ସମ୍ବଲପୁର, ୨ ଅକ୍ଟୋବର (ହି.ସ.)- ସରକାରଙ୍କ ଉନ୍ନୟନ କାର୍ଯ୍ୟରେ ସ୍ୱଚ୍ଛତା ଓ ଉତ୍ତର ଦାୟିତ୍ୱକୁ ଗୁରୁତ୍ୱ ଦିଆଯାଉ ଥିବାବେଳେ ସମ୍ବଲପୁର ଜିଲ୍ଲା ଜମନକିରା ବ୍ଲକ କାର୍ଯ୍ୟାଳୟ ପରିସରରେ ହେଉଥିବା ଏକ ନିର୍ମାଣ କାର୍ଯ୍ୟକୁ ନେଇ ଉଠିଛି ପ୍ରଶ୍ନବାଚୀ । ବ୍ଲକ କର୍ମଚାରୀଙ୍କ ପାଇଁ ବ୍ଲକ୍ ଆଇବି ନିକଟରେ ଏକ ନୂତନ କୋଠା ନିର୍ମାଣ ଚାଲିଛି । ହେଲେ ସୂଚନା ଫଳକରେ କାର୍ଯ୍ୟ ସମ୍ପର୍କିତ କୌଣସି ଆବଶ୍ୟକ ତଥ୍ୟ ଉଲ୍ଲେଖ ନଥିବା ଦେଖିବାକୁ ମିଳିଛି ।

କାର୍ଯ୍ୟର ଅନୁମୋଦିତ ଅର୍ଥରାଶି କେତେ ? କେଉଁ ସଂସ୍ଥା କିମ୍ବା ଠିକାଦାରଙ୍କ ମାଧ୍ୟମରେ ଏହି ନିର୍ମାଣ କାର୍ଯ୍ୟ ହେଉଛି ? କେବେ ଠାରୁ କାର୍ଯ୍ୟ ଆରମ୍ଭ ଓ କେବେ ନିର୍ମାଣ କାର୍ଯ୍ୟ ଶେଷ ହେବ ସେ ସମ୍ପର୍କିତ ସୂଚନା ମଧ୍ୟ ଉଲ୍ଲେଖ ନଥିବା ଜଣାପଡ଼ିଛି । ବ୍ଲକ୍ ପ୍ରଶାସନର ନାକ ତଳେ ହେଉଥିବା ନିର୍ମାଣ କାର୍ଯ୍ୟରେ ଯେତେବେଳେ କୌଣସି ସଠିକ୍ ସୂଚନା ରହୁନାହିଁ, ସେତେବେଳେ ଦୂର ଦୁରାନ୍ତରେ ହେଉଥିବା ସରକାରୀ କାର୍ଯ୍ୟରେ କି ପ୍ରକାରର ସ୍ୱଚ୍ଛତା ଅବଲମ୍ବନ କରାଯାଉଥିବ ତାହା ସହଜେ ଅନୁମେୟ ।

ବିଶେଷକରି ବିଡିଓଙ୍କ କାର୍ଯ୍ୟାଳୟ ପରିସର ଭଳି ସରକାରୀ ନିରୀକ୍ଷଣ ଅଧୀନ ଅଞ୍ଚଳରେ ଯଦି ନିର୍ମାଣ କାର୍ଯ୍ୟର ତଥ୍ୟ ସ୍ପଷ୍ଟ ଭାବେ ପ୍ରଦର୍ଶିତ ନହୁଏ, ତେବେ ଗ୍ରାମାଞ୍ଚଳରେ ଚାଲୁଥିବା ଅନ୍ୟ ଉନ୍ନୟନ କାର୍ଯ୍ୟର ସ୍ୱଚ୍ଛତା ଓ ଗୁଣାତ୍ମକ ମାନ ନେଇ ପ୍ରଶ୍ନ ଉଠିବା ସ୍ୱାଭାବିକ ବୋଲି ସାଧାରଣରେ ମତ ପ୍ରକାଶ ପାଇଛି।

ଏ ସମ୍ପର୍କରେ ବ୍ଲକର ବିଡିଓ ରବୀନ୍ଦ୍ର ସେଠିଙ୍କୁ ପଚାରିବାରେ ଆମେ ସୂଚନା ଫଳକରେ ସମସ୍ତ ତଥ୍ୟ ଲେଖିବା ପାଇଁ ତାଗିଦ କରିଛୁ ବୋଲି ସଫେଇ ଦେଇଛନ୍ତି ।

ଏବେ ପ୍ରଶ୍ନ ଉଠିଛି, ନିର୍ମାଣ କାର୍ଯ୍ୟର ସମସ୍ତ ତଥ୍ୟ କେବେ ସାର୍ବଜନୀନ କରାଯିବ ଏବଂ ହେଉଥିବା ନିର୍ମାଣ କାର୍ଯ୍ୟର ମାନ କେବେ ତଦାରଖ କରାଯିବ ? ଏବେ ଦେଖିବାକୁ ଅପେକ୍ଷା ଏହି ବିନା ସୂଚନା ଫଳକରେ ହୋଇଥିବା ନିର୍ମାଣ କାର୍ଯ୍ୟ ଉପରେ ପ୍ରଶାସନ କି ପ୍ରକାରର କାର୍ଯ୍ୟାନୁଷ୍ଠାନ ଗ୍ରହଣ କରିବେ ?

ହିନ୍ଦୁସ୍ଥାନ ସମାଚାର / ଶୈଳେଶ