଦେଇ ଯାଉଥିବା କିସିଣ୍ଡା ନାକଟିଦେଉଳ ଅଞ୍ଚଳର ଅନେକ ବୁଦ୍ଧିଜୀବୀ ଗଣମାଧ୍ୟମ ଆଗରେ ପ୍ରତିକ୍ରିୟା ପ୍ରକାଶ କରିଛନ୍ତି କି ଗାଁ ଲୋକ ରାସ୍ତା କଡ଼ରେ ମଳ ତ୍ୟାଗ ନ କରନ୍ତୁ ଏବଂ ପ୍ରଶାସନ ପକ୍ଷରୁ ସଚେତନତା ସୃଷ୍ଟି କରାଯାଇ ତାଲପାଲି ର ଏହି ନକାରାତ୍ମକ ଦିଗ ପ୍ରତି ସ୍ୱତନ୍ତ୍ର ଦୃଷ୍ଟି ଦିଆଯାଉ।

---------------

ହିନ୍ଦୁସ୍ଥାନ ସମାଚାର / ଶୈଳେଶ