ନୂଆଦିଲ୍ଲୀ, ୧୬ ଅକ୍ଟୋବର (ହି.ସ.)- କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ ଶୁକ୍ରବାର ଆଶା ବ୍ୟକ୍ତ କରିଛନ୍ତି ଯେ, ଦୁଇ ଦେଶ ମଧ୍ୟରେ ବିଶ୍ୱ ବାଣିଜ୍ୟ ଏବଂ ଦ୍ୱିପାକ୍ଷିକ ଅର୍ଥନୈତିକ ସମ୍ପର୍କର ସ୍ୱାର୍ଥରେ ଭାରତ-ଆମେରିକା ବାଣିଜ୍ୟ ଚୁକ୍ତି ଯଥାଶୀଘ୍ର ସମାପ୍ତ ହେବ।
ବ୍ୟାଙ୍କକ୍ (ଥାଇଲାଣ୍ଡ) ରେ ଅନୁଷ୍ଠିତ ଅନ୍ତର୍ଜାତୀୟ ମୁଦ୍ରା ପାଣ୍ଠି-ବିଶ୍ୱ ବ୍ୟାଙ୍କ ବାର୍ଷିକ ବୈଠକ ସମୟରେ ରେସିଡେଣ୍ଟ ସିନିୟର ଫେଲୋ (ଦକ୍ଷିଣ ଏସିଆ) ମାଇକେଲ କୁଗେଲମ୍ୟାନଙ୍କ ସହ ଏକ ଇଣ୍ଟରାକ୍ଟିଭ୍ ଅଧିବେଶନରେ ନିର୍ମଳା ଏହା କହିଛନ୍ତି ବୋଲି ଅର୍ଥ ମନ୍ତ୍ରଣାଳୟ 'ଏକ୍ସ' ରେ ଏକ ପୋଷ୍ଟରେ କହିଛି।
ଦୁଇ ଦେଶ ମଧ୍ୟରେ ଆଲୋଚନା ଜାରି ରହିଛି। ମୁଁ ଆଶା କରୁଛି ଯେ ଦୁଇ ଅଂଶୀଦାର ଭାରତ ଏବଂ ଆମେରିକା ମଧ୍ୟରେ ବିଶ୍ୱ ବାଣିଜ୍ୟ ଏବଂ ବାଣିଜ୍ୟ ସ୍ୱାର୍ଥରେ, ଏହି ବାଣିଜ୍ୟ ରାଜିନାମା ଯଥାଶୀଘ୍ର ସମାପ୍ତ ହେବ। ବେଜିଂ ସହିତ ବର୍ଷ ବର୍ଷ ଧରି ସମ୍ପର୍କ ରହିଥିବା ସତ୍ତ୍ୱେ, ବାଣିଜ୍ୟିକ ଅସନ୍ତୁଳନ ବୃଦ୍ଧି ଏବଂ ଚୀନରେ ଭାରତୀୟ ଉତ୍ପାଦଗୁଡ଼ିକର ବଜାର ପ୍ରବେଶ ଉପରେ ଜାରି ରହିଥିବା ପ୍ରତିବନ୍ଧକ ଏବେବି ଏକ ବଡ଼ ଚିନ୍ତାର ବିଷୟ ହୋଇ ରହିଛି ବୋଲି ଶ୍ରୀମତୀ ସୀତାରାମନ କହିଥିଲେ। କେନ୍ଦ୍ର ଅର୍ଥମନ୍ତ୍ରୀ ଦର୍ଶାଇଛନ୍ତି ଯେ, ସମସ୍ତ ବାଧାବିଘ୍ନ ସତ୍ତ୍ୱେ ଭାରତ ଏହାର ଅଭିବୃଦ୍ଧି ହାର ବଜାୟ ରଖିବାରେ ସଫଳ ହୋଇଛି।
ଭାରତର ଜିଡିପି ଅଭିବୃଦ୍ଧି ସମ୍ପର୍କରେ ଅର୍ଥମନ୍ତ୍ରୀ କହିଥିଲେ, ବାସ୍ତବରେ, କୋଭିଡ ପରେ ଗତ ଚାରି-ପାଞ୍ଚ ବର୍ଷ ମଧ୍ୟରେ ଆମେ ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥବ୍ୟବସ୍ଥା ହୋଇ ରହିଛୁ। ଏହି ପ୍ରଦର୍ଶନ ଆମେ ନିରନ୍ତର କରୁଥିବା ପ୍ରୟାସର ଅନୁରୂପ ଅଟେ। ସେ କହିଥିଲେ ଯେ, ଏହାର ମୁଖ୍ୟ କାରଣଗୁଡ଼ିକ ମଧ୍ୟରେ ସମାବେଶୀ ହେବା ଅନ୍ତର୍ଭୁକ୍ତ। ଶ୍ରୀମତୀ ସୀତାରାମନ କହିଥିଲେ ଯେ, ପ୍ରତ୍ୟେକଙ୍କର ସମ୍ବଳର ଉପଲବ୍ଧତା ସୁନିଶ୍ଚିତ କରିବା, ଯୁବପିଢ଼ିଙ୍କ ପାଇଁ ଦକ୍ଷତା ବିକାଶର ସୁଯୋଗ ସୁନିଶ୍ଚିତ କରିବା ଏବଂ ଏହି ପ୍ରକ୍ରିୟାରେ ଆର୍ଥିକ ଶୃଙ୍ଖଳା ବଜାୟ ରଖିବା ସୁନିଶ୍ଚିତ କରିବା। ଆମେ ସଚେତନ ଯେ ଜନସାଧାରଣଙ୍କ ଅର୍ଥ ପ୍ରତି ଆମର ଦାୟିତ୍ୱ ରହିଛି। ତେଣୁ, ଆମେ ଭଲ ଭାବେ ଜାଣୁ ଯେ ଅର୍ଥବ୍ୟବସ୍ଥାର ଦୁର୍ବଳ ବର୍ଗଙ୍କ ଯତ୍ନ ନେବାକୁ ପଡ଼ିଲେ ମଧ୍ୟ ଆମେ ଅଯଥା ଅର୍ଥ ଖର୍ଚ୍ଚ କରିପାରିବୁ ନାହିଁ।
ଏଠାରେ ଉଲ୍ଲେଖଯୋଗ୍ୟ, କେନ୍ଦ୍ର ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୁଷ ଗୋୟଲ ଗୁରୁବାର କହିଛନ୍ତି ଯେ, ଭାରତ-ଆମେରିକା ବାଣିଜ୍ୟ ଚୁକ୍ତିର ପ୍ରଥମ ପର୍ଯ୍ୟାୟ ଚୂଡ଼ାନ୍ତ ହୋଇଛି ଏବଂ ବର୍ତ୍ତମାନ ଆଇନଗତ ଭାବରେ ଡ୍ରାଫ୍ଟ ପ୍ରସ୍ତୁତ କରାଯାଉଛି।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
