ନୂଆଦିଲ୍ଲୀ, ୧୫ ଅକ୍ଟୋବର (ହି.ସ.)। କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହ ଗୁରୁବାର କହିଛନ୍ତି ଯେ ନକ୍ସଲବାଦର ଅନ୍ତ ଘଟିବା ସତ୍ତ୍ୱେ, ପାଞ୍ଚ ଦଶନ୍ଧି ଧରି ଚାଲିଥିବା ହିଂସାର ଯନ୍ତ୍ରଣା ଦୂର କରିବା ପାଇଁ ପ୍ରଭାବିତ ଲୋକଙ୍କ ପୁନର୍ବାସ ଏବଂ ସେମାନଙ୍କୁ ସମ୍ମାନଜନକ ଜୀବନ ପ୍ରଦାନ କରିବା ଆବଶ୍ୟକ। ସରକାରଙ୍କ ଲକ୍ଷ୍ୟ କେବଳ ନକ୍ସଲବାଦର ଅନ୍ତ ଘଟାଇବା ନୁହେଁ, ବରଂ ଏହାର ପ୍ରତ୍ୟେକ ଚିହ୍ନ ଲିଭାଇ ବସ୍ତରକୁ ପୁଣି ଥରେ ହସଖୁସିରେ ଭରିଥିବା ଅଞ୍ଚଳରେ ପରିଣତ କରିବା ମଧ୍ୟ।

ଛତିଶଗଡ଼ର ଦନ୍ତେୱାଡ଼ାରେ ‘ସେବା ସଂକଳ୍ପ ଅଭିଯାନ’ ଅନ୍ତର୍ଗତ ଆୟୋଜିତ ଦିବ୍ୟାଙ୍ଗ ସେବା ଶିବିରର ଦ୍ୱିତୀୟ ପର୍ଯ୍ୟାୟକୁ ଭିଡିଓ କନ୍ଫରେନ୍ସିଂ ମାଧ୍ୟମରେ ସମ୍ବୋଧିତ କରି ଶାହ ଏହା କହିଥିଲେ। ସେ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସରକାରର ମୁଖ୍ୟ ଭାବେ ସାର୍ବଜନୀନ ଜୀବନରେ ୨୫ ବର୍ଷ ପୂରଣ କରିଥିବା ଅବସରରେ ଦେଶବ୍ୟାପୀ ସେବା ସଂକଳ୍ପ ଅଭିଯାନ ଚାଲିଛି। ଏହି ଅଭିଯାନ ଅଧୀନରେ ନକ୍ସଲ ହିଂସାରେ ଦିବ୍ୟାଙ୍ଗ ହୋଇଥିବା ଆଦିବାସୀ ଭାଇଭଉଣୀମାନଙ୍କୁ କୃତ୍ରିମ ଅଙ୍ଗ ଏବଂ ଅନ୍ୟାନ୍ୟ ସହାୟକ ଉପକରଣ ଯୋଗାଇ ଦିଆଯାଉଛି, ଯାହାଦ୍ୱାରା ସେମାନେ ପୁଣି ଥରେ ଆତ୍ମନିର୍ଭରଶୀଳ ଜୀବନ ବଞ୍ଚିପାରିବେ।

ଗୃହମନ୍ତ୍ରୀ କହିଥିଲେ ଯେ ଅକ୍ଟୋବର ୫ରୁ ୭ ତାରିଖ ମଧ୍ୟରେ ଜଗଦଲପୁରରେ ଆୟୋଜିତ ଶିବିରରେ ୩,୬୦୦ରୁ ଅଧିକ ଦିବ୍ୟାଙ୍ଗ ଉପକୃତ ହୋଇଥିଲେ। ସେମାନଙ୍କ ମଧ୍ୟରୁ ୧,୫୭୦ରୁ ଅଧିକ ହିତାଧିକାରୀ ବସ୍ତର ଅଞ୍ଚଳର ଥିଲେ। ଏହି ତଥ୍ୟରୁ ଜଣାପଡ଼ୁଛି ଯେ ପାଞ୍ଚ ଦଶନ୍ଧି ଧରି ଚାଲିଥିବା ନକ୍ସଲବାଦ ଗରିବ ଆଦିବାସୀ ସମ୍ପ୍ରଦାୟକୁ କେତେ ମାତ୍ରାରେ ପ୍ରଭାବିତ କରିଛି। ରାଜନୈତିକ ଉଦ୍ଦେଶ୍ୟରେ ବାରୁଦ ସୁଡ଼ଙ୍ଗ ଓ ବିସ୍ଫୋରକ ବ୍ୟବହାର କରି ନିରୀହ ନାଗରିକଙ୍କୁ ଦିବ୍ୟାଙ୍ଗ କରିଦେବା ମାନବାଧିକାରର ଗମ୍ଭୀର ଉଲ୍ଲଂଘନ।

