ସମ୍ବଲପୁର, ୦୯, ଜାନୁଆରୀ (ହି.ସ.) ହୀରାକୁଦ ଜଳଭଣ୍ଡାର ହ୍ରଦର ୧୭୫୦ ବର୍ଗ କିଲୋମିଟର ଅଞ୍ଚଳରେ ଚଳିତ ବର୍ଷ ଶୀତ ଋତୁରେ ଆସିଥିବା ଦେଶ ବିଦେଶର ପକ୍ଷୀ ମାନଙ୍କ ଗଣନା ଆସନ୍ତା ୧୮ ତାରିଖ ଦିନ କରାଯିବ । ଏଥିପାଇଁ ହୀରାକୁଦ ବନ୍ୟପ୍ରାଣୀ ଡ଼ିଭିଜନ ପକ୍ଷରୁ ପ୍ରସ୍ତୁତି ଚୁଡ଼ାନ୍ତ ରହିଛି । ଜଳଭଣ୍ଡାର ଓ ଆଖପାଖରେ ଥିବା ଜଳାଶୟ ସହିତ ଜଙ୍ଗଲକୁ ନେଇ ପକ୍ଷୀଗଣନା ସକାଶେ ୨୧ ଟି ସେକ୍ସନ କରାଯାଇଛି । ଏଥିରେ ୩୨ ଜଣ ପକ୍ଷୀ ବିଶେଷଜ୍ଞ ଏବଂ ୩୮ ଜଣ କ୍ଷେତ୍ରସ୍ଥଳର ଅଧିକାରୀ ଏବଂ କର୍ମଚାରୀ ସାମିଲ ହେବେ ବୋଲି ଡ଼ିଭିଜନର ଡ଼ିଏଫଓ ଅଂଶୁପ୍ରଜ୍ଞା ଦାସ କହିଛନ୍ତି ।ଏବେ ପକ୍ଷୀମାନଙ୍କ କଳରବରେ ହୀରାକୁଦ ହ୍ରଦ ମୁଖରିତ ହେଉଛି । ଏହି ହ୍ରଦକୁ ନଭେମ୍ବର ମାସରୁ ହଜାର ହଜାର କିଲୋମିଟର ଆକାଶ ପଥ ଅତିକ୍ରମ କରି ପକ୍ଷୀ ମାନେ ଆସିଥାନ୍ତି । ମାର୍ଚ୍ଚ ପ୍ରାଥମାଦ୍ଧ ସୁଦ୍ଧା ଏମାନେ ସ୍ୱଦେଶ ପ୍ରତ୍ୟାବର୍ଜନ କରନ୍ତି । ବନ୍ୟପ୍ରାଣୀ ଡ଼ିଭିଜନ ପକ୍ଷରୁ ଏହି ପକ୍ଷୀ ମାନଙ୍କ ପାଇଁ ସୁରକ୍ଷା ପାଇଁ ବନ୍ଦୋବସ୍ଥା ସହିତ ସଚେତନତା ସକାଶେ ପକ୍ଷୀ ଗ୍ରାମ ଭଳି ପଦକ୍ଷେପ ନିଆଯାଇଛି । ଏହି ହୀରାକୁଦ ହ୍ରଦରେ ଭାରତର ଇଗ୍ରେଟସ, ହେରନ୍ତି, କର୍ମୋମୋରା, ଲାଫଷ୍ଟିଙ୍ଗ ପ୍ରଭୃତି ପ୍ରଜାତିର ପକ୍ଷୀ ଆସନ୍ତି । ଶୀତ ଋତୁରେ ଆସୁଥିବା ପରିବ୍ରାଜକ ପକ୍ଷୀଙ୍କ ମଧ୍ୟରେ ଋଷ, ସାଇରବେରିଆ, କେନ୍ଦ୍ରିୟ ଏସିଆର ପିଣ୍ଟଲ, ସୋଭଲର, ଟିଲ, ପୋଚାର୍ଡ, ମଙ୍ଗୋଲିଆ, ତିବେଟ ଏବଂ କେନ୍ଦ୍ରିୟ ଏସିଆର ବାର ହେଡେଡ ଗୁସ, ୟୁରୋପ ଓ ଋଷର ଗଡ ୱିଥ, ସେଣ୍ଡ ପାଇପର୍ସ ଓ ସ୍ନାଇପ ଏବଂ ୟୁରୋପ ଓ କେନ୍ଦ୍ରିଅ ଏସିଆ ଦେଶ ସମୁହରୁ ବ୍ରାଉନ ହେଡେଡ ଗଲ, ୱିଷ୍କର୍ଡ ଟର୍ଣ୍ଣ ପ୍ରଭୃତି ପ୍ରଜାତିର ପକ୍ଷୀ ରହିଛନ୍ତି । ଗତବର୍ଷ ପକ୍ଷୀଗଣନା ସମୟରେ ରେକର୍ଡ ୧୨୨ ପ୍ରଜାତିର ୩ ଲକ୍ଷ ୭୭ହଜାର ୭୩୨ ଦେଶ ବିଦେଶର ପକ୍ଷୀ ହୀରାକୁଦ ଆସିଥିଲେ। ୨୦୨୪ ମସିହାରେ ୧୧୩ ପ୍ରଜାତିର ୩ ଲକ୍ଷ ୪୨ ହଜାର ୩୪୫ ଏବଂ ୨୦୨୩ରେ ୧୦୯ ପ୍ରଜାତିର ୩ ଲକ୍ଷ ୧୬ ହଜାର ୫୭୫ ବିଦେଶୀ ପକ୍ଷୀ ଆସିଥିଲେ ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
