ରିୟାଦ, ୧୩ ଅକ୍ଟୋବର (ହି.ସ.)। ସାଉଦି ଆରବର ବାୟୁ ପ୍ରତିରକ୍ଷା ପ୍ରଣାଳୀ ଇରାନ ସମର୍ଥିତ ହୁତି ବିଦ୍ରୋହୀଙ୍କ ଦେଶର ଏକ ପ୍ରମୁଖ ସହରକୁ ଟାର୍ଗେଟ୍ କରିବା ଉଦ୍ୟମକୁ ବିଫଳ କରିଦେଇଛି। ଅଧିକାରୀଙ୍କ କହିବା ଅନୁଯାୟୀ, ଖମିସ୍ ମୁଶାଇତ୍ ସହର ଆଡ଼କୁ ନିକ୍ଷେପ କରାଯାଇଥିବା ଦୁଇଟି ବାଲିଷ୍ଟିକ୍ କ୍ଷେପଣାସ୍ତ୍ରକୁ ଆକାଶ ମଧ୍ୟରେ ସଫଳତାର ସହ ଅଟକାଇ ନଷ୍ଟ କରିଦିଆଯାଇଛି। ଏହି ଘଟଣା ପରଠାରୁ ସ୍ଥାନୀୟ ପ୍ରଶାସନ ଓ ସୁରକ୍ଷା ଏଜେନ୍ସିଗୁଡ଼ିକ ସମ୍ପୂର୍ଣ୍ଣ ସତର୍କ ରହିଛନ୍ତି।
ଗଲ୍ଫ ନ୍ୟୁଜ୍, ଅଲ୍ ଜଜିରା ଏବଂ ଆରବ ନ୍ୟୁଜ୍ର ରିପୋର୍ଟ ଅନୁଯାୟୀ, ୟେମେନରେ ବୈଧ ସରକାରକୁ ପୁନଃସ୍ଥାପନ କରିବା ପାଇଁ ଗଠିତ ସାଉଦି ନେତୃତ୍ୱାଧୀନ ମେଣ୍ଟ ଏହି ବିପଜ୍ଜନକ ଆକ୍ରମଣର ପୁଷ୍ଟି କରିଛି। କ୍ଷେପଣାସ୍ତ୍ରଗୁଡ଼ିକ ଆକାଶରେ ନଷ୍ଟ ହୋଇଯିବାରୁ ଏହାର କିଛି ଖଣ୍ଡ ଆଖପାଖରେ ଥିବା କୋଠା ଓ ଯାନବାହନ ଉପରେ ପଡ଼ିଥିଲା। ତେବେ ଆଶ୍ୱସ୍ତିର ବିଷୟ ହେଉଛି, ଏହି ଘଟଣାରେ କୌଣସି ଜୀବନହାନି କିମ୍ବା ସମ୍ପତ୍ତିହାନି ହୋଇନାହିଁ। ସୁରକ୍ଷା ବାହିନୀ ତୁରନ୍ତ ମୋର୍ଚ୍ଚା ସମ୍ଭାଳିବା ସହ ପରିସ୍ଥିତିକୁ ନିୟନ୍ତ୍ରଣକୁ ନେଇ ସ୍ଥିତିର ସମୀକ୍ଷା କରିଥିଲେ।
ଖମିସ୍ ମୁଶାଇତ୍ ଦକ୍ଷିଣ-ପଶ୍ଚିମ ସାଉଦି ଆରବର ଅସିର୍ ପ୍ରଦେଶରେ ଅବସ୍ଥିତ ଏକ ପ୍ରମୁଖ ସହର। ଏହା ଅସିର୍ ପ୍ରଦେଶର ରାଜଧାନୀ ଆଭାଠାରୁ ପ୍ରାୟ ୨୭ କିଲୋମିଟର ପୂର୍ବରେ ଅବସ୍ଥିତ। ରିୟାଦ, ଜେଦ୍ଦା, ମକ୍କା ଓ ମଦିନା ପରେ ଏହାକୁ ସାଉଦି ଆରବର ପଞ୍ଚମ ବୃହତ୍ତମ ସହର ବୋଲି ବିବେଚନା କରାଯାଏ। ମେଣ୍ଟର ମୁଖପାତ୍ର ମେଜର ଜେନେରାଲ୍ ତୁର୍କି ଅଲ୍-ମାଲିକି କହିଛନ୍ତି ଯେ ସୋମବାର ମଧ୍ୟରାତ୍ରି ପରେ ୟେମେନ ସୀମା ଆଡ଼ୁ ହୁତି ବିଦ୍ରୋହୀମାନେ ଖମିସ୍ ମୁଶାଇତ୍ ବାୟୁସେନା ଘାଟି ଆଡ଼କୁ ଦୁଇଟି ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଥିଲେ। ତେବେ ଏହାକୁ ଅଟକାଇ ନଷ୍ଟ କରିଦିଆଯାଇଥିଲା।