ଶାହ କହିଥିଲେ ଯେ ଏହି ଶିବିରରେ ଆବଶ୍ୟକତା ଥିବା ଲୋକଙ୍କୁ କୃତ୍ରିମ ହାତ-ଗୋଡ଼, ହ୍ୱିଲ୍ଚେୟାର, ଟ୍ରାଇସାଇକେଲ୍, ଶ୍ରବଣ ଯନ୍ତ୍ର, ସ୍ମାର୍ଟ ଚାଲିବା ବାଡ଼ି ଏବଂ କ୍ୟାଲିପର୍ସ ଭଳି ସହାୟକ ଉପକରଣ ଯୋଗାଇ ଦିଆଯାଉଛି। ଜଣେ ହିତାଧିକାରୀଙ୍କ ଅନୁଭୂତିର ଉଲ୍ଲେଖ କରି ସେ କହିଥିଲେ ଯେ ତିନି ବର୍ଷ ପରେ ନିଜ ହାତରେ ଗ୍ଲାସ୍ ଉଠାଇ ପାଣି ପିଇପାରିବାର ଖୁସିକୁ ଶବ୍ଦରେ ବର୍ଣ୍ଣନା କରିବା କଷ୍ଟକର। ଏହି ଅଭିଯାନରେ ଅବଦାନ ପାଇଁ ସେ ଛତିଶଗଡ଼ ସରକାର, ଜିଲ୍ଲା ପ୍ରଶାସନ, ସମାଜ କଲ୍ୟାଣ ବିଭାଗ, ଭଗବାନ ମହାବୀର ବିକଳାଙ୍ଗ ସହାୟତା ସମିତି, ଭାରତୀୟ ଜୈନ ସଂଘ ଏବଂ ଅନ୍ୟ ସମ୍ପୃକ୍ତ ସଂସ୍ଥାଗୁଡ଼ିକର ପ୍ରଶଂସା କରିଥିଲେ।

ଗୃହମନ୍ତ୍ରୀ ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ ଏବଂ ଉପମୁଖ୍ୟମନ୍ତ୍ରୀ ବିଜୟ ଶର୍ମାଙ୍କୁ ଏହି ଅଭିଯାନକୁ ନିରନ୍ତର ଜାରି ରଖିବାକୁ ଅନୁରୋଧ କରିଥିଲେ। ସେ କହିଥିଲେ ଯେ ଯେଉଁଠାରେ ରାଜ୍ୟ ସରକାରଙ୍କୁ ସମ୍ବଳର ଅଭାବ ହେବ, ସେଠାରେ କେନ୍ଦ୍ର ସରକାର ପୂର୍ଣ୍ଣ ସହଯୋଗ ପାଇଁ ପ୍ରସ୍ତୁତ ରହିବେ। ପ୍ରତ୍ୟେକ ଦିବ୍ୟାଙ୍ଗ ଏବଂ ନକ୍ସଲ ହିଂସାରେ ପ୍ରଭାବିତ ବ୍ୟକ୍ତିଙ୍କ ପୁନର୍ବାସ କରି ସେମାନଙ୍କୁ ସମାଜରେ ସମ୍ମାନର ସହ ଜୀବନ ବଞ୍ଚିବାର ସୁଯୋଗ ଦେବା ସରକାରଙ୍କ ଦାୟିତ୍ୱ।

ଶାହ କହିଥିଲେ ଯେ ନକ୍ସଲବାଦର ପ୍ରଭାବରୁ ବାହାରି ବସ୍ତରରେ ବିକାଶ ଓ ସ୍ୱାଭାବିକ ଜନଜୀବନ ପୁନଃସ୍ଥାପନ ପାଇଁ ଅନେକ ପଦକ୍ଷେପ ନିଆଯାଇଛି। ନିଜ ସମ୍ବୋଧନରେ ସେ ଦାବି କରିଥିଲେ ଯେ ୮,୫୨୬ ଜଣ ନକ୍ସଲ ଆତ୍ମସମର୍ପଣ କରିଛନ୍ତି। ସେ କହିଥିଲେ ଯେ ଏମାନଙ୍କ ମଧ୍ୟରୁ ଯେଉଁ ୭,୫୦୦ ଜଣଙ୍କର ବ୍ୟାଙ୍କ ଖାତା ନଥିଲା, ସେମାନଙ୍କର ଖାତା ଖୋଲାଯାଇଛି। ଏହା ବ୍ୟତୀତ ୧,୬୨୫ ଜଣଙ୍କୁ ପୁରସ୍କାର ରାଶି ଏବଂ ୭,୮୮୨ ଜଣଙ୍କୁ ପ୍ରୋତ୍ସାହନ ରାଶି ଦିଆଯାଇଛି। ସେହିପରି ୪୫୫ ଜଣଙ୍କୁ ନିଯୁକ୍ତି ଯୋଗାଇ ଦିଆଯାଇଛି।

ସେ ଆହୁରି କହିଥିଲେ ଯେ ୧୨୯ ଜଣଙ୍କୁ ଜମି ଆବଣ୍ଟନ କରାଯାଇଛି ଏବଂ ୪୦୪ ଜଣଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ଘର ଯୋଗାଇ ଦିଆଯାଇଛି। ଦୁଇ ହଜାରରୁ ଅଧିକ ଆଦିବାସୀଙ୍କୁ ଦକ୍ଷତା ବିକାଶ ପ୍ରଶିକ୍ଷଣ ଦିଆଯାଇଛି। ଏହା ବ୍ୟତୀତ ୬,୭୦୦ଟି ନୂଆ ରାସନ କାର୍ଡ ତିଆରି କରାଯାଇଛି ଏବଂ ୨,୮୦୦ ପରିବାରକୁ ମାଗଣା ବିଦ୍ୟୁତ୍ ଯୋଗାଇ ଦିଆଯାଇଛି। ଅଞ୍ଚଳରେ ସଡ଼କ ସଂଯୋଗ ବୃଦ୍ଧି ପାଇଁ ୩୭୨ଟି ନୂଆ ପ୍ରକଳ୍ପ ଆରମ୍ଭ କରାଯାଇଛି ଏବଂ ୬୭୦ଟି କଲଭର୍ଟ ନିର୍ମାଣ କରାଯାଉଛି। ଏହା ସହିତ ୪୮,୫୨୬ ଜଣଙ୍କୁ ଆଧାର କାର୍ଡ ଯୋଗାଇ ଦିଆଯାଇଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା