ଜୟପୁର, ୨ ଅକ୍ଟୋବର (ହି.ସ.)- କୋରାପୁଟ ସ୍ଥିତ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟରେ ମାସବ୍ୟାପୀ ଚାଲିଥିବା 'ହିନ୍ଦୀ ମାସ' ପାଳନ ଏବଂ 'ହିନ୍ଦୀ କର୍ମଶାଳା-୨୦୨୬' ସଫଳତାର ସହ ଉଦଯାପିତ ହୋଇଯାଇଛି । ଦୈନନ୍ଦିନ ଜୀବନ ଏବଂ ସରକାରୀ କାର୍ଯ୍ୟାଳୟଗୁଡ଼ିକରେ ହିନ୍ଦୀ ଭାଷାର ବ୍ୟବହାରକୁ ପ୍ରୋତ୍ସାହିତ କରିବା ଲକ୍ଷ୍ୟରେ ବିଶ୍ୱବିଦ୍ୟାଳୟର 'ସରକାରୀ ଭାଷା ବିଭାଗ' ଏବଂ 'ହିନ୍ଦି ବିଭାଗ'ର ମିଳିତ ଆନୁକୂଲ୍ୟରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା।ଉଦଯାପନୀ ସମାରୋହରେ ଅଧ୍ୟକ୍ଷତା କରି ବିଶ୍ୱବିଦ୍ୟାଳୟର କୁଳପତି ପ୍ରଫେସର (ଡକ୍ଟର) ଅଜିତ କୁମାର ଶାସନୀ ସରକାରୀ କାର୍ଯ୍ୟ ଓ ଦୈନନ୍ଦିନ ଆଲୋଚନାରେ ହିନ୍ଦୀ ଭାଷାର ଅଧିକରୁ ଅଧିକ ବ୍ୟବହାର ଉପରେ ଗୁରୁତ୍ୱାରୋପ କରିଥିଲେ। ବିଶ୍ୱବିଦ୍ୟାଳୟ ପରିବାରର ସମସ୍ତ ସଦସ୍ୟଙ୍କୁ ହିନ୍ଦୀ ଶିଖିବା ଏବଂ ଏହାର ବ୍ୟବହାର କରିବା ପାଇଁ ସେ ଆହ୍ୱାନ ଦେଇଥିଲେ।ଏହି କାର୍ଯ୍ୟକ୍ରମରେ କୋରାପୁଟ ବି.ଏସ୍.ଏଫ୍. କମାଣ୍ଡାଣ୍ଟ ଦିନେଶ ପାଲ ସିଂହ ମୁଖ୍ୟ ଅତିଥି ଭାବେ ଯୋଗଦେଇ ହିନ୍ଦୀ ଭାଷାର ସାଂବିଧାନିକ ମାନ୍ୟତା, ଏହାର ସମୃଦ୍ଧ ସାହିତ୍ୟିକ ଐତିହ୍ୟ ଏବଂ ସରକାରୀ ସଂଚାରରେ ଏହାର ବର୍ଦ୍ଧିତ ଆବଶ୍ୟକତା ସମ୍ପର୍କରେ ଆଲୋକପାତ କରିଥିଲେ। ହିନ୍ଦୀ ଭାଷାର ସରଳତା ଓ ସହଜ ଗ୍ରହଣୀୟତା ହିଁ ଏହାର ମୁଖ୍ୟ ବିଶେଷତ୍ୱ ବୋଲି ସେ ପ୍ରକାଶ କରିଥିଲେ।'ହିନ୍ଦୀ ମାସ' ପାଳନ ଅବସରରେ ବିଶ୍ୱବିଦ୍ୟାଳୟର ଛାତ୍ରଛାତ୍ରୀ ଏବଂ ଅଧ୍ୟାପକ-କର୍ମଚାରୀଙ୍କ ଶିଶୁମାନଙ୍କ ପାଇଁ କବିତା ଆବୃତ୍ତି, ପ୍ରବନ୍ଧ ଲିଖନ ଏବଂ ବକ୍ତୃତା ଭଳି ବିଭିନ୍ନ ପ୍ରତିଯୋଗିତା ଆୟୋଜନ କରାଯାଇଥିଲା। ଉଦ୍ଯାପନୀ ଉତ୍ସବରେ କୃତୀ ପ୍ରତିଯୋଗୀମାନଙ୍କୁ ପ୍ରମାଣପତ୍ର, ମାନପତ୍ର ଓ ପୁରସ୍କାର ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଥିଲା।ଏହା ସହିତ ଆୟୋଜିତ 'ହିନ୍ଦୀ କର୍ମଶାଳା-୨୦୨୬'ରେ ପ୍ରଶାସନିକ ଏବଂ ଶାସନଗତ କ୍ଷେତ୍ରରେ ହିନ୍ଦୀ ଭାଷାର ସଠିକ୍ ଓ ପ୍ରଭାବଶାଳୀ ବ୍ୟବହାର ସମ୍ପର୍କରେ ସଚେତନତା ସୃଷ୍ଟି କରାଯାଇଥିଲା।

ହିନ୍ଦୁସ୍ଥାନ ସମାଚାର / ପିକେପି