ଇମ୍ଫାଲ, ଅକ୍ଟୋବର ୧୩ (ହି.ସ.) - ସୀମା ସୁରକ୍ଷା ବାହିନୀ (ବି. ଏସ୍. ଏଫ୍.) ମହାନିର୍ଦ୍ଦେଶକ ପ୍ରବୀଣ କୁମାର ମଙ୍ଗଳବାର ଦିନ ଇମ୍ଫାଲର ବାବୁପାରା ସ୍ଥିତ ମୁଖ୍ୟମନ୍ତ୍ରୀଙ୍କ ସଚିବାଳୟରେ ମଣିପୁର ମୁଖ୍ୟମନ୍ତ୍ରୀ ୟୁମ୍ନମ ଖେମଚନ୍ଦ ସିଂହଙ୍କୁ ଭେଟିଛନ୍ତି। ଏହି ବୈଠକରେ ରାଜ୍ୟର ବର୍ତମାନର ଆଇନ ଶୃଙ୍ଖଳା ପରିସ୍ଥିତି ଏବଂ ସୁରକ୍ଷା ବ୍ୟବସ୍ଥାର ସମୀକ୍ଷା କରାଯାଇଥିଲା।

ଏହି ବୈଠକରେ ବି. ଏସ୍. ଏଫ୍. ପୂର୍ବ କମାଣ୍ଡର ଅତିରିକ୍ତ ମହାନିର୍ଦ୍ଦେଶକ ସୁମିତ ଶରଣ ଏବଂ ବି. ଏସ୍. ଏଫ୍. ମହାନିରୀକ୍ଷକ ରବି କାନ୍ତ ମଧ୍ୟ ଉପସ୍ଥିତ ଥିଲେ। ଅଧିକାରୀମାନେ ରାଜ୍ୟରେ ବର୍ତମାନର ସୁରକ୍ଷା ପରିସ୍ଥିତି, ଆଇନ ଶୃଙ୍ଖଳା, ସୀମା ପରିଚାଳନା ଏବଂ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ପଦକ୍ଷେପ ଉପରେ ଆଲୋଚନା କରିଥିଲେ। ବି. ଏସ୍. ଏଫ୍. ର ପ୍ରତିଷ୍ଠା ଦିବସ ପାଇଁ ପ୍ରସ୍ତୁତି ଉପରେ ମଧ୍ୟ ଆଲୋଚନା କରାଯାଇଥିଲା।

ମଣିପୁରର ତିନୋଟି ପାର୍ବତ୍ୟାଂଚଳ ଜିଲ୍ଲାରେ ନିକଟରେ ଘଟିଥିବା ଗୁଳି ବିନିମୟ ଏବଂ ଜାତିଗତ ଉତେଜନା ବୃଦ୍ଧି ଘଟଣା ମଧ୍ୟରେ ଏହି ବୈଠକ ଅନୁଷ୍ଠିତ ହୋଇଛି। ଏହି ଘଟଣାରେ ନଅ ଜଣଙ୍କର ମୃତ୍ୟୁ ଘଟିଥିବା ସୂଚନା ମିଳିଛି, ଯାହା ରାଜ୍ୟର ସୁରକ୍ଷା ପରିସ୍ଥିତିକୁ ନେଇ ଚିନ୍ତା ବଢ଼ାଇଛି।

ଏହି ଅଂଚଳରେ ସୁରକ୍ଷା ଏବଂ ସ୍ଥିରତା ବଜାୟ ରଖିବା ପାଇଁ ବି. ଏସ୍. ଏଫ୍. ର ନିରନ୍ତର ପ୍ରୟାସ ଏବଂ ସମର୍ପଣକୁ ମୁଖ୍ୟମନ୍ତ୍ରୀ ୟୁମ୍ନାମ ଖେମଚାନ୍ଦ ସିଂହ ପ୍ରଶଂସା କରିଥିଲେ। ଉଦୀୟମାନ ସୁରକ୍ଷା ଆହ୍ୱାନର ମୁକାବିଲା କରିବା ଏବଂ ରାଜ୍ୟରେ ଶାନ୍ତି ବଜାୟ ରଖିବା ପାଇଁ ରାଜ୍ୟ ସରକାର ଏବଂ ସୁରକ୍ଷା ବାହିନୀ ମଧ୍ୟରେ ଉନ୍ନତ ସମନ୍ୱୟର ଆବଶ୍ୟକତା ଉପରେ ମଧ୍ୟ ବୈଠକ ଗୁରୁତ୍ୱାରୋପ କରିଥିଲା ।

ହିନ୍ଦୁସ୍ଥାନ ସମାଚାର / ଭାନୁ ଚରଣ