ନୂଆଦିଲ୍ଲୀ, ୧୫ ଅକ୍ଟୋବର (ହି.ସ.)। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ଭିଡିଓ କନ୍ଫରେନ୍ସିଂ ମାଧ୍ୟମରେ ଲଦାଖରେ ପ୍ରାୟ ୩,୩୫୦ କୋଟି ଟଙ୍କା ବ୍ୟୟରେ ନିର୍ମିତ ପାଞ୍ଚଟି ବିକାଶ ପ୍ରକଳ୍ପର ଉଦ୍ଘାଟନ କରିଛନ୍ତି। ଏହି ପ୍ରକଳ୍ପଗୁଡ଼ିକ ଦ୍ୱାରା ଅଞ୍ଚଳରେ ବିମାନ ଯୋଗାଯୋଗ, ସାମରିକ ସଡ଼କ ସଂଯୋଗ, ବିଦ୍ୟୁତ୍ ଯୋଗାଣ, ସାଂସ୍କୃତିକ ଐତିହ୍ୟର ସଂରକ୍ଷଣ ଏବଂ ଜଳ ସୁରକ୍ଷା ଅଧିକ ସୁଦୃଢ଼ ହେବ ବୋଲି ଆଶା କରାଯାଉଛି।

ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ, ଲଦାଖର ପ୍ରଗତି ଓ ବିକାଶରେ ଆଜି ଏକ ନୂଆ ଅଧ୍ୟାୟ ଯୋଡ଼ି ହୋଇଛି। ଏହି ପ୍ରକଳ୍ପଗୁଡ଼ିକ ଦ୍ୱାରା ଲୋକଙ୍କ ଯାତ୍ରା ସହଜ ହେବ, ବିଦ୍ୟୁତ୍ ଓ ଜଳ ଉପଲବ୍ଧତାରେ ଉନ୍ନତି ଆସିବ ଏବଂ ପ୍ରାଚୀନ ଐତିହ୍ୟର ସଂରକ୍ଷଣକୁ ନୂଆ ଶକ୍ତି ମିଳିବ। ଏହି ପ୍ରକଳ୍ପଗୁଡ଼ିକର ନିର୍ମାଣରେ ଅବଦାନ ରଖିଥିବା ଇଞ୍ଜିନିୟର, ଶ୍ରମିକ, ସ୍ଥାନୀୟ ବାସିନ୍ଦା ଏବଂ ସୀମା ସଡ଼କ ସଂଗଠନ (ବିଆର୍ଓ)ର କର୍ମଚାରୀମାନଙ୍କୁ ସେ ପ୍ରଶଂସା କରିଥିଲେ।

ପ୍ରଧାନମନ୍ତ୍ରୀ ଲେହସ୍ଥିତ କୁଶୋକ ବକୁଲା ରିମ୍ପୋଚେ ବିମାନବନ୍ଦରରେ ପ୍ରାୟ ୬୪୦ କୋଟି ଟଙ୍କା ବ୍ୟୟରେ ନିର୍ମିତ ନୂତନ ଯାତ୍ରୀ ଟର୍ମିନାଲ୍ ଭବନର ଉଦ୍ଘାଟନ କରିଥିଲେ। ପ୍ରାୟ ୨୩,୮୦୦ ବର୍ଗମିଟର ଅଞ୍ଚଳରେ ପରିବ୍ୟାପ୍ତ ଏହି ଟର୍ମିନାଲ୍ର ବାର୍ଷିକ ଯାତ୍ରୀ କ୍ଷମତା ୧୦ ଲକ୍ଷରୁ ବୃଦ୍ଧି ପାଇ ପ୍ରାୟ ୩୫ ଲକ୍ଷ ହେବ। ଶକ୍ତିର ଦକ୍ଷ ବ୍ୟବହାର ବୃଦ୍ଧି ଏବଂ ଅଙ୍ଗାରକ ନିର୍ଗମନ ହ୍ରାସ କରିବା ପାଇଁ ଏଥିରେ ଭୂତାପୀୟ ଶକ୍ତି ଆଧାରିତ ଉତ୍ତାପ ବ୍ୟବସ୍ଥା କରାଯାଇଛି। ଆଧୁନିକ ଯାତ୍ରୀ ସୁବିଧା ସହ ଲଦାଖର ସାଂସ୍କୃତିକ ଐତିହ୍ୟକୁ ସାମିଲ କରାଯାଇଥିବା ଏହି ଟର୍ମିନାଲ୍ ଅଞ୍ଚଳରେ ପର୍ଯ୍ୟଟନକୁ ମଧ୍ୟ ପ୍ରୋତ୍ସାହିତ କରିବ।

ମୋଦୀ ୨୯୮ କିଲୋମିଟର ଦୀର୍ଘ ନିମ୍ମୁ-ପଦମ-ଦର୍ଚା ସଡ଼କକୁ ମଧ୍ୟ ଦେଶ ଉଦ୍ଦେଶ୍ୟରେ ସମର୍ପଣ କରିଥିଲେ। ପ୍ରାୟ ୨,୫୦୦ କୋଟି ଟଙ୍କା ବ୍ୟୟରେ ନିର୍ମିତ ଏହି ସଡ଼କ ଲେହର ନିମ୍ମୁକୁ ହିମାଚଳ ପ୍ରଦେଶର ଦର୍ଚା ସହ ଯୋଡ଼ିଛି ଏବଂ ଜାନ୍ସକର ଉପତ୍ୟକା ଦେଇ ଯାଇଛି। ପ୍ରଧାନମନ୍ତ୍ରୀ କହିଥିଲେ ଯେ, ଏହି ମାର୍ଗରେ ପୂର୍ବରୁ ପ୍ରାୟ ୧୨ ଘଣ୍ଟା ଲାଗୁଥିବା ଯାତ୍ରା ଏବେ ପ୍ରାୟ ୩ ଘଣ୍ଟାରେ ସମ୍ପୂର୍ଣ୍ଣ ହୋଇପାରିବ। ଏହାଦ୍ୱାରା ସ୍ଥାନୀୟ ଲୋକଙ୍କ ଯାତାୟାତ ସହ ବାଣିଜ୍ୟ ଓ ବ୍ୟବସାୟ ମଧ୍ୟ ଉପକୃତ ହେବ। ଏହି ମାର୍ଗ ଶ୍ରୀନଗର-ଲେହ ଏବଂ ମନାଲି-ଲେହ ରାଜପଥ ବ୍ୟତୀତ ଅନ୍ୟ ଏକ ସଂଯୋଗ ପଥ ଯୋଗାଇବ। ଏଥିସହ ଦୁର୍ଗମ ସୀମାନ୍ତ ଅଞ୍ଚଳରେ ସଶସ୍ତ୍ର ବାହିନୀର ଯାତାୟାତ ଓ ରସଦ ଯୋଗାଣ ବ୍ୟବସ୍ଥା ଅଧିକ ସୁଦୃଢ଼ ହେବ।

ପ୍ରଧାନମନ୍ତ୍ରୀ ୯ ମେଗାୱାଟ୍ର କ୍ଷୁଦ୍ର ଜଳବିଦ୍ୟୁତ୍ ପ୍ରକଳ୍ପ ଏବଂ ୬୬ କେଭିର ଡବଲ୍-ସର୍କିଟ୍ ଦାହ-ହାନୁ-ଖାଲସି ବିଦ୍ୟୁତ୍ ପରିବହନ ଲାଇନ୍ର ମଧ୍ୟ ଉଦ୍ଘାଟନ କରିଥିଲେ। ଏହି ପ୍ରକଳ୍ପଗୁଡ଼ିକ ଦ୍ୱାରା ବିଦ୍ୟୁତ୍ ଯୋଗାଣର ନିର୍ଭରଯୋଗ୍ୟତା ବୃଦ୍ଧି ପାଇବା ସହ ଉତ୍ପାଦିତ ବିଦ୍ୟୁତ୍ର ପରିବହନ ବ୍ୟବସ୍ଥା ସୁଦୃଢ଼ ହେବ ବୋଲି ଆଶା କରାଯାଉଛି।

ଏହାବ୍ୟତୀତ ସେ ଲେହର ସିନ୍ଧୁ ଘାଟରେ ଭାରତର ପ୍ରଥମ ଶିଳାଚିତ୍ର ସଂରକ୍ଷଣ ପାର୍କର ଉଦ୍ଘାଟନ କରିଥିଲେ। ଏହି ପାର୍କ ଅଞ୍ଚଳରେ ଥିବା ପ୍ରାଚୀନ ଶିଳାଚିତ୍ର ଓ ଶିଳାରେ ଖୋଦିତ ଆକୃତିଗୁଡ଼ିକର ସଂରକ୍ଷଣ, ଜନସଚେତନତା ସୃଷ୍ଟି ଏବଂ ଐତିହ୍ୟ ପର୍ଯ୍ୟଟନକୁ ପ୍ରୋତ୍ସାହନ ଦେବ।

ମୋଦୀ ‘ପ୍ରୋଜେକ୍ଟ ଅମୃତ ହିମ ସରୋବର’ ଅଧୀନରେ ଲଦାଖର ୪୦ଟି ଗାଁରେ ନିର୍ମିତ ୪୦ଟି ଜଳାଶୟର ମଧ୍ୟ ଉଦ୍ଘାଟନ କରିଥିଲେ। ଏହି ପଦକ୍ଷେପର ଉଦ୍ଦେଶ୍ୟ ହେଉଛି ଜଳ ସଂରକ୍ଷଣ ଏବଂ ଉପଲବ୍ଧ ଜଳର ଉତ୍ତମ ପରିଚାଳନା। ଏହି ଜଳାଶୟଗୁଡ଼ିକ ବୁଣାବୁଣିର ଗୁରୁତ୍ୱପୂର୍ଣ୍ଣ ସମୟରେ କୃଷକମାନଙ୍କୁ ଜଳ ଯୋଗାଇବା, ଜଳସେଚନ ବ୍ୟବସ୍ଥାରେ ସୁଧାର ଆଣିବା ଏବଂ କୃଷି ଜୀବିକାକୁ ଅଧିକ ସ୍ଥାୟୀ କରିବାରେ ସହାୟକ ହେବ ବୋଲି ଆଶା କରାଯାଉଛି।

