ମୈସୁରୁ, ୧୬ ଅକ୍ଟୋବର (ହି.ସ.)। କର୍ଣ୍ଣାଟକର ମୈସୁରୁ ଜିଲ୍ଲାର ପିରିୟାପଟ୍ଟଣ ତାଲୁକ ଅନ୍ତର୍ଗତ କୀରନହଲ୍ଲୀ ଗେଟ୍ ନିକଟରେ ଶୁକ୍ରବାର ଭୋର ସମୟରେ ଏକ ଘରୋଇ ବସ୍ ଓ ଟ୍ରକ୍ ମଧ୍ୟରେ ମୁହାଁମୁହିଁ ଧକ୍କା ହେବାରୁ ୪ ଜଣଙ୍କ ମୃତ୍ୟୁ ହୋଇଛି। ଏଥିରେ ୨୦ରୁ ଅଧିକ ଯାତ୍ରୀ ଆହତ ହୋଇଛନ୍ତି।
ପୁଲିସର ସୂଚନା ଅନୁଯାୟୀ, ଶୁକ୍ରବାର ଭୋର ପ୍ରାୟ ୩ଟା ୩୦ ମିନିଟ୍ ସମୟରେ ଏହି ଦୁର୍ଘଟଣା ଘଟିଥିଲା। ମୈସୁରୁରୁ ମାଡିକେରୀ ଅଭିମୁଖେ ଯାଉଥିବା ଏକ ଘରୋଇ ବସ୍ ସହ ମାଡିକେରୀ ପଟରୁ ମୈସୁରୁ ଆସୁଥିବା ଏକ ଟ୍ରକ୍ର ମୁହାଁମୁହିଁ ଧକ୍କା ହୋଇଥିଲା। ଧକ୍କା ଏତେ ଭୟଙ୍କର ଥିଲା ଯେ ବସ୍ ଓ ଟ୍ରକ୍ ଉଭୟ ଗୁରୁତର ଭାବେ କ୍ଷତିଗ୍ରସ୍ତ ହୋଇଥିଲା। ଦୁର୍ଘଟଣାସ୍ଥଳରେ ହିଁ ୪ ଜଣଙ୍କ ମୃତ୍ୟୁ ହୋଇଥିଲା।
ମୃତକଙ୍କ ମଧ୍ୟରେ ବସ୍ର ଚାଳକ ସୁନୀଲ (୨୬), କଣ୍ଡକ୍ଟର ସନ୍ଦେଶ (୨୫) ଏବଂ ଯାତ୍ରୀ ଅଫତାବ (୨୩)ଙ୍କ ପରିଚୟ ମିଳିଛି। ଚତୁର୍ଥ ମୃତକଙ୍କ ପରିଚୟ ଏଯାଏଁ ଜଣାପଡ଼ିନାହିଁ। ଦୁର୍ଘଟଣାରେ ଆହତ ୨୦ରୁ ଅଧିକ ଯାତ୍ରୀଙ୍କୁ ପିରିୟାପଟ୍ଟଣ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଛି। ସେଠାରେ ସେମାନଙ୍କ ଚିକିତ୍ସା ଚାଲିଛି।
ସୂଚନା ଅନୁଯାୟୀ, ଗୁରୁବାର ରାତିରେ ପ୍ରବଳ ବର୍ଷା ଯୋଗୁଁ ଏକ ଗଛର ଡାଳ ରାସ୍ତା ଉପରେ ଭାଙ୍ଗି ପଡ଼ିଥିଲା। ଉକ୍ତ ଡାଳକୁ ଏଡ଼ାଇବାକୁ ଯାଇ ଟ୍ରକ୍ ଚାଳକ ଗାଡ଼ିକୁ ଡାହାଣ ପଟକୁ ମୋଡ଼ି ଦେଇଥିଲେ। ଏହି ସମୟରେ ସାମ୍ନା ପଟୁ ଆସୁଥିବା ଘରୋଇ ବସ୍ ସହ ଟ୍ରକ୍ର ଧକ୍କା ହୋଇଥିଲା।
ମୈସୁରୁ ଜିଲ୍ଲାର ପୁଲିସ ଅଧୀକ୍ଷକ ମଲ୍ଲିକାର୍ଜୁନ ବାଲଦଣ୍ଡି ଘଟଣାସ୍ଥଳ ପରିଦର୍ଶନ କରି ସ୍ଥିତିର ସମୀକ୍ଷା କରିଥିଲେ। ଦୁର୍ଘଟଣାର ପ୍ରକୃତ କାରଣ ଜାଣିବା ପାଇଁ ତଦନ୍ତ କରାଯିବ ବୋଲି ସେ କହିଛନ୍ତି। ଏହି ଘଟଣାରେ ପିରିୟାପଟ୍ଟଣ ପୁଲିସ ଥାନାରେ ମାମଲା ରୁଜୁ ହୋଇଛି।
ହିନ୍ଦୁସ୍ଥାନ ସମାଚାର / ସମନ୍ୱୟ
