ଆସାମରେ ୧୯ କୋଟିରୁ ଅଧିକ ଟଙ୍କାର ୟାବା ଟାବଲେଟ୍ ଜବତ, ଜଣେ ଚାଲାଣକାରୀ ଗିରଫ

ଗୁଆହାଟୀ, ୨୩ ଅକ୍ଟୋବର (ହି.ସ.)। ଆସାମର କଚାର ଜିଲ୍ଲାରେ ପୁଲିସ ଗୁପ୍ତ ଓ ନିର୍ଭରଯୋଗ୍ୟ ସୂଚନା ଆଧାରରେ ଅଭିଯାନ ଚଳାଇ ଗତ ରାତିରେ ୧୯ କୋଟି ଟଙ୍କାରୁ ଅଧିକ ମୂଲ୍ୟର ୟାବା ଟାବଲେଟ୍ ଜବତ କରିବା ସହ ଜଣେ ନିଶାଦ୍ରବ୍ୟ ଚାଲାଣକାରୀଙ୍କୁ ଗିରଫ କରିଛି।

ଆସାମର ମୁଖ୍ୟମନ୍ତ୍ରୀ ଡ. ହିମନ୍ତ ବିଶ୍ୱଶର୍ମା ସାମାଜିକ ଗଣମାଧ୍ୟମ ଫେସବୁକ୍ରେ ଏକ ପୋଷ୍ଟ ସେୟାର କରି ଏହି ସୂଚନା ଦେଇଛନ୍ତି। ସେ ଲେଖିଛନ୍ତି, “ମିଶନ ଇମ୍ପସିବଲ୍? ଆସାମରେ ଆଦୌ ନୁହେଁ!” ପୁଲିସର କାର୍ଯ୍ୟଦକ୍ଷତାକୁ ପ୍ରଶଂସା କରି ମୁଖ୍ୟମନ୍ତ୍ରୀ କହିଛନ୍ତି ଯେ ସୀମାରେ ଗାଡ଼ି ବଦଳାଇଲେ ମଧ୍ୟ ପରିଣାମ ବଦଳିବ ନାହିଁ।

କଚାର ପୁଲିସ ୧୯.୬ କୋଟି ଟଙ୍କା ମୂଲ୍ୟର ୭୮,୪୦୦ଟି ସନ୍ଦିଗ୍ଧ ୟାବା ଟାବଲେଟ୍ ଜବତ କରିବା ସହ ଜଣେ ଚାଲାଣକାରୀଙ୍କୁ ଗିରଫ କରିଛି। ଏହା ସହିତ ୟାବା ଟାବଲେଟ୍ ପରିବହନରେ ବ୍ୟବହୃତ ଏକ କାର୍କୁ ମଧ୍ୟ ଜବତ କରାଯାଇଛି। ଉକ୍ତ କାର୍ର ପଞ୍ଜୀକରଣ ନମ୍ବର ହେଉଛି ଏଏସ୍-୧୧ଜେଡ୍-୭୧୮୮।

ମୁଖ୍ୟମନ୍ତ୍ରୀ କହିଛନ୍ତି ଯେ ଏହି ଅପରାଧୀମାନଙ୍କ କାହାଣୀର ଆଉ କୌଣସି ‘ସିକ୍ୱେଲ୍’ ଯେପରି ନ ହୁଏ, ସେଥିପାଇଁ ଆସାମ ପୁଲିସ ସୁନିଶ୍ଚିତ କରୁଛି। ଏଥିନିମନ୍ତେ ସମସ୍ତ ଆବଶ୍ୟକ ପଦକ୍ଷେପ ନିଆଯାଉଛି।

ଉଲ୍ଲେଖଯୋଗ୍ୟ ଯେ, ଆସାମ ସରକାର ସମଗ୍ର ରାଜ୍ୟରେ ନିଶାଦ୍ରବ୍ୟ ବିରୋଧରେ ଏକ ବ୍ୟାପକ ଅଭିଯାନ ଚଳାଇଛନ୍ତି। ଏହାର ପରିଣାମ ସ୍ୱରୂପ ପ୍ରତିଦିନ ବିପୁଳ ପରିମାଣରେ ହେରୋଇନ୍, ବ୍ରାଉନ୍ ସୁଗାର, ଅଫିମ, ଗଞ୍ଜେଇ, ନିଷିଦ୍ଧ କଫ୍ ସିରପ୍, ୟାବା ଟାବଲେଟ୍ ସମେତ ବିଭିନ୍ନ ପ୍ରକାରର ନିଶାଦ୍ରବ୍ୟ ଜବତ ହେଉଛି। ଏଥିସହ ନିଶାଦ୍ରବ୍ୟ ଚାଲାଣରେ ସମ୍ପୃକ୍ତ ଅଭିଯୁକ୍ତମାନଙ୍କୁ ମଧ୍ୟ ଗିରଫ କରାଯାଉଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା