ନୂଆଦିଲ୍ଲୀ, ୧୬ ଅକ୍ଟୋବର (ହି.ସ.)। ଉପରାଷ୍ଟ୍ରପତି ସି.ପି. ରାଧାକୃଷ୍ଣନ ଶୁକ୍ରବାର ଉପରାଷ୍ଟ୍ରପତି ଭବନରେ ସ୍ୱାଧୀନତା ସଂଗ୍ରାମୀ ବୀରପାଣ୍ଡ୍ୟ କଟ୍ଟାବୋମ୍ମନଙ୍କ ପୁଣ୍ୟତିଥି ଅବସରରେ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।
ଉପରାଷ୍ଟ୍ରପତି ସାମାଜିକ ଗଣମାଧ୍ୟମ ‘ଏକ୍ସ’ରେ ଏକ ବାର୍ତ୍ତା ଦେଇ କହିଛନ୍ତି ଯେ ବୀରପାଣ୍ଡ୍ୟ କଟ୍ଟାବୋମ୍ମନ ବ୍ରିଟିଶ ସାମ୍ରାଜ୍ୟବାଦ ଆଗରେ ମୁଣ୍ଡ ନୁଆଁଇବାକୁ ମନା କରିବା ସହ ନିର୍ଭୀକ ଭାବେ ଏହାର ବିରୋଧ କରିଥିଲେ। ତାଙ୍କର ବୀରତ୍ୱ, ବଳିଦାନ ଏବଂ ନିଜ ସାର୍ବଭୌମତ୍ୱର ସୁରକ୍ଷା ପ୍ରତି ଅଟଳ ସଂକଳ୍ପ ଭାରତର ସ୍ୱାଧୀନତା ସଂଗ୍ରାମର ଇତିହାସରେ ଏକ ଅଲିଭା ଛାପ ଛାଡ଼ିଯାଇଛି।
ସେ ଆହୁରି କହିଛନ୍ତି ଯେ ଦାସତ୍ୱର ଶୃଙ୍ଖଳକୁ ପ୍ରତ୍ୟାଖ୍ୟାନ କରି ଦେଶପ୍ରେମର ଭାବନା ଓ ଦୃଢ଼ ସଂକଳ୍ପ ସହ ନିଜ ଅଧିକାରର ସୁରକ୍ଷା ପାଇଁ ସଂଘର୍ଷ କରିଥିବା ବୀରପାଣ୍ଡ୍ୟ କଟ୍ଟାବୋମ୍ମନଙ୍କ ବୀରତ୍ୱପୂର୍ଣ୍ଣ ଜୀବନ ଆଗାମୀ ପିଢ଼ି ପର୍ଯ୍ୟନ୍ତ ଲୋକଙ୍କ ହୃଦୟରେ ସର୍ବଦା ଜୀବିତ ରହିବ।
ଉଲ୍ଲେଖଯୋଗ୍ୟ ଯେ, ବୀରପାଣ୍ଡ୍ୟ କଟ୍ଟାବୋମ୍ମନ ତାମିଲନାଡ଼ୁର ଥୁଥୁକୁଡ଼ି ଜିଲ୍ଲାର ପଞ୍ଚାଳଙ୍କୁରିଚି ଅଞ୍ଚଳର ଜଣେ ପଲାୟକ୍କାର ବା ପଲିଗର ଥିଲେ। ସେହି ସମୟରେ ଏହି ଅଞ୍ଚଳ ତିରୁନେଲଭେଲି କ୍ଷେତ୍ର ଅଧୀନରେ ଥିଲା। ତାଙ୍କୁ ପଞ୍ଚାଳଙ୍କୁରିଚି ପଲାୟମର କଟ୍ଟାବୋମ୍ମନ ନାୟକ ଭାବେ ମଧ୍ୟ ଜଣାଯାଉଥିଲା।
ହିନ୍ଦୁସ୍ଥାନ ସମାଚାର / ସମନ୍ୱୟ