ପ୍ରଧାନମନ୍ତ୍ରୀ କହିଥିଲେ ଯେ, କେନ୍ଦ୍ର ସରକାର ଲଦାଖର ବିକାଶ ଏବଂ ଏଠାକାର ନୂଆ ପିଢ଼ିକୁ ଉତ୍ତମ ସୁଯୋଗ ଯୋଗାଇଦେବାକୁ ପ୍ରାଥମିକତା ଦେଉଛନ୍ତି। ଲେହରେ ଏକ ଉତ୍କର୍ଷ କେନ୍ଦ୍ର ବିକଶିତ କରାଯାଉଛି। ଏଥିସହ ଭାରତୀୟ ପ୍ରଯୁକ୍ତିବିଦ୍ୟା ସଂସ୍ଥାନ (ଆଇଆଇଟି) ଜମ୍ମୁ ଏବଂ ଭାରତୀୟ ପରିଚାଳନା ସଂସ୍ଥାନ (ଆଇଆଇଏମ୍) ଜମ୍ମୁର ଉପଗ୍ରହ କ୍ୟାମ୍ପସ୍ ସ୍ଥାପନ ପ୍ରସ୍ତାବଗୁଡ଼ିକୁ ମଧ୍ୟ ଆଗକୁ ବଢ଼ାଯାଉଛି। ଏହାଦ୍ୱାରା ଯୁବପିଢ଼ି ନିଜ ଅଞ୍ଚଳରେ ହିଁ ଉଚ୍ଚଶିକ୍ଷା, ଗବେଷଣା, ପ୍ରଯୁକ୍ତିବିଦ୍ୟା ଏବଂ ନୂତନ ଦକ୍ଷତା ହାସଲ କରିବାର ସୁଯୋଗ ପାଇପାରିବେ।

ଲଦାଖରେ କ୍ରୀଡ଼ାର ଅପାର ସମ୍ଭାବନା ସମ୍ପର୍କରେ ଉଲ୍ଲେଖ କରି ମୋଦୀ କହିଥିଲେ ଯେ, ଏଠାକାର ଯୁବକଯୁବତୀମାନେ ଆଇସ୍ ହକି, ଶୀତକାଳୀନ କ୍ରୀଡ଼ା ଏବଂ ପର୍ବତାରୋହଣ କ୍ଷେତ୍ରରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି। ନୂତନ କ୍ରୀଡ଼ା ନୀତି ମାଧ୍ୟମରେ କ୍ରୀଡ଼ା ପ୍ରତିଭାମାନଙ୍କୁ ଆଗକୁ ବଢ଼ାଇବା ସହ ସେମାନଙ୍କୁ ଉନ୍ନତ ପ୍ରଶିକ୍ଷଣ ଓ ସୁବିଧା ଯୋଗାଇଦେବାକୁ ପ୍ରୟାସ କରାଯାଉଛି। ଏହାଦ୍ୱାରା ସେମାନେ ଜାତୀୟ ଓ ଅନ୍ତର୍ଜାତୀୟ ସ୍ତରରେ ସଫଳତା ହାସଲ କରିପାରିବେ।

ମୋଦୀ କହିଥିଲେ ଯେ, ପ୍ରାକୃତିକ ପରିସ୍ଥିତି ଯୋଗୁଁ ଲଦାଖରେ ଜୀବନଯାପନ କରିବାରେ ଅନେକ ଚ୍ୟାଲେଞ୍ଜ ରହିଛି। କିନ୍ତୁ ପୂର୍ବ ସରକାରଗୁଡ଼ିକ ଏହାର ବିକାଶକୁ ଯଥେଷ୍ଟ ପ୍ରାଥମିକତା ଦେଇନଥିଲେ। ବର୍ତ୍ତମାନ କେନ୍ଦ୍ର ସରକାରଙ୍କ ପାଇଁ ଲଦାଖର ବିକାଶ ଏକ ଗୁରୁତ୍ୱପୂର୍ଣ୍ଣ ପ୍ରାଥମିକତା। ଏହି ପ୍ରକଳ୍ପଗୁଡ଼ିକ ଅଞ୍ଚଳର ଭିତ୍ତିଭୂମିକୁ ସୁଦୃଢ଼ କରିବା ସହ ଲୋକଙ୍କ ଜୀବନଧାରଣର ମାନରେ ଉନ୍ନତି ଆଣିବାରେ ସହାୟକ ହେବ।

ହିନ୍ଦୁସ୍ଥାନ ସମାଚାର / ସ୍ୱାଗତିକା