ମୁମ୍ବାଇ, ଅକ୍ଟୋବର ୧୯ (ହି.ସ.)। ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ଉପପ୍ରଧାନମନ୍ତ୍ରୀ ତଥା ବୈଦେଶିକ ମନ୍ତ୍ରୀ ଶେଖ ଅବଦୁଲ୍ଲା ବିନ୍ ଜାୟେଦ ଅଲ୍ ନାହୟାନ ସୋମବାର ଏକ ସରକାରୀ ଗସ୍ତରେ ମୁମ୍ବାଇରେ ପହଞ୍ଚିଛନ୍ତି। ବୈଦେଶିକ ମନ୍ତ୍ରଣାଳୟ ଅନୁଯାୟୀ, ତାଙ୍କର ଏହି ଗସ୍ତ ଭାରତ ଓ ୟୁଏଇ ମଧ୍ୟରେ ନିୟମିତ ଉଚ୍ଚସ୍ତରୀୟ ଯୋଗାଯୋଗ ଏବଂ ଦୃଢ଼ ହେଉଥିବା ରଣନୈତିକ ସମ୍ପର୍କକୁ ପ୍ରତିଫଳିତ କରୁଛି।

ମୁମ୍ବାଇରେ ପହଞ୍ଚିବା ପରେ ଶେଖ ଅବଦୁଲ୍ଲାଙ୍କୁ ମହାରାଷ୍ଟ୍ର ସରକାରଙ୍କ ଦକ୍ଷତା ବିକାଶ ବିଭାଗର ମନ୍ତ୍ରୀ ମଙ୍ଗଳପ୍ରଭାତ ଲୋଢା ସ୍ୱାଗତ କରିଥିଲେ। ଭାରତୀୟ ବୈଦେଶିକ ମନ୍ତ୍ରଣାଳୟ ସାମାଜିକ ଗଣମାଧ୍ୟମ ମଞ୍ଚ ‘ଏକ୍ସ’ରେ ତାଙ୍କ ଆଗମନ ସମ୍ପର୍କରେ ସୂଚନା ଦେଇ କହିଛି ଯେ, ଏହି ଗସ୍ତ ଦ୍ୱାରା ଉଭୟ ଦେଶ ମଧ୍ୟରେ ଥିବା ବ୍ୟାପକ ରଣନୈତିକ ଭାଗିଦାରୀ ଆହୁରି ମଜବୁତ ହେବାର ଆଶା ରହିଛି।

ଭାରତର ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଅକ୍ଟୋବର ୧୯ ଓ ୨୦ ତାରିଖରେ ମୁମ୍ବାଇଠାରେ ତାଙ୍କର ୟୁଏଇ ସମକକ୍ଷଙ୍କୁ ସ୍ୱାଗତ କରିବେ। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସ୍ୱାଲ କହିଛନ୍ତି ଯେ, ଉଭୟ ଦେଶର ପ୍ରତିନିଧିମଣ୍ଡଳ ଦ୍ୱିପାକ୍ଷିକ ସହଯୋଗର ବିଭିନ୍ନ ଦିଗର ସମୀକ୍ଷା କରିବା ସହ ଚାଲୁ ରହିଥିବା ପଦକ୍ଷେପଗୁଡ଼ିକୁ ଆଗକୁ ବଢ଼ାଇବା ନେଇ ଆଲୋଚନା କରିବେ।

ଏହି ଆଲୋଚନାରେ ଶକ୍ତି, ବାଣିଜ୍ୟ, ପୁଞ୍ଜିନିବେଶ, ଆର୍ଥିକ ପ୍ରଯୁକ୍ତିବିଦ୍ୟା (ଫିନଟେକ୍), ପ୍ରତିରକ୍ଷା ଏବଂ ଯୋଗାଯୋଗ ଭିତ୍ତିଭୂମି ଭଳି ପ୍ରମୁଖ କ୍ଷେତ୍ର ସାମିଲ ହେବ। ଏହା ବ୍ୟତୀତ ପଶ୍ଚିମ ଏସିଆର ପରିସ୍ଥିତି ତଥା ବିଭିନ୍ନ ବିଶ୍ୱସ୍ତରୀୟ ଓ ବହୁପକ୍ଷୀୟ ପ୍ରସଙ୍ଗ ଉପରେ ମଧ୍ୟ ଉଭୟ ପକ୍ଷ ମତ ବିନିମୟ କରିବେ।

ହିନ୍ଦୁସ୍ଥାନ ସମାଚାର / ସ୍ୱାଗତିକା