ଏହା ପୂର୍ବରୁ ସାଉଦି ନାଗରିକ ସୁରକ୍ଷା ଏଜେନ୍ସି ଖମିସ୍ ମୁଶାଇତ୍ ପାଇଁ ସମ୍ଭାବ୍ୟ ବିପଦ ସମ୍ପର୍କରେ ସତର୍କ ସୂଚନା ଜାରି କରିଥିଲା। ମେଣ୍ଟର ମୁଖପାତ୍ର ଏକ୍ସ ପୋଷ୍ଟ ମାଧ୍ୟମରେ ଏହି ଘଟଣା ସମ୍ପର୍କରେ ସୂଚନା ଦେଇଥିଲେ। ସୋମବାର ମେଣ୍ଟ ପକ୍ଷରୁ କୁହାଯାଇଥିଲା ଯେ ଡ୍ରୋନ୍ ଓ କ୍ରୁଜ୍ କ୍ଷେପଣାସ୍ତ୍ର ଦ୍ୱାରା କରାଯାଇଥିବା ଆକ୍ରମଣର ଜବାବ ଦିଆଯାଉଛି। ହୁତି ବିଦ୍ରୋହୀମାନେ ସାଉଦି ଆରବର ବିମାନବନ୍ଦର ଓ ତୈଳ ପ୍ରତିଷ୍ଠାନଗୁଡ଼ିକୁ ଟାର୍ଗେଟ୍ କରିଛନ୍ତି।
ଶନିବାର ହୁତିଙ୍କ ଆକ୍ରମଣରେ କିଙ୍ଗ୍ ଖାଲିଦ୍ ଅନ୍ତର୍ଜାତୀୟ ବିମାନବନ୍ଦରରେ ୧୩ ଜଣଙ୍କ ମୃତ୍ୟୁ ହୋଇସାରିଛି। ବୁଧବାର ଓ ଗୁରୁବାର ହୋଇଥିବା ଆକ୍ରମଣରେ ଆଉ ୪ ଜଣ ଏବଂ ରବିବାର ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ସୋମବାର ରିୟାଦର ବାହାର ଅଞ୍ଚଳରେ ଅବସ୍ଥିତ ଏହି ବୃହତ୍ ବିମାନବନ୍ଦରରେ କାର୍ଯ୍ୟ ବନ୍ଦ ରହିଥିଲା।
ଆମେରିକୀୟ ନାଗରିକ ଅଟକ
ରିୟାଦସ୍ଥିତ ଆମେରିକୀୟ ଦୂତାବାସ ସୋମବାର କହିଛି ଯେ ସାଉଦି ଆରବରେ ସମ୍ପ୍ରତି ହୋଇଥିବା ଆକ୍ରମଣର ଭିଡିଓ ରେକର୍ଡ କରୁଥିବା କିଛି ଆମେରିକୀୟ ନାଗରିକଙ୍କୁ ଅଟକ ରଖାଯାଇଛି। ତେବେ ସେମାନଙ୍କ ସଂଖ୍ୟା ସମ୍ପର୍କରେ ଦୂତାବାସ ପକ୍ଷରୁ କୌଣସି ସୂଚନା ଦିଆଯାଇନାହିଁ। ଦୂତାବାସ କହିଛି ଯେ ଏଣିକି ଆମେରିକା ସରକାରଙ୍କ କର୍ମଚାରୀମାନଙ୍କୁ ସାଉଦି ଆରବର ଯେକୌଣସି ବିମାନବନ୍ଦର ବ୍ୟବହାର କରିବା ପୂର୍ବରୁ ଦୂତାବାସର ଅନୁମତି ନେବାକୁ ପଡ଼ିବ।
୭୦ଟି ଦେଶ ଆକ୍ରମଣକୁ କଲେ ନିନ୍ଦା
ସାଉଦି ଆରବର ଅଧିକାରୀମାନେ କହିଛନ୍ତି ଯେ ଇସ୍ଲାମିକ୍ ବ୍ୟାପାର ମନ୍ତ୍ରୀ ଅବଦୁଲ୍ ଲତିଫ୍ ଅଲ୍-ଶେଖ୍ଙ୍କୁ ୭୦ଟି ଦେଶର ୧୭୬ ଜଣ ମନ୍ତ୍ରୀ ଓ ବିଦ୍ୱାନଙ୍କଠାରୁ ବାର୍ତ୍ତା ମିଳିଛି। ସମସ୍ତେ ହୁତି ଆକ୍ରମଣକୁ ନିନ୍ଦା କରିବା ସହ ଏହା ମକ୍କା ଓ ମଦିନାର ଦୁଇ ପବିତ୍ର ମସଜିଦ୍, ସାଧାରଣ ନାଗରିକ ଓ ତୀର୍ଥଯାତ୍ରୀଙ୍କ ସୁରକ୍ଷା ସହିତ ସମଗ୍ର ଅଞ୍ଚଳର ସ୍ଥିରତା ପ୍ରତି ବିପଦ ସୃଷ୍ଟି କରୁଥିବା କହିଛନ୍ତି। ସାଉଦି ଆରବର ଗ୍ରାଣ୍ଡ୍ ମୁଫତି ତଥା ବରିଷ୍ଠ ବିଦ୍ୱାନ ପରିଷଦର ଅଧ୍ୟକ୍ଷ ସାଲେହ ବିନ୍ ଫୌଜାନ ବିନ୍ ଅବଦୁଲ୍ଲା ଅଲ୍-ଫୌଜାନ ଏହି ଆକ୍ରମଣଗୁଡ଼ିକୁ “ସବୁଠାରୁ ବଡ଼ ଅପରାଧ ମଧ୍ୟରୁ ଗୋଟିଏ” ବୋଲି କହିଛନ୍ତି।
ହିନ୍ଦୁସ୍ଥାନ ସମାଚାର / ସ୍ୱାଗତିକା